ამ პროექტის გახორციელება წინა მთავრობამ დაიწყო და მაშინვე ყველა დოკუმენტი დახურა. ახალმა მინისტრთა კაბინეტმა კი მისი გასაჯაროვების გადაწყვეტილება დღეს გამართულ მთავრობის სხდომაზე მიიღეს.
წინა ხელისუფლების გადაწყვეტილებით, საქართველოს ახალი მთავრობის კანცელარიის ადმინისტრაციული შენობის სამშენებლო-სარეაბილიტაციო სამუშაოებისთვის 2012 წლის ბიუჯეტიდან 26 მლნ ლარი იყო გათვალისწინებული. პრემიერ-მინისტრის ადმინისტრაციული შენობა ათონელის ქუჩაზე, ყოფილი ამერიკის საელჩოს ტერიტორიაზე უნდა განთავსებულიყო.
“საბოლოო გადაწყვეტილება მიღებულია. პრემიერ-მინისტრის ადმინისტრაცია ახალ შენობაში აღარ იქნება. აქედან გამომდინარე, მასზე აღარ ვრცელდება საქართველოს საიდუმლოებების შესახებ კანონით გათვალისწინებული შეზღუდვები. დღეიდან გვაქვს საშუალება, რომ ამ საკითხზე ღიად ვისაუბროთ. საქართველოს მთავრობის კანცელარიას და პრემიერ მინისტრს არ აქვს ფუფუნება და სურვილი, რომ 26 მილიონიან ახალ შენობაში მოეწყოს, მაშინ, როდესაც არსებობს კანცელარიის შენობა… ვხედავთ, რომ კანცელარია ტექნიკურად საუკეთესო მდგომარეობაში არ არის. ძველი ნაგებობაა, მაგრამ ვთვლით, რომ ამ შენობაში სრული ინფრასტრუქტურაა იმისთვის, რომ ვიმუშაოთ,” _ განაცხადა საქართველოს მთავრობის კანცელარიის უფროსმა მაია ცქიტიშვილმა.
პროექტის მიხედვით, ყოფილი ამერიკის საელჩოს შენობის უკან 7-სართულიანი ახალი ნაგებობა უნდა აშენებულიყო. ამისთვის ტერიტორია წინა მთავრობამ შეიძინა. ძველ შენობაში კი, იქ სადაც ამერიკის შეერთებული შტატების საელჩო იყო განთავსებული, პრემიერ-მინისტრის რეზიდენციის შესასვლელი უნდა მოწყობილიყო. ის გათვალისწინებული იყო პრემიერ-მინისტრის მიღებებისთვის. პროექტის მიხედვით, პრემიერს და მთავრობის კანცელარიის ადმინისტრაციას 7-სართულიან შენობა უნდა დაეკავებინა. ძველი და ახალი ნაგებობა კი ერთმანეთზე იქნებოდა გადაბმული. ამ ეტაპისთვის ახალი შენობის მხოლოდ 2 სართულია აშენებული.
“საზოგადოება შეაფასებს რამდენად იქნებოდა მშენებლობა მისაღები იმ ისტორიული ნაწილისთვის. ჩვენ მშენებლობა შევაჩერეთ,” – ამბობს მაია ცქიტიშვილი.
სამშენებლო-სარეაბილიტაციო სამუშაოების შესასრულებლად, ხელშეკრულება, 2012 წლის თებერვალში შპს “არტესსთან” გაფორმდა. ამ ხელშეკრულებით კომპანიას 21 მლნ ლარის სამუშაოები უნდა შეესრულებინა. ყველაზე გასაკვირი კი ის ფაქტია, რომ ხელშეკრულების თანახმად, “არტესს” სამშენებლო-სარეაბილიტაციო სამუშაოები 2012 წლის სექტემბერში უნდა დაესრულებინა. მოგვიანებით, გაიზარდა როგორც პროექტის ღირებულება, ისე ვადა. პრემიერ-მინისტრის რეზიდენციისთვის 26 მლნ ლარი გაიწერა, ვადად კი, 2013 წლის 1 იანვარი განისაზღვრა.
შპს “არტესს” სამშენებლო-სარეაბილიტაცია სამუშაოებისთვის 16 მლნ ლარი აქვს ჩარიცხული. “დოკუმენტაცია საგამოძიებო სტრუქტურებს გადაეცა. ვისაც გვქონდა საშუალება, რომ ეს დოკუმენტები გვენახა, ბუნებრივია, ბევრი კითხვა გვაქვს. ამ საკითხს შესაბამისი სტრუქტურები შეისწავლიან, ასევე ფინანსისტები, მშენებლობის სპეციალისტები და ა.შ. არის თუ არა 16 მლნ სრულად ათვისებული, რამდენად საჭირო იყო სერიოზული გარანტიების გარეშე 16 მლნ ლარის წინასწარ გადახდა და ა.შ. ამ დეტალებს ახლა ვადგენთ,” _ განაცხადა საქართველოს მთავრობის კანცელარიის უფროსმა.
რა ბედი ეწევა ამერიკის საელჩოს ყოფილ შენობას, ეს მთავრობას ჯერ გადაწყვეტილი არ აქვს.
“ამ ეტაპზე ვმსჯელობთ, თუ რა ახალი ფუნქცია შეიძლება ჰქონდეს შენობას, რომელსაც რეკონსტრუქცია ნაწილობრივ ჩაუტარდა. ალბათ, გასხვისება მოხდება და შენობა სხვა ფუნქციას შეიძენს,” _ გვითხრა მაია ცქიტიშვილმა.
რაც შეეხება კომპანია “არტესს”; ფაქტები მოწმობს, რომ ის წინა ხელისუფლების ფავორიტი კომპანიაა.
სახელმწიფო შესყიდვების სააგენტოს თავმჯდომარემ, გასული წლის მაისში კვალიფიციურ მიმწოდებელთა რეესტრი ე.წ “თეთრი სია,” შექმნა, რომელშიც ივლისის მონაცემებით, 4 კომპანია მოხვდა: ეს კომპანიები ხელისუფლების მიერ გამოცხადებული მრავალმილიონიანი ტენდერების მუდმივი გამარჯვებულები იყვნენ. ერთ-ერთი მათგანი სწორედ შპს “არტესია”.
“არტესი” რომ ხელისუფლების ფავორიტი კომპანია იყო, ამის შესახებ “გურია ნიუსი” ჯერ კიდევ გასული წლის ივლისში წერდა. იმ მომენტისთვის, კომპანიის მიმდინარე პროექტები იყო ქუთაისის ცენტრალური მოედნის რეაბილიტაცია. აღსანიშნავია, რომ “არტესმა” ქუთაისის ცენტრალური მოედნის რეაბილიტაციის გახორციელება ტენდერის დასრულებამდე დაიწყო; ბორჯომში, 9 აპრილის ქუჩის რეაბილიტაცია; ახალციხეში რაბათის ისტორიული ძეგლის რეაბილიტაცია; თბილისში მარჯანიშვილის ქუჩის რეაბილიტაცია; თბილისში კალაუბნის რეაბილიტაცია; თბილისში ზაარბრიუკენის მოედნის რეაბილიტაცია; მცხეთაში მუნიციპალიტეტისა და სამხარეო ადმინისტრაციის შენობის რეაბილიტაცია….
გასული წლის ივლისისთვის, შპს “არტესს” დასრულებული ჰქონდა 50-მდე პროექტი. მათ შორის: ახალციხეში ციხე-სიმაგრის რეაბილიტაცია, ასევე ჟვანიას სახელობის პედიატრიული კლინიკის რეაბილიტაცია და ცენტრალური რკინიგზის საავადმყოფოს რეაბილიტაცია; ბორჯომის ცენტრალური პარკის რებილიტაცია; მცხეთის ისტორიული უბნების რეაბილიტაცია; აღმაშენებლის გამზირის რებილიტაცია; სიღნაღის რეაბილიტაცია; ბორჯომის ბალნეოლოგიური სანატორიუმის რეაბილიტაცია და ა.შ.
ამას გარდა, საქართველოს მთავრობის განკარგულებების საფუძველზე, საქართველოს კულტურის, ძეგლთა დაცვისა და სპორტის სამინისტროს, საქართველოს მთავრობის სარეზერვო ფონდიდან 2009-2010 წლებში გამოეყო 3 850 000 ლარი. ეს თანხა თბილისში, ქაქუცა ჩოლოყაშვილის ქუჩაზე მდებარე საცურაო კომპლექს “ოლიმპიკის” სრული სამშენებლო-სარეაბილიტაციო სამუშაოების ჩატარებაზე დაიხარჯა, რომელიც შპს “არტესმა”განახორციელა.
ასე გამოიყურებოდა მთავრობის კანცელარიის ახალი შენობის მაკეტი
