“თბილისელებმა პასუხი უკვე გასცეს უგულავას და “ნაცმოძრაობის” უუნარო გუნდს”

ამ საკითხებზე სასაუბროდ “გურია ნიუსი”  თბილისის საკრებულოს  ფრაქცია “ქართული ოცნება–დემოკრატიული საქართველოს”  თავმჯდომარეს  ზაზა გაბუნიას დაუკავშირდა.

– ნაციონალურმა მოძრაობამ 19 აპრილს დაანონსებულ აქციასთან ერთად გუშინ ახალი აქცია დააანონსა –”არ დავუთმოთ თბილისი ბიძინა ივანიშვილს“ და მხარდამჭერებს შეკრებისკენ მოუწოდა. როგორ ფიქრობთ, ხომ არ ემზადება “ნაციონალური მოძრაობა” ამ აქციით პერმენენტული გამოსვლებისთვის?

– მე მაქვს შეკითხვა ამ სრულიად არასერიოზული სახელწოდების აქციის ორგანიზატორებთან – რა დათმეთ თქვენი ნებით? რაზე თქვით უარი ნებაყოფლობით? თბილისელებმა  პასუხი უკვე გასცეს  უგულავას და მის უუნარო გუნდს, როცა “ნაცმოძრაობა” თბილისის აბსოლუტურად ყველა რაიონში დამარცხდა, ამიტომ ეს აქციები არის პროვოკაციისთვის გამიზნული ქმედებები, რადგან პოლიტიკურ ნაწილში ისინი უკვე დამარცხებულები არიან.

– უგულავამ ვანო მერაბიშვილს მოადგილეობა შესთავაზა. როგორი იქნება ხალხის რეაქცია 7 ნოემბრის და 26 მაისის შემდეგ ეს ადამიანი ამ პოსტზე იყოს?

– საქართველოს, ბოლო წლების მანძილზე, თავს მოხვეული, საზოგადოებისთვის მიუღებელი ლიდერები მართავენ. ეს მანამდე გაგრძელდება, სანამ “ნაციონალურ მოძრაობას” ექნება რაიმე სახის ძალაუფლება ქვეყანაში.

– იქნებ ეს კოჰაბიტაციის შედეგია?

– არა, ეს ოქტომბრის თანმდევი პროცესია და არა ხალხის არჩევანი. მით უფრო, რომ “ნაცმოძრაობას” არ შეუძლია იყოს კოჰაბიტაციურ ანუ კონსტრუქციულ რეჟიმში. ამ მოძრაობას წარმატებით შეუძლია “კმარას” ტიპის აქტივობა, ფინანსური მაქინაციების გზით საბიუჯეტო ფულის ან კერძო საკუთრების მისაკუთრება და მოჩვენებითი პიარ – ფასადური პროექტების განხორციელება. არც ერთი მათგანი არ არის ნორმალური და არ ცნობს კოჰაბიტაციის წესიერი ქცევის სტანდარტებს.

– უგულავას მისვლა  საგამოძიებო სამსახურში მისი მხარდამჭერების აქციის ფონზე მოხდება. როგორ ფიქრობთ, ხომ არ გამოიწვევს ეს რაიმე დაპირისპირებას მოქალაქეებს შორის?

– გუშინ, მთელი ღამის განმავლობაში ხდებოდა მერიისა და გამგეობების თანამშრომლების მობილიზაცია. დღეს კეთდება ნაც-დეპუტატების მხრიდან საეჭვო განცხადებები პოლიციის აქტივობის აუცილებლობაზე. როგორც ჩანს, 19 აპრილის მიტინგის თემამ დროში გადმოიწია. პროვოკაციები “ნაცმოძრაობის” მხრიდან გასაკვირი არ იქნება.

_ როგორ ფიქრობთ, დააკავებენ თუ არა დღეს უგულავას და რა იქნება ხვალ – რას მოიმოქმედებს „ნაციონალური მოძრაობა“ და ხომ არ დაიწყება პერმანენტული აქციები?

_ გიგი უგულავამ თბილისელებს შეუქმნა სატრანსპორტო, საცხოვრებელი და კომუნალური პრობლემები. უგულავას მრავალი მილიონი ემეტებოდა საკუთარი პარტიული მეგობრებისთვის და მხოლოდ 7000 ლარი უსახლკაროთათვის.  უგულავამ ფონდებისა და სხვა ფინანსური მაქინაციების გზით ბიუჯეტის ფული ფლანგა საკუთარი სიამოვნებისთვის. შეჭირვებული მოქალაქეების წერილებზეც კი არ ახდენდა რეაგირებას. ეს ყველაფერი ადასტურებს იმას, რომ დედაქალაქს არაკეთილსინდისიერი მერი ჰყავს, რომლის კვალი დანაშაულშიც იკვეთება და თუ დადასტურდა, დააკავებენ კიდეც, ხელშეუხებელი დამნაშავე არ უნდა არსებობდეს თუკი სამართლებრივი და ევროპული სტანდარტის სახელმწიფო გვინდა ავაშენოთ.

– რა მოყვება მის დაკავებას? გაჩერდება კი “ნაციონალურ. მოძრაობა“ თუ ისევ საერთაშორისო პიარ – სკანდალს ააგორებს?

– გამოძიება ძალიან დეტალურად, ნაბიჯ–ნაბიჯ სწავლობდა საქმეს, ასე რომ დასაბუთებული განაჩენის შემთხვევაში ვერანაირი საერთაშორისო სკანდალი ვერ აგორდება, რაც არ უნდა მოიმოქმედონ მისმა მხარდამჭერებმა და გუნდის წევრებმა.