(გურია ნიუსი, ოზურგეთი) _ გასულ კვირას “გურია ნიუსი” დაინტერესდა, თუ ვინ იყო ჩაწერილი გივი შევარდნაძის ოჯახში. როგორც მკითხველმა იცის, ოზურგეთის მუნიციპალიტეტის სოფელ ასკანის მცხოვრებს, იმის გამო შეუწყვიტეს დახმარება, რომ სოცაგენტს სახლში არ დახვდა. “გურია ნიუსი” წერდა, რომ გივი შევარდნაძე ასკანაში ქოხის ტიპის საცხოვრებელში ცხოვრობს და მას უკვე მოკვეთეს მეორე ფეხი. ბატონი გივი ითხოვს ცხრა თვის აუღებელ კუთვნილ თანხას. მისი და, გულნარა შევარდნაძე ჩვენთან საუბრისას ამბობს, რომ ძმა მასთან ჩაწერა:
_ რა გვექნა? იმ ქოხში ცხოვრება არ შეიძლებოდა და გივი ხანდახან ჩემთან მიმყავდა. ცოტა უკეთესად რომ გახდებოდა, უკან ვაბრუნებდი. ერთ დღეს, სოცაგენტი იმ დროს მივიდა ჩემი ძმის ოჯახში, როცა ის სახლში არ იყო და დახმარებაც შეუწყდა. 2010 წლის ივნისის შემდეგ არ მიუღია დახმარება, ახლა კი ჩემთან ჩავწერე და აპრილიდან მივიღებთ დახმარებას. ისე, გვაინტერესებს, აუნაზღაურდება თუ არა ნაცდური _ 9 თვის დახმარება? 25 დღეა, მძიმე მდგომარეობაში ვართ _ ჩემი ძმა საავადმყოფოში წევს, ფული არ გვაქვს, სიმართლე რომ გითხრათ, ვმათხოვრობ.
_ ქალბატონო გულნარა, ამბობენ, რომ გივი შევარდნაძესთან ჩაწერილია ვინმე მანანა მინდაძე.
_ ტყუილია. ის ჩემი რძალია. გივი ძლივს ცხოვრობდა იმ სახლში და სხვას ვის ჩაწერდა?
სოციალური მომსახურეობის ოზურგეთის რაიონული განყოფილების უფროსი, ოთარ რევიშვილი ამბობს, რომ გივი შევარდნაძეს და მის დას მისთვის არ მიუმართავთ: _ ჩვენთან იმყოფებოდა გულნარა შევარდნაძე. სააგენტოს მისამართით მადლობები თქვა იმისთვის, რომ მის ოჯახს აღუდგა დახმარება. მისგან არ მოგვისმენია, რომ ცხრა თვის დახმარებას ითხოვენ. ჩემი რჩევაა, მოგვწეროს გულნარა შევარდნაძემ საკუთარი პრობლემის შესახებ და შევისწავლით საკითხს, _ გვითხრა რევიშვილმა.
