გუშინ იტალიის ნაკრების ყოფილმა ფეხბურთელმა დანიელე ადანიმ, რომელიც კომენტატორად და ჟურნალისტად საქმიანობს ხვიჩა კვარაცხელიას შესახებ ისაუბრა.
„კვარაცხელიას თამაშს ძალიან კარგად ვიცნობ. შემიძლია ვთქვა, რომ კიეზას მსგავსი მოთამაშეა. მას რამდენიმე პოზიციაზე შეუძლია თამაში: მარცხენა გარემარბი, მარჯვენა გარემარბი, ფორვარდი. ის გამანადგურებელია! ორივე ფეხით კარგად თამაშობს, მაღალი დონის ფეხბურთელია“.
დღეს, ესპანეთის საფეხბურთო პირველობის მორიგ ტურში გიორგი მამარდაშვილის „ვალენსია“ სტუმრად ბილბაოს „ატლეტიკს“ დაუპირისპირდება. გამოცემა „Eldesmarque“-ს მტკიცებით ქართველ კარის დარაჯს კვლავ „ვალენსიას“ ძირითად შემადგენლობაში ვიხილავთ.
„ნათელი და გარკვეული არის ის, რომ „ვალენსიას“ კარში კვლავ გიორგი მამარდაშვილს ვიხილავთ. თუ ბორდალასი „ატლეტიკთან“ წინა დაპირისპირებაში შესრულებულ გეგმას გამოიყენებს, ოთხმცველიან ტაქტიკაში ტიერი კორეიას, დიახაბის (ან გაბრიელ პაულისტას), ალდერეტესა და ხესუს ვასკესს (დისკვალიფიცირებულ გაიას შეცვლის) ვიხილავთ. რაც შეეხება ნახევარდაცვას, ფულკიე მარჯვნივ და ხილი მარცხნივ ითამაშებს. ცენტრში მორიბასა და სოლერს ვიხილავთ“.
„ატლეტიკისა“ და „ვალენსიას“ დღევანდელი დაპირისპირება თბილისის დროით 18 საათსა და 15 წუთზე დაიწყება.
გუშინ ფრანგულმა გამოცემამ „Le Parisien“ გაავრცელა ცნობა რომ საფრანგეთის ეროვნული გუნდის თავდამსხმელმა კილიან მბაპემ „პსჟ“-სთან ახალი ხელშეკრულების გაფორმებაზე თანხმობა განაცხადა. მბაპემ, მისი ოჯახის წევრებმა და პარიზული კლუბის პრეზიდენტმა ნასერ ალ ხელაიფმა ახალ კონტრქტზე პრინციპულ შეთანხმებას უკვე მიაღწიეს.
23 წლის შემტევი პარიზულ გუნდთან 2 წლიან ხელშეკრულებას მოაწერს ხელს, მისი კიდევ ერთი სეზონით გაგრძელების შესაძლებლობით. სანაცვლოდ სეზონში 50 მილიონ ევროს მიიღებს. ამას გარდა, კონტრაქტზე ხელმოწერის ბონუსის სახით, ფეხბურთელს დამატებით კიდევ 100 მილიონ ევროს გადაუხდიან.
გუშინ, უკრაინელი ძიუდოისტი ირინა კინძერსკა რუსეთის მიერ უკრაინაში მიმდინარე ინტერვენციას გამოეხმაურა. 30 წლის სპორტსმენმა ჰიტლერთან გაავლო პარალელი და აღნიშნა, რომ კარგი იქნება თუ პუტინი თვითმკვლელობით დაასრულებს სიცოცხლეს.
„რუსებს ვეხვეწებოდი, რომ გაევრცელებინათ და თანამემამულეებისთვის ეჩვენებიათ უკრაინაში განხორციელებული საომარი მოქმედებების, აფეთქებების კადრები. ისინი მპასუხობდნენ: „ირა, ჩვენ მშვიდობის მხარეს ვართ. თუ რაიმე გჭირდება, დაწერე, მაგრამ ჩვენ რა შეგვიძლია გავაკეთოთ? ერთი კვირის შემდეგ მათთან მიმოწერა შევწყვიტე, წავშალე ყველა ჩემი რუსი მეგობრის ნომერი, ისინი სოციალური ქსელიდან ამოვშალე. საბოლოოდ დავრწმუნდი, რომ დამპალი ხალხია, მათთან საერთო არ უნდა მქონდეს. პუტინი პატარა ბავშვივითაა, რომელსაც სათამაშო იარაღი აქვს, ყველას აშინებს. უკეთესი იქნება, იარაღი პირში ჩაიდოს და მოიქცეს ისე, როგორც ადოლფ ჰიტლერი. პუტინს სხვა გამოსავალი არ აქვს. უკრაინა დამოუკიდებელი სახელმწიფოა, რომელიც საკუთარ მომავალს თავად გადაწყვეტს“.
თავად რუსეთის სპორტულ სამყაროში დიდი სკანდალია. დიდი აჟიოტაჟი გამოიწვია ადგილობრივი მორბენლის საქციელმა, რომელიც ეკატერინბურგში გამართულ მარათონზე უკრაინის გერბიანი მაისურით წარსდგა. ეს პიროვნება მორბენალი ალექსანდრ ანტონოვი გახლავთ, რომელმაც ზემოთ ნახსენებ მარათონში მეორე ადგილის დაკავება შეძლო. ამ დღეებში რუსეთში, სპორტსმენის მიმართ ლანძღვა-გინების „სახალხო მოძრაობა“ მიმდინარეობს.
„თავს საოცარი შეურაცხყოფა დამატყდა. ათასობით კომენტარი მივიღე და მათი წაკითხვა არც მიფიქრია, პირდაპირ დაბლოკვა დავიწყე. ცხადია, მათ შორის ბევრი ბოტი იყო, თუმცა, ნამდვილი ადამიანებიც ბევრნი იყვნენ. საოცრებებს წერდნენ. „მოკვდი, საზიზღარო“, – ეს, ალბათ, ყველაზე მსუბუქი გამოხმაურებაა. ასეთ მასშტაბს ნამდვილად არ ველოდი. მე ხაზს ჩემს სპორტულ მიღწევას ვუსვამდი, მათ კი სულ სხვა რამ აინტერესებდათ“, – განაცხადა ანტონოვმა.
თავის მართლება მოუხდა მარათონის ორგანიზატორსაც:
„მან ქურთუკი გარბენის დაწყებამდე 1-15 წამით ადრე გაიხადა. რასაკვირველია, ამის შესახებ სადაც საჭიროა, იქ ვაცნობეთ. სხვა რა უნდა მექნა? მას ძალოვნებმა უნდა მიხედონ. ჩვენს შეჯიბრს პოლიტიკასთან არანაირი კავშირი არ აქვს“.
მომავალ დღეებში ალექსანდრ ანტონოვს კარგი არაფერი ელის. იმ კანონების გათვალისწინებით, რომლებიც რუსებმა უკრაინაში დაწყებული ომის შემდეგ შემოიღეს, არაა გამორიცხული, მორბენალს ხანგრძლივი პატიმრობა შეუფარდონ.
ავტორი
