“ნოსტალგია” “იმედს” მეგობრობას სთავაზობს

სათნოების სახლში “კათარზისი” პენსიონერები არა მხოლოდ საკვებსა და ჰუმანიტარული დახმარებებს, არამედ სულიერ საზრდოსაც იღებენ. გვესაუბრება “კათარზისთან” არსებული თეატრის “ნოსტალგია” სამხატვრო ხელმძღვანელი ილო ნიშნიანიძე.

_ როცა აქ დავიწყე მუშაობა, არ მეგონა, თუ ასეთი საინტერესო იქნებოდა პენსიონერ ადამიანებთან ურთიერთობა. დღეს კი, სხვაგან რომ გადავიდე სამუშაოდ, ამ ხალხის გარეშე ძალიან გამიჭირდება.

_ როგორც ვიცით, თქვენს თეატრში მოყვარულები არიან გაერთიანებულნი.

_ თეატრში 18 სცენისმოყვარეა გაერთიანებული. თითოეულ მათგანს საკუთარი როლისადმი ინდივიდუალური მიდგომა აქვს. არაჩვეულებრივი ადამიანები არიან, პასუხისმგებლიანები, როლზე სერიოზულად მუშაობენ. პერსონაჟი რომ სცენაზე გააცოცხლო, ამისთვის, პროფესიონალიზმთან ერთად, ცხოვრებისეული გამოცდილებაცაა საჭირო, რაც ამ ადამიანებს ნამდვილად აქვთ. ამიტომაცაა მათ მიერ შესრულებული როლები საინტერესო და დასამახსოვრებელი.

_ თეატრში ყველაზე უხუცესი რამდენი წლისაა?

_ ყველაზე უხუცესი 93 წლის პენსიონერია, რომელსაც მშვენიერი მეტყველება და მეხსიერება აქვს. მისი ყოველი გამოსვლა სცენაზე მაყურებლის დიდ ოვაციებს იწვევს.

_ თეატრის რეპერტუარზე რას გვეტყვით?

_ რეპერტუარში, ძირითადად, გვაქვს ქართველი დრამატურგების ნაწარმოებები. ამჟამად დავდგით აკაკი დევიძის პიესა “გამოკეტილი ჭიშკარი”. ეს სპექტაკლი ნოდარ დუმბაძის სახელობის მოზარდ მაყურებლისა და მარჯანიშვილის სახელობის თეატრში წარმოვადგინეთ, დიდი წარმატება ხვდა წილად. სპექტაკლი დავდგით ასევე საქართველოს სხვადასხვა რეგიონში, სადაც ყოველთვის დიდი სიყვარულით გვხვდებიან. აქვე მინდა აღვნიშნო, რომ ჩვენს თეატრს შეფობას უწევს ნ. დუმბაძის სახელობის თეატრი. ახლახან ოპერისა და მარჯანიშვილის თეატრებმა გადმოგვცეს დეკორაციები, რეკვიზიტები, ჩაცმულობა. დღეისთვის თეატრი “ნოსტალიგია” საკმაოდ მაღალი დონის შემოქმედებით ჯგუფს წარმოადგენს. ჩვენთან წარმატებით მუშაობს სიმღერის ანსამბლი და ლიტერატურული წრე. პენსიონერები საოცარი აღმაფრენით კითხულობენ გალაკტიონ ტაბიძის, ანა კალანდაძის, მურმან ლებანიძისა და სხვა გამოჩენილი ქართველი პოეტების ლექსებს. ხშირად დავდივართ სკოლებში, ინსტიტუტებში, სადაც მონაწილეობას ვიღებთ საქველმოქმედო კონცერტებში.

_ ჩოხატაურშიც ფუნქციონირებს პენსიონერთა კლუბი “იმედი”, რომელიც ახალი შექმნილია და სამომავლოდ მრავალი საინტერესო გეგმა აქვს.

_ ამ კლუბის შესახებ მსმენია. იმედი მაქვს, რომ ის უფრო აქტიურად იმუშავებს, ადგილობრივი ხელისუფლების და კეთილი ადამიანების თანადგომით. ჩვენც მეგობრობას გთავაზობთ _ დიდი სიამოვნებით ჩამოვალთ ჩოხატაურში და ჩავატარებთ როგორც კონცერტს, წარმოვადგენთ სპექტაკლებს. ვიმეგობროთ, ვითანამშრომლოთ და ერთად ვიზრუნოთ უფროსი თაობის სიცოცხლის გახანგრძლივებისთვის.