გუშინ, უნგრულ სპორტულ მასმედიაში გავრცელდა ცნობა, რომ საქართველოს ნაკრების თავდამსხმელი ბუდუ ზივზივაძე ზამთრის სატრანსფერო პერიოდში დიდი ალბათობით კლუბს შეიცვლის.
ქართველ შემტევს კლუბ „ფეჰერვართან“ კონტრაქტი სეზონის ბოლომდე აკავშირებს, მაგრამ ორი თვის წინ ის მთავარი გუნდიდან მოკვეთეს. შესაბამისად ზივზივაძის ამ გუნდში დარჩენა გამორიცხულია.
გუშინ, „ფეჰერვარის“ სპორტულმა დირექტორმა როლანდ იუჰაშმა ეს ინფორმაცია დაადასტურა და განაცხადა, რომ ქართველის ახალი კლუბის მოძებნაზე მუშაობა უკვე მიმდინარეობს.
„ვცდილობთ, მას ზამთარში კარიერის სხვაგან გაგრძელების საშუალება მოვუძებნოთ. იყო დისციპლინური გადაცდომა, რომელსაც ვერ მივიღებდით, ეს განვიხილეთ მასთან და მის აგენტთან, გადაწყვეტილებას მან პატივი სცა. ჩვენ ვეძებთ გამოსავალს მის მომავალთან დაკავშირებით“, – განაცხადა როლანდ იუჰაშმა.
ბუდუ ზივზივაძე მეორე გუნდში მას მერე დააქვეითეს, რაც თავისი ყოფილი კლუბის, „უიპეშტის“ ფეხბურთელს მაისური გაუცვალა და ამავე კლუბის ფანებს თამაშის შემდეგ მიესალმა, რაც „ფეჰერვარის“ ხელმძღვანელობასა და ფანებს არ მოეწონათ.
გუშინ, გამოცემამ „NIkkan Sport“ სენსაციური და დაუჯერებელი ინფორმაცია გაავრცელა. ცნობილი გახდა რომ პოპულარული იაპონელი ფეხბურთელი – „მეფე კაზუ“ – კაზუიუში მიურა ევროპის კონტინენტზე კარიერის გაგრძელებას აპირებს. 55 წლის მიურა პორტუგალიის მეორე დივიზიონის კლუბ „ოლივეირენსეში“ ჩაირიცხა. გავრცელდა ფოტოც, რომელშიც მიურა ტოკიოს აეროპორტშია დაფიქსირებული და კონტრაქტის გასაფორმებლად პორტუგალიაში მიემგზავრება.
კაზიუიში მიურას კონტრაქტი მიმდინარე თვის ბოლოს ეწურება საფეხბურთო კლუბ „იოკოჰამასთან“.
კაზუიოში მიურა ყველაზე ხანდაზმული ფეხბურთელია, რომელსაც ოდესმე პროფესიული კონტრაქტი გაუფორმებია. მან 1990-2000 წლებში იაპონიის ნაკრებში 89-ჯერ ითამაშა და 55 გოლი გაიტანა. სხვადასხვა დროს „სანტოსში“, „პალმეირასში“, „კურიტიბაში“, ზაგრების „დინამოში“, „ჯენოაში“, „ვისელ კობეში“, „სიდნეისა“ და „იოკოჰამაში“ ასპარეზობდა.
გუშინ, მილანის „ინტერისა“ და იტალიის ნაკრების ნახევარმცველმა ნიკოლო ბარელამ განაცხადა, რომ უსამართლობაა, როდესაც ევროპისა თუ კოპა ამერიკის გამარჯვებული გუნდები ავტომატურად არ იღებენ მსოფლიოს ჩემპიონატის საგზურს.
იტალიის ნაკრებმა ზედიზედ მეორედ ვერ შეძლო მსოფლიოს ჩემპიონატის ფინალურ სტადიაზე მოხვედრა. გუნდმა მართალია „ევრო 2020“-ზე გამარჯვება იზეიმა, მაგრამ მუნდიალის შესარჩევის პლეი ოფში ჩრდილოეთ მაკედონიას ვერ აჯობა.
„ამ დრომდე კატარის მსოფლიოს ჩემპიონატზე არცერთი მატჩისთვის მიყურებია, რადგან საკუთარ ემოციებში ჯერ კიდევ ვერ გავრკვეულვარ. ჯერ კიდევ ვერ მომინელებია ის გიგანტური იმედგაცრუება. ამბობენ, რომ შედეგი ასახავს იმას, რაც მოედანზე ხდება, მაგრამ ვფიქრობ, რომ ამ შემთხვევაში შედეგი უსამართლო იყო. დღეს ეს ჩვენ მოგვივიდა, მომდევნო ჯერზე შეიძლება სხვას დაემართოს. ვფიქრობ, რომ ევროპის ჩემპიონატისა და კოპა ამერიკის გამარჯვებულები მსოფლიოს ჩემპიონატზე თამაშის უფლებას უნდა იღებდნენ.
შესაძლოა მუნდიალზე მეოთხედფინალებს ვიყურო. ჩემი რომელიმე თანაგუნდელი თუ მოიგებს, კმაყოფილი ვიქნები. ვისურვებდი, რომ ეს მარსელო ბროზოვიჩი იყოს, რათა 2018 წლის მუნდიალის ფინალში წაგებისთვის რევანში აიღოს“. – განაცხადა ნიკოლო ბარელამ.
გუშინ, ცნობილი გახდა რომ, ეკვადორის ფეხბურთის ფედერაციამ 2024 წლის კოპა ამერიკის მასპინძლობაზე უარი განაცხადა, რის შემდეგაც კონმებოლმა ახალი მასპინძლის ძიება დაიწყო. ამერიკული მედიის ინფორმაციით, ახალი მასპინძელი აშშ იქნება, რომლისთვისაც ეს მცირე რეპეტიცია იქნება 2026 წლის მუნდიალამდე.
ეკვადორის შემდეგ მასპინძლობის სურვილი პერუსაც ჰქონდა, თუმცა აშშ ფავორიტია. კონმებოლისა და კონკაკაფის წარმომადგენლებს შორის მოლაპარაკება უკვე მიმდინარეობს.
2024 წლის კოპა ამერიკის გათამაშებას ამერიკა, კანადა, მექსიკა და კონკაკაფის ზონის კიდევ სამი ნაკრები დაემატება. კოპა ამერიკა თავიდან 2023 წელს უნდა ჩატარებულიყო, მაგრამ გადაიტანეს, რათა 2024 წლის ევროპის ჩემპიონატს დამთხვეოდა.
ავტორი
