პრესკონფერენცია 3 წუთის დაგვიანებით დაიწყო, ჟურნალისტების ნაწილი კი პრესკონფერენციის დაწყებიდან 2 წუთში მივიდნენ.
ავთანდილ ბერიძე პრესსამსახურის ოთახში ზუსტად 11 საათზე მოვიდა. მისი შემოსვლისთანავე კარები გასაღებით ჩაიკეტა. ჟურნალისტების მეორე ნაწილის მოსვლის შემდეგ კარების გაღებას ბერიძის გაღიზანება მოყვა. მოგვიანებით უმაღლესი საბჭოს თავმჯდომარემ პრესკონფერენციის ჩაშლა გადაიფიქრა და გასული კვირა მიმოიხილა.
პრესკონფერენციის მსვლელობისას ავთანდილ ბერიძემ განაცხადა, რომ “ინტერპრესნიუსის” ჟურნალისტმა მოიტყუა და არასწორი ინფორმაცია გაავრცელა.
“ინტერპრესნიუსის” ჟურნალისტის კითხვაზე, რაში მდგომარეობა ტყუილი ბერიძემ განაცხადა, რომ ბათუმში “ქართული ოცნების” სახელით გაკეთებული განცხადება, სადაც “ქართული ოცნების” წევრების ნაწილის უკმაყოფილების შესახებ იყო საუბარი. წინასაარჩევნოდ ქართულ ოცნებაში გაწევრიანებულ ადამიანთან ნაწილმა, ბათუმის ორგანიზაციის თავმჯდომარეს ლაშა სირაბიძის არჩევა გააპროტესტეს.
“ის რაც გავრცელდა ინტერპრესით. მგონი თქვენ წერთ. მე რამდენადაც ვიცი, თქვენი ეს განცხადება მე-9 არხმა აიტაცა. მე ეს განცხადება მომიტანეს შაბათ საღამოს. იქ არის ტყუილი. ადამიანები ვინც ამბობენ, რომ არიან ქართული ოცნების წევრები, არ არის ქართული ოცნების წევრები. ქართული ოცნების წევრი არის 136 დელეგატი, რომელიც გადმომცა მე პოლიტსაბჭომ. ამათ გარდა მე სხვა ქართული ოცნების წევრები არ ვიცი” – უთხრა ავთანდილ ბერიძემ ინტერპრესნიუსის ჟურნალისტ ნინო ხოზრევანიძეს.
ამის შემდეგ ავთანდილ ბერიძემ ჟურნალისტებს რჩევა მისცა, როგორ გადაამოწმონ ინფორმაცია. “მე ყოველთვის სიმართლეს ვიტყვი, მაგრამ თქვენ ჩავარდებით უხერხულ მდგომარეობაში” – დასძინა ბერიძემ.
“ის რაც მე ინტერპრესნიუსს მივაწოდე ეს ჩემი სიტყვები არ არის. მე მომიტანეს ხელმოწერილი განცხადება და დავწერე. თუ პასუხი გაქვთ გასაცემი გაეცით. გაჩვენებთ განცხადებას” – უპასუხა ნინო ხოზრევანიძემ უმაღლესი საბჭოს თავმჯდომარეს.
“არ ვიცი ვინ არიან. რომ მაჩვენებთ, კიდევ ერთხელ დაგიდასტურებთ, რომ ეს ადამიანები არ არიან იმ 136 დელეგატს შორის” – თქვა ბერიძემ. პრესკონფერენციის დასრულების შემდეგ ინტერპრესნიუსის ჟურნალისტმა უმაღლესი საბჭოს თავმჯდომარეს განცხადება აჩვენა, რის შემდეგაც ბერიძემ ქართული ოცნების 2 დელეგატი აღმოაჩინა, სხვების პარტიის წევრობა კი არ დაადასტურა.
ნინო ხოზრევანიძემ ავთანდილ ბერიძეს სთხოვა, რომ მისთვის მატყუარა აღარა დაეძახა და ჟურნალისტის საქმიანობაში არ ჩარეულიყო. ბერიძესა და ხოზრევანიძეს შორის დავა რამდენიმე წუთი გაგრძელდა. კამათს “აჭარის ტელევიზიისა” და “ტელეარხი 25”-ის ოპერატორები იღებდნენ.
უმაღლესი საბჭოს პრესსამსახურის ხელმძღვანელმა მარინა კუპრეიშვილმა აჭარის ტელევიზიის ოპერატორს მინდია კუპრაძეს უთხრა “რას აკეთებ მინდია. ხვალ ტელევიზიის სტატუსი განისაზღვრება და გაგიხსენებენ ამას”. ოპერატორს აჭარის ტელევიზიის ჟურნალისტი მარინა ბოლქვაძე გამოესარჩლა. კუპრეიშვილის წყრომა მარინა ბოლქვაძესაც ხვდა წილად.
ავთანდილ ბერიძის მხრიდან ჟურნალისტების მიერ მომზადებულ მასალებზე ტყულის და ჟურნალისტისათვის მატყუარას დაძახება პირველი შემთხვევა არ არის. ბერიძემ “გურია ნიუსის” მასალაში, რომელშიც აჭარაში ნეპოტიზმით დანიშვნების შესახებ იყო საუბარი, მოყვანილ ფაქტებს ტყული, ხოლო ჟურნალისტს მატყუარა უწოდა.
