ოზურგეთის რაიონში მშენებარე ბახვი 3 ჰესი კომპანია “ბახვი ჰაიდრო პაუერის ” მფლობელობაშია. სახელწიფო პროგრამის “განახლებადი ენერგია 2008” ფარგლებში, საქართველოს მთავრობის მიერ გამოცხადებული ინტერესთა გამოხატვის კონკურსში გამარჯვების შემდეგ, 2009 წელს ენერგეტიკის სამინისტროსა და თურქულ კომპანია KGM-სს შორის მემორანდუმი გაფორმდა. დოკუმენტის საფუძველზე KGM-სსა და მის შვილობილ ქართულ კომპანიებს ოზურგეთის რაიონში მდინარე ბახვისწყალზე კასკადური ტიპის მცირე და საშუალო ჰესების – ბახვი 1, ბახვი 2, ბახვი 3 და ბახვი 5-ის მშენებლობის, ოპერირებისა და მფლობელობის უფლება მიენიჭათ. თურქული KGM საქართველოში ორი შვილობილი კომპანიის – “ბახვი ჰაიდრო პაუერი”-სა და „KG Energi“-ს მფლობელია.
გასული წლის სექტემბერში ბახვი 3 ჰესის მიმდებარე ტერიტორიაზე მთა ჩამოიშალა, რამაც ჰესის მთავარი სამანქანე დანადგარების შენობა გაანადგურა. ზარალმა 2 მილიონ დოლარს გადააჭარბა. “ბახვი 3-ის“ მშენებლობის დროს მეწყერი ჩამოწვა და შენობა-ნაგებობები დააზიანა, ამიტომ ინვესტორი მშენებლობას დროულად ვერ ასრულებს, ვთანხმდებით, რომ ჰესის ექსპლუატაციის ვადამ 1 სექტემბრამდე გადაიწიოს“, – განაცხადა კახა კალაძემ მთავრობის სხდომის დაწყებამდე.
„ბახვი ჰაიდერ პაუერსის“ ხელმძღვანელობა გასული წლის მიწურულს გეგმავდა, რომ სამშენებლო სამუშაოების შესრულებას 2013 წლის ივნისის, ან ივლისის თვეში დაასრულებდა, თუმცა ფაქტია, რომ ამ ვადებში ჰესის ექსპლუატაციაში შესვლა ვერ ესწრება. დღევანდელ მთავრობის სხდომაზე მინისტრთა კაბინეტი 32 საკითხს განიხილავს. აქედან ერთ-ერთი საკითხი, რომელზეც მინისტრები იმსჯელებენ საქართველოს მთავრობასა და შპს „ბახვი ჰაიდრო პაუერსს“ შორის 2009 წლის 14 მაისს დადებულ ურთიერთგაგების მემორანდუმში ცვლილებების შეტანას ითვალისწინებს.
