_ დამიბარეს პოლიციაში. გამომძიებელი ძირითადად კითხვებს მისვამდა, წინასაარჩევნოდ ვიყავი თუ არა აქტიურად ჩართული “ნაციონალური მოძრაობის” მხარდასაჭერ მუშაობაში. კონკრეტულად ვიყავი თუ არა საქმის კურსში იმ ხელშეკრულებებთან დაკავშირებით, რასაც სოციალური მომსახურების სააგენტო უფორმებდა მოქალაქეებს. ჩვენ მაგ საქმესთან არაფერ შუაში არ ვართ, ჩვენ მოქალაქეები გვთხოვდნენ დასაქმებას, რომლებსაც ვამისამართებდით სოციალურ სამსახურში, _ გვითხრა რამდენიმე სოფლის რწმუნებულმა. როგორც ჩვენთვის ხდება ცნობილი, დაკითხვას პოლიციაში ის გამომძიებლები აწარმოებენ, რომლებიც წინასაარჩვენოდ “ნაციონალური მოძრაობის” მხარდასაჭერად ხმებს აგროვებდნენ და მათ გასამარჯვებლად აქტიურად მუშაობდნენ, ახლა კი “ნაციონალების” მხარდამჭერებს უსვამენ კითხვებს. _ აცხადებს “გურია ნიუსთან” ერთ-ერთი რწმუნებული.
შსს გურიის სამხარეო მთავარი სამმართველოს უფროსის მოვალეობის შემსრულებელი გოჩა ფერსაშვილი, ჩვენი არაერთგზის მცდელობის მიუხედავად “გურია ნიუსის” სატელეფონო ზარებს არ პასუხობს, ის წინასაარჩევნოდ პოლიციის უფროსის მოადგილე იყო.
ჩვენ დავუკავშირდით გურიის სამხარეო მთავარი სამმართველოს გამომძიებელს მიხეილ დარჩიას, რომელიც არჩვენებამდე ოზურგეთის პოლიციის უფროსის მოადგილედ მუშაობდა.
_ბატონო მიხეილ, როგორც ვიცით, დაკითხვას თქვენ აწარმოებთ. . .
_კი ვაწარმოებთ.
_რამდენად სამართლიანი იქნება თქვენს მიერ წარმოებული დაკითხვა? თქვენ ხომ ამდენი წლის განმავლობაში წინა ხელისუფლებას ემსახურებოდით?
_ თქვენ რომელ ხელისუფლებას ემსახურებოდით?
_ არცერთს.
_ ჩვენ ვართ პოლიციის თანამშრომლები და ვემსახურებით მხოლოდ სახელმწიფოს, -გვითხრა დარჩიამ.
