(გურია ნიუსი, ჩოხატაური) _ ჩოხატაურის მუნიციპალიტეტის ხელმძღვანელობა და გურიის გუბერნატორის მოადგილე, ლაშა შაფაქიძე გასულ კვირას ზემოხეთსა და საჭამიასერს სტუმრობდნენ. მოსახლეობასთან შეხვედრის მთავარი მიზანი სოფლის პროექტების განხილვა იყო. ზემოხეთში ამ თემაზე საუბარს დაძაბულობის გარეშე არ ჩაუვლია _ ერთ უბანს წყალი უნდა, მეორეს _ გზა, მესამეს _ ბოძების გამოცვლა. თუმცა, უმრავლესობა თანხმდება მთავარზე _ სოფელში მისასვლელი გზა სასწრაფოდ შეკეთებას საჭიროებს. განსაკუთრებით კი, დამეწყრილი ადგილები.
შიდა გზების პრობლემაა საჭამიასერშიც. ამავე სოფლის მცხოვრებთა ნაწილს წყალმომარაგებაშიც სურს დახმარება.
ხელისუფლების თქმით, სოფლის პროგრამის ფარგლებში პრიორიტეტები მოსახლეობის მოთხოვნის შესაბამისად იქნება შერჩეული:
_ სოფლის რწმუნებულებმა ჩვენამდე ის პრიორიტეტები მოიტანეს, რომელიც სოფლის მიერ შეირჩა. ახლა, ჩვენ კიდევ ერთხელ ვამოწმებთ ამ ყველაფერს. პირისპირ ვხვდებით მოსახლეობას და მათგან ვიგებთ, რა არის აუცილებლად გასაკეთებელი სოფელში, _ აღნიშნა ჩვენთან საუბრისას ჩოხატაურის მუნიციპალიტეტის გამგებელმა, გია გიორგაძემ.
საკრებულოს თავმჯდომარის, ანტონ ხუნდაძის თქმით, ეს შეხვედრები ერთჯერადი არ არის: _ ხელისუფლება ყოველთვის მზადაა ხალხის მოსასმენად. შესაძლებელია, ყველა ოჯახის წევრი ვერ ვნახოთ, მაგრამ დამერწმუნეთ, მათი აზრი ჩვენთვის მნიშვნელოვანია. ახლა არც არჩევნებია და არც ხმებს ვაგროვებთ _ ჩვენ მხოლოდ ჩვენს მოვალეობას ვასრულებთ, _ გვითხრა ხუნდაძემ.
ჩოხატაურის ხელისუფლება სოფლის პროექტებზე სასაუბროდ ყველა სოფელში გეგმავს გასვლას.
