გამოქვეყნდა სახელმწიფო აუდიტის სამსახურის მიერ ჩატარებული, ოზურგეთის მუნიციპალიტეტის 2019-2020 წლების შესაბამისობის აუდიტის ანგარიში.
მკითხველებს შევახსენებთ, რომ მიუხედავად ჩვენი არაერთგზის მცდელობისა, ოზურგეთის მუნიციპალიტეტის მერიაში წინასწარ არ მოგვცეს აუდიტის მასალები. გვპასუხობდნენ, რომ სახელმწიფო აუდიტი თავად გამოაქვეყნებდა საკუთარ ვებგვერდზე ამ ანგარიშს. სოციალურ ქსელში კი, არაერთი მოქალაქე გვისვამდა კითხვას, რატომ არ ვაქვეყნებდით ამ ანგარიშს და არ ვახდენდით მის შეფასებას.
გამოქვეყნების შემდეგ, ჩვენ გავეცანით ამ ანგარიშს და მის შინაარსს ვაწვდით ჩვენს მკითხველებს.
ანგარიშში საუბარია ოზურგეთის 2019-2020 წლის ბიუჯეტის არასწორ დაგეგმვასა და ხარჯვაზე, უკონტროლო ნაშთზე, რომელიც აუთვისებელი დარჩა.
ეს ნაშთი შეადგენს 7, 615.3 ათას ლარს. მუნიციპალიტეტმა დაგეგმა ნაშთის მნიშვნელოვანი ნაწილის _ 7 611.2 ათასი ლარის გამოყენება. 2019 წლის ნაშთის ცვლილებებით გამოწვეულმა ფულადი სახსრების გამოყენებამ (კლებამ) შეადგინა 1 945,5 ათასი ლარი და წლის ბოლოს დაფიქსირდა 5 669.8 ათასი ლარის ნაშთი. აღნიშნული ფულადი სახსრებიდან 2 845.2 ათასი ლარი სხვადასხვა გარდამავალი და დაუსრულებელი ინფრასტრუქტურული პროექტის შედეგად წარმოიქმნა, ხოლო დანარჩენი _ 2, 842.6 ათასი ლარი თავისუფალი ნაშთია. აქვე ნათქვამია, რომ მუნიციპალიტეტმა 2019-2020 წლებში ვერ უზრუნველყო ბიუჯეტით დაგეგმილი ინფრასტრუქტურული პროექტების დროულად დასრულება და დააგროვა არსებითი მოცულობის ნაშთი.
რასაკვირველია, უკონტროლო ნაშთის დაგროვება უარყოფითად წარმოაჩენს მერიის საქმიანობას, თუმცა, როგორც ვხედავთ, ეს თანხა დიდი მოცულობის არაა და ალბათ, უფრო მნიშვნელოვანია მიზეზზე ყურადღების გამახვილება და იმის შესწავლა _ რატომ მოხდა ეს?
აუდიტის მასალებში საუბარია სახელმწიფო შესყიდვების მართვაში არსებული რისკების შესახებ. ნათქვამია, რომ ავტოსატრანსპორტო საშუალებების შესყიდვისას გამოვლინდა რისკი, რომ ტენდერში მონაწილე პრეტენდენტები, მეტი სარგებლის მიღების მიზნით, მოქმედებდნენ ურთიერთშეთანხმებით. მერიამ ხელშეკრულება გააფორმა მაღალი ფასის წარმომდგენ პრეტენდენტთან, რითაც 87.4 ათასი ლარი დაკარგა.
ამ საკითხების ირგვლივ, “გურია ნიუსმა” კითხვები დაუსვა კონსტანტინე შარაშენიძეს. კონკრეტულად კი, რატომ გაუფორმა უფრო მაღალი ფასის წარმომდგენს ხელშეკრულება.
მან განაცხადა, რომ თავის გუნდთან ერთად, ნებისმიერ საკითხს დამაჯერებელ პასუხს გასცემს და პასუხს აგებს, თუ ვინმეს რამეში ეჭვი ეპარება.
_ ზოგადად, აუდიტიც ვარაუდის დონეზე წერს. ის სადამსჯელო ორგანო არაა და სამართლიანად მიმაჩნია, რომ მითითებები აქვს ნაკლოვანებებსა და ხარვეზებზე. ამის გარეშე ვერც ვერავინ იმუშავებს. როდის აქებდა ვინმეს აუდიტი?! ის ანგარიშში სავარაუდო დასკვნებს აკეთებს. რა ნახეთ იქ საკვირველი? სადმე კორუფციულ გარიგებებზეა საუბარი? რაც შეეხება ზოგ ყბადაღებულ საკითხს, მაგალითად, სახელმწიფო შესყიდვების ანუ ტენდერის დროს, თითქოს, ავტოტექნიკის შეძენისას უსაფუძვლო დისკვალიფიკაცია მოხდა, აქ კარგად მაინც არაა გათვალისწინებული შემდეგი: სატენდერო პირობებში მოთხოვნილი იყო სატრანსპორტო საშუალება, გამართული ქარხანა დამამზადებლის, ძრავის ტიპის და სხვა პარამეტრების მითითებით. დისკვალიფიცირებული მონაწილის მიერ შემოთავაზებული ავტოტექნიკა ვერ პასუხობდა ამ და სხვა მოთხოვნებს, რომლის შესყიდვის შემთხვევაში, მის სატენდერო მოთხოვნებთან შესაბამისობაში მოყვანას, უფრო მეტი თანხა დასჭირდებოდა, ვიდრე იყო ფასთასხვაობა. მოკლედ, ძალიან მარტივად რომ ვთქვათ “ზაპოროჟეცის” ყიდვას, “გაზ 24”-ის ყიდვა ვამჯობინე. მეტი თანხა უხარისხოში ხომ არ გადამიხდია? მაღალი გამავლობის ტრანსპორტი რომ უმჯობესია, ამას კითხვა უნდა? _ გვითხრა შარაშენიძემ.
“ინფრასტრუქტურული პროექტების დაგეგმვაში, შესრულებასა და კონტროლში არსებული სისუსტეების შედეგად, 3 984 ათასი ლარის ღირებულების ინფრასტრუქტურული პროექტების ნაწილი დაზიანებულია”, _ ნათქვამია დასკვნაში.
ნათქვამია ასევე, რომ მოსახლეობის წყალმომარაგების კუთხით, მუნიციპალიტეტში გახორციელებული ღონისძიებები არასაკმარისად არის მიჩნეული და გაწეულია მხოლოდ 1 084.6 ათასი ლარის ხარჯი. მოსახლეობის უმეტეს ნაწილს კი წყალი არ მიწოდება.
ფინანსური რესურსების მართვაში არსებული ხარვეზები, ანგარიშში მითითებულია შემდეგი ფაქტობრივი გარემოებებით: ბიუჯეტის შესრულების ანგარიშებზე დაყრდნობით. კერძოდ, 2019-2020 წლებში მუნიციპალიტეტის შემოსულობებმა 78 236.8 ათასი ლარი შეადგინა. ხოლო გადასახდელებმა 83 236.8 ათასი ლარი.
აუდიტის ანგარიშში საუბარია სამშენებლო მასალების გადაცემაში არსებულ ხარვეზებზე. გამოვლენილია, რომ ოზურგეთის მუნიციპალიტეტმა 2019-2020 წლებში, 19 ხელშეკრულების ფარგლებში შეისყიდა 1 298.9 ათასი ლარის ღირებულების სხვადასხვა სახის სამშენებლო მასალა. ის გადაეცა 338 მოსახლეს. მოსახლეობას კი სარეაბილიტაციო სამუშაოები თავად უნდა შეესრულებინა. დათვალიერების შემდეგ გამოვლინდა, რომ ხშირ შემთხვევაში, მასალები დასაწყობებული იყო და 228 ოჯახიდან 90 ოჯახს არ გამოუყენებია 193.3 ათასი ლარის მასალა. ხოლო მძიმე პირობებში მყოფი 110 ოჯახიდან 45 ოჯახს არ გამოუყენებია 152.6 ათასი ლარის ღირებულების მასალა.
აუდიტის სამსახური მიმართავს მერიას, რომ შეისწავლოს დასაწყობებული მასალების მდგომარეობა და გაატაროს ღონისძიება, მისი შემდგომი გამოყენების მიზნით.
“გურია ნიუსისთვის” ცნობილია, რომ როგორც გასულ საანგარიშო პერიოდში, ისე წინა ხელისუფლებების დროს, იყო ფაქტები, როცა მოსახლეობის არაერთი წარმომადგენელი ასაწყობებდა სხვადასხვა სახის მასალას, რომ შემდეგ სახლი დაედგა! ზოგმა კი ასეთი დახმარებით მიღებული მასალა გაყიდა! ჩვენ ამის შესახებ ვწერდით, თუმცა, ყურადღება არავის მიუქცევია!
აუდიტის ანგარიშში საუბარია უნებართვო მშენებლობებზე, აღნიშნულ პერიოდში. უნებართვო მშენებლობისთვის გამოვლინდა და დაჯარიმდა 42 პირი. მერიამ გამოავლინა უნებართვო მშენებლობის 28 შემთხვევა და შესაბამისი პირები დააჯარიმა ობიექტის სამუშაოების დასრულების ეტაპზე ან მაშინ, როცა მშენებლობა დასრულებული იყო და ობიექტი ფუნქციონირებდა.
აუდიტის ანგარიშში, ასევე, მითითებულია ავტოპარკის რაოდენობასთან და საწვავთან დაკავშირებული ნაკლოვანებები. 2019-2020 წლებში მუნიციპალიტეტმა გახარჯა 482.9 ათასი ლარის ღირებულების საწვავი. აუდიტის ჯგუფმა შეისწავლა ავტომობილებზე საწვავის ხარჯვის დოკუმენტაცია და გამოვლინდა 30 სატრანსპორტო საშუალებაზე, გადაჭარბებით საწვავის ჩასხმის 84 შემთხვევა. ავზის მოცულობასთან შედარებით შეუსაბამოდ მეტი ოდენობის საწვავის ჩასხმის ფაქტი.
საგანგებოდ აღსანიშნავია, რომ აუდიტის ანგარიშში მითითებულია საკრებულოს წევრებზე დაუსაბუთებლად ანაზღაურებულ ხარჯებზე. საკრებულოს წევრი, გარდა თანამდებობის პირისა, თავის უფლებამოსილებას ახორციელებს სამსახურებრივი საქმიანობისგან მოუწყვეტლად და უსასყიდლოდ. წარმოდგენილი ინფორმაციით, მუნიციპალიტეტის საკრებულოს თანამდებობის პირებს, 2019-2020 წლებში ხარჯების ანაზღაურების სახით მიღებული აქვს 235.2 ათასი ლარი. მუნიციპალიტეტმა ვერ წარმოადგინა დოკუმენტური მტკიცებულებები, საკრებულოს წევრების ხარჯების დასადასტურებლად! (თავად საკრებულოს წევრები, ყოფილი მერის მიმართ, კრიტიკის დროს, დღესაც ერთად და სოლიდარულად გამოდიან. ამ ფაქტს კი არასდროს ახსენებენ. ავტ.)
“აღსანიშნავია, რომ საკრებულოს წევრებზე ანაზღაურებულია დადგენილებით განსაზღვრული მაქსიმალური თანხები, რაც მიანიშნებს დაუსაბუთებლად თანხების გაცემას”, _ ნათქვამია ანგარიშში.
აუდიტის ანგარიშში ვრცლად არის საუბარი ა(ა)იპ და შპს-ების შესახებ, როცა დასაქმებულთა ფუნქცია-მოვალეობები არაა განსაზღვრული და გაურკვეველია. მაგალითად, ა(ა)იპ სპორტულ-გამაჯანსაღებელ დაწესებულებათა გაერთიანებაში, 2019 წელს დასაქმებული იყო სპორტული სექციების მონიტორინგის 58, 2020 წელს კი 61 სპეციალისტი. ხელფასზე კი დაიხარჯა 572.3 ათასი ლარი. აუდიტის ჯგუფმა ვერ მიიღო შესაფერისი რწმუნება, მონიტორინგი სპეციალისტთა მოცემული რაოდენობის საჭიროების შესახებ.
მსგავსი მდგომარეობაა თითქმის ყველა ა(ა)იპ ორგანიზაციაში.
აუდიტის ამ მითითების შემდგომ, ერთობ საინტერესო დასკვნის დაფიქსირება შეიძლება _ აღნიშნულ ა(ა)იპ ორგანიზაციებში თუ სსიპ-ებში კადრების დაკომპლექტებაზე და ე.წ. “გაბერილ” შტატებზე როცა საუბრობენ, აუცილებლად უნდა ითქვას, რომ ეს არის საქართველოს მუნიციპალიტეტების “ქრონიკული დაავადება” და ამის შესახებ ძალიან კარგად იციან თავად აუდიტორებმაც. ა(ა)იპ ორგანიზაციებში დასაქმება, შარაშენიძის მერობამდეც, გაცილებით ადრეც არსებობდა და მომდინარეობს წინა ხელისუფლებებისგან. ასეთ მემკვიდრეობის პრინციპს კი, მუდამ სასწრაფოდ ისრუტავს ყოველი შემდგომი ხელისუფლება და რთავს თავის საბრძოლო პოლიტიკურ არსენალში. პირდაპირ უნდა ითქვას, რომ ეს პირდაპირ კავშირშია არჩევნებთან! დამკვიდრებულია გაუკუღმართებული მიდგომა _ ხალხი, რომელიც არჩევნებში ეხმარება ამა თუ იმ კანდიდატს, და პოლიტიკურ ძალას, გამარჯვების შემდეგ ითხოვს “კუთვნილ” ადგილს ცის ქვეშ ანუ თანამდებობას. ეს ყველაფერი კი ბიუჯეტის ანუ გადასახადის გადამხდელების თანხაა და უმეტესად, როგორც თავად ხალხი ამბობს, იცემა მუქთახორებზე.
აუდიტის ანგარიშში, ასევე, მითითებულია სოციალური დახმარების გაცემაში არსებულ ხარვეზებზე, სურსათის განაწილებაში არსებულ ნაკლოვანებებზე, დასუფთავების მიუღებელ მოსაკრებლებზე.
აქვე საუბარია შიდა აუდიტის სამსახურის შემოწმების ანგარიშზე. რომ შიდა აუდიტმა 9 აუდიტორული შემოწმება განახორციელა, თუმცა, გამოვლენილი დარღვევებისთვის მერიას ყურადღება არ მიუქცევია.
ჩვენი მხრივ, აღვნიშნავთ, რომ “გურია ნიუსი”, გავრცელებული ინფორმაციის საფუძველზე, 2019-2020 წლებში, მუნიციპალიტეტის მერიის შიდა აუდიტის ხელმძღვანელს თხოვდა, გადმოეცა მასალები, თუმცა, მან ყოველთვის უარი გაგვიცხადა!
ამიტომ, ბუნებრივია, ჩნდება კითხვა, თუ ყოფილი მერი და მისი გუნდი დარღვევებით მუშაობდა, რატომ მალავდნენ ასეთ ფაქტებს?
ოზურგეთის მუნიციპალიტეტის 2019-2020 წლების საქმიანობის შესაბამისობის აუდიტის ანგარიშში, დოკუმენტში, რომელსაც კარგად გავეცანით, არ არის ნათქვამი, რომ მერიის საქმიანობაში არსებობს სერიოზული ხასიათის დარღვევები, რაც შეიძლება გახდეს სისხლის სამართლებრივი დევნის დაწყების საფუძველი (როგორც ამას დღეს არაერთხელ ახმოვანებენ მერიაში). დოკუმენტებში არ იკითხება კორუფციული ხასიათის, თანამდებობის ბოროტად გამოყენების გადაცდომები, თუმცა, არაერთხელ აპელირებენ კონკრეტული პირები. როგორც საზოგადოებაში ამბობენ და თავად შარაშენიძე აცხადებს, აუდიტის დასკვნაში საუბარია ნაკლოვანებებსა და ხარვეზებზე.
_ ვინც საუბრობს ან მიიჩნევს, რომ აქ სადმე კორუფციული გარიგებაა, ასე მოსაუბრეები კი უმეტესად უშუალოდ “ქართულ ოცნებასთან” თუ “ნაციონალურ მოძრაობასთან” აფილირებული და კავშირში მყოფი პირები არიან, მზად ვარ, ყველა კითხვას ვუპასუხო. პასუხს ვაგებ თითოეულ დეტალზე, _ ამბობს შარაშენიძე.
ავტორი
