სენაკში პარტია “ქართული ოცნება _ დემოკრატიული საქართველოს” რაიონული ორგანიზაციის დამფუძნებელი ყრილობა ჩატარდა, სადაც 74 დელეგატის თანხმობით, პარტიის თავმჯდომარედ არჩეულ იქნა დავით კილასონია.
კონფერენციას უხმაუროდ არ ჩაუვლია _ აქ კოალიციის სენაკის საარჩევნო შტაბის ყოფილი უფროსი გოჩა ბოკუჩავა თავის მომხრეებთან ერთად მივიდა და დავით კილასონიას კანდიდატურას უნდობლობა გამოუცხადა.
გოჩა ბოკუჩავა: “ჩვენ ვიცავთ პარტიულ დისციპლინას. ეს კანდიდატურა პოლიტსაბჭოს გადაწყვეტილებით არის შერჩეული, მაგრამ გულისწყრომას იწვევს ის, რომ 80 მანდატიდან ერთი მანდატიც არ აღმოჩნდა შტაბის უფროსისთვის. მე ვიყავი კოალიციის შტაბის უფროსი და იმ დაძაბულ პარიოდში, როცა ჩვენ გვდევნიდნენ, გვავიწროვებდნენ დავით კილასონია არსად არ გვინახავს. მე ვთვლი, რომ შტაბმა შეუძლებელი შეძლო, ასეთი დიდი რაოდენობით ხმა არასდროს მიუღია სენაკში ოპოზიციურ ძალას, რაც ამ არჩევნებზე აიღო “ქართულმა ოცნებამ“. კილასონია კი ამ დროს არსად არ ჩანდა. ამიტომ მიგვაჩნია, რომ პოლიტსაბჭოს ეს გადაწყვეტილება არასწორია”.
დავით კილასონია: ” ბიძინა ივანიშვილმა ქვეყნისთვის სასიკეთო საქმე წამოიწყო და ძალიან საინტერესო სამუშაო გეგმა დასახა, იმ დღიდან მე მის გვერდით ვდგევარ. ჩემთვის ძალიან საპასუხისმგებლოა სენაკის რაიონული პარტიის თავმჯდომარის პოსტზე არჩევა და არ დავიშურებ ძალას, ენერგიას და გამოცდილებას იმისთვის, რომ წარმატებით შევასრულოთ ყველა ის დაპირება, რაც წინასაარჩევნოდ “ქართულმა ოცნებამ“ მოსახლეობას მისცა. რაც შეეხება ადამიანთა ჯგუფის უკმაყოფილებას, ერთ ოჯახში არსებობს განსხვავებული მოსაზრებები და 80 კაცში რომ იყოს, არაა გასაკვირი. მე მზად ვარ დაველაპარაკო ამ ადამიანებს, მოვუსმინო მათ და ყველა კითხვაზე გავცე პასუხი. ახლა ნამდვილად არ არის განხეთქილების და არეულობის დრო _ ახლა საქმეა საკეთებელი”.
კონფერენციას ესწრებოდა ინგა ქარდავა, რომელიც კოალიციის აქტიური წევრი იყო.
ინგა ქარდავა: “დავით კილასონია ნამდვილად ღირსეული კანდიდატია, მას ბევრი კარგი საქმის გაკეთება შეუძლია რაიონისთვის და დარწმუნებული ვარ, რომ ის იქნება პარტიის კურსის გამტარებელი სენაკში. დარბაზში მყოფი ადამიანები ნამდვილად არ არიან უცხოები და მათ დიდი წვლილი მიუძღვით “ქართული ოცნების“ დაფუძნების საქმეში. ყველამ საკუთარ გულში ჩაიხედოს _ გარეთ ის ადამიანებიც დგანან, რომელთა სინდისზეცაა ოცნების კანდიდატის დამარცხება სენაკში. 74 დელეგატმა ხმა მისცა ბატონ დავითს და ჩვენ ყველა ერთად მივყვებით ბიძინა ივანიშვილის კურსს”.
