“ფოთის სასამართლოს თავმჯდომარემ რევაზ ნადარაიამ, პროკურატურიდან მიიღო უწყება. რომელსაც მის მიერ 2009 წელს გამოტანილ განაჩენთან დაკავშირებით განმარტება მოსთხოვეს. კუბლაშვილის განმარტებით სახეზეა კონსტიტუციის 84-ე მუხლის დარღვევა, რაც ცალსახად მიუთითებს, რომ არავის აქვს უფლება მოსამართლეს პასუხი მოსთხოვოს მის მიერ განხილულ კონკრეტულ საქმესთან დაკავშირებით. მისივე განცხადებით, ამ საქმის პროკურორი ყოფილი მოსამართლეა, რომელიც „საგმირო საქმეების გამო” სასამართლოდან დაითხოვეს.”
იყო თუ არა პროკურატურის მხრიდან ზეწოლა და რატომ დაიბარეს ფოთის სასამართლოს თავმჯდომარე პროკურატურაში, ამასთან დაკავშირებით “გურია ნიუსს” სამეგრელო ზემო-სვანეთის პროკურორმა ვალერი იოსავამ განუცხადა:
“კოტე კუბლაშვილმა ასე განმარტა, მოსამართლეებს იბარებენ დასაკითხად და პროკურატურას ამის უფლება არ აქვსო. უზენაესი სასამართლო ამას რომ იტყვის… თან თქვა, რომ სასამართლო არ არის პროკურატურის წინაშე ანგარიშვალდებულიო. ჯერ ერთი, დასაკითხად ვიბარებთ, ანგარიშს არავინ თხოვს. ვითხოვთ ჩვენებას იმასთან დაკავშირებით, რომ ამნისტირებული პირი როგორ დააბრუნეს ციხეში. ამნისტია ნიშნავს იმას, რომ მსჯავრდებულს უშვებენ გარეთ. ამნისტიის შემდგომი განაჩენით, ამნისტირებული კაცი შეუშვეს ციხეში ყოველგვარი საბუთის გარეშე, უკანონო განაჩენით კაცი ზის ციხეში რამდენიმე თვე. ეს არის დანაშაული. ამ დანაშაულთან დაკავშირებით ვეძახით მოსამართლეს, მოვიწვიეთ, ვთხოვეთ, მობრძანდით მოგვეცით განმარტებაო.
სასამართლო პროცესზე მასთან ერთად იყო ასევე პროკურორი, რომელსაც გაეპარა ეს შეცდომა. შეცდომა გაეპარა თუ ეს იყო განზრახვით, აქ იმიტომ ვართ, რომ დავადგინოთ. დავკითხეთ პროკურორი და თქვა: რა ვქნა ბატონო, შემეშალა და რაც გინდათ ის მიყავითო. კონკრეტული საქმის ბრალმდებლები იყვნენ წულაია და წერეთელი, მოსამართლე იყო ნადარაია. რომელიც არ მოვიდა პროკურატურაში. რამდენად მართალია არ ვიცი. მაგრამ, მითხრეს თათბირი ჩაატარა თურმე კუბლაშვილმა ფოთის სასამართლოში და მოსამართლეებს უთხრა, მე სანამ ვიქნები ფეხი არ გაადგათ არც დასაკითხად და განმარტებაც არავის არ მისცეთო. ჩვენ ანგარიშვალდებული არ ვართ ჩვენება მივცეთ პროკურატურასო.”
