გუშინ, გამოცემამ „Mundo Deportivo“ არგენტინის ეროვნული გუნდის თაყვანისმცემლებისათვის თავზარდამცავი ინფორმაცია გაავრცელა. აღმოჩნდა რომ ჯანმრთელობასთან დაკავშირებული პრობლემების გამო ლეო მესიმ თავისი გუნდის ვარჯიში გამოტოვა.
ფეხბურთელებმა თავიდან დარბაზში ივარჯიშეს, შემდეგ კი მოედანზე გადაინაცვლეს, მაგრამ გუნდთან ერთად მესი არ ყოფილა. სავარაუდოდ, მას ბარძაყის მცირე პრობლემა აქვს, რომლის დისკომფორტი ხორვატიასთან შეხვედრაში იგრძნო.
გამოცემის მტკიცებით, პრობლემა საფრანგეთის ნაკრებთან დაპირისპირებამდე აუცილებლად მოგვარდება და ფინალურ მატჩში ლეო მესის მინდორზე აუცილებლად ვიხილავთ.
გუშინ, ესპანურ გამოცემას „Marca“, მოახლოებულ ფინალურ დაპირისპირებაზე, ცნობილი იტალიელი ფეხბურთის სპეციალისტი ფაბიო კაპელო ესაუბრა.
„რას ვფიქრობ ფინალზე? ჩემი აზრით, ეს არ არის ორი ქვეყნის ნაკრების დაპირისპირება, ეს იქნება ბრძოლა მბაპესა და მესის შორის. მუნდიალის პირველ მატჩებში მესი დადიოდა მოედანზე, მაგრამ ხორვატიასთან თამაშით პირადად მე ძალიან მომხიბლა. თითქოს, „ბარსელონას“ დროინდელ მესის ვუყურებდი.
საფრანგეთის მთავარი კოზირი კი მბაპეა, რომელსაც აქვს ყველაფერი – ძალა, სისწრაფე, მიზანი. ველოდები კარგ ფინალს, დაძაბულს, საინტერესოს, იმედია, იქნება გოლებიც. არ გამოვრიცხავ, გამარჯვებულის ბედი დამატებით დროში ან პენალტების სერიაშიც გადაწყდეს“, – განაცხადა ფაბიო კაპელომ.
საფრანგეთის ნაკრების მთავარმა მწვრთნელმა დიდიე დეშამმა რუსეთის მუნდიალის მერვედფინალში, ოთხი წლის წინანდელი არგენტინასთან მატჩი გაიხსენა.
„ჩვენ მესის 2018 წელს უკვე შევხდით, მისი გავლენის შესაზღუდად სიფრთხილის ზომები უნდა მივიღოთ. ოთხი წლის წინ ველოდით, რომ ის უფრო მარჯვენა ფლანგიდან ითამაშებდა, მაგრამ ცრუ ცხრიანის პოზიციაზე იდგა. მესი პლეიმეიკერია, ამ პოზიციაზე მას მეტი თავისუფლება აქვს და მისი გაჩერება უფრო რთული იქნება – თუ ავად არ არის. რა თქმა უნდა, ამას არ ვუსურვებთ“. – განაცხადა დიდიე დეშამმა.
გუშინ, კომპიუტერმა „Five Thirty Eight“ 2022 წლის მსოფლიო ჩემპიონატის ფინალისთვის გუნდების შანსები პროცენტულად გამოთვალა და არგენტინის თასის აღებას 53%, ხოლო საფრანგეთს 47% მიანიჭა.
გუშინ ცნობილი გახდა, რომ საფრანგეთის პრეზიდენტმა ემანუელ მაკრონმა მსოფლიოს 2022 წლის ჩემპიონატის ფინალზე ეროვნული გუნდის ის მოთამაშეები მიიწვია, რომლებიც ტურნირში მონაწილეობას ტრავმების გამო ვერ ახერხებენ.
ემანულ მაკრონს სურს, რომ თამაშის დროს სტადიონის ტრიბუნაზე იმყოფებოდნენ: ქარიმ ბენზემა, ნ’გოლო კანტე და პოლ პოგბა, რომლებიც საფრანგეთის ნაკრებს კატარში ტრავმების გამო ვერ დაეხმარნენ.
მსოფლიოს ჩემპიონატის ფინალზე საგულშემატკივროდ, ბენზემასთან, კანტესა და პოგბასთან ერთად, ასევე განიხილება საფრანგეთის ნაკრების ფეხბურთელების: მაიკ მენიანის, კრისტოფერ ნკუნკუსა და პრესნელ კიმპემბეს მიწვევაც.
გამოცემა „L’Équipe“-ის მტკიცებით, საფრანგეთში 2022 წლის მსოფლიოს ჩემპიონატის ფინალისთვის 14 000 პოლიციელი იქნება მობილიზებული. უსაფრთხოების დამატებითი ზომების მიღება მას შემდეგ გახდა საჭირო, რაც საფრანგეთისა და მაროკოს მატჩის დასრულების შემდეგ ფრანგულ ქალაქებში მასობრივი შეტაკებები დაიწყო.
მსოფლიოს ჩემპიონატზე საფრანგეთის ნაკრების ტრიუმფის შემთხვევაში, პარიზის ყველაზე დიდი და ელიტური გამზირი – შანზ-ელიზე საავტომობილო მოძრაობისთვის გადაიკეტება. საფრანგეთის ეროვნული ღონისძიებების თავშეყრის ადგილზე ათასობით გულშემატკივრის შეკრებაა დაგეგმილი.
გუშინ ცნობილი გახდა, რომ არგენტინასა და საფრანგეთს შორის ფინალური დაპირისპირების მთავარი მსაჯი პოლონელი შიმონ მარცინიაკი იქნება.
41 წლის პოლონელ არბიტრს დაეხმარებიან თანამემამულეები – პაველ სოკოლნიცკი და ტომაშ ლისტკევიჩი.
საინტერესოა, რომ მიმდინარე მსოფლიოს ჩემპიონატზე მარცინიაკმა ორივე გუნდის თამაში განსაჯა.
ის მუშაობდა ჯგუფურ ეტაპზე საფრანგეთ-დანიისა და მერვედფინალში არგენტინა-ავსტრალიის მატჩებზე.
გუშინ, ლეო მესიმ არგენტინის ნაკრებში ხულიან ალვარესის როლზე ისაუბრა.
„ვერავინ წარმოიდგენდა, რომ ხულიანი ასეთ როლს შეასრულებდა და ჩვენთვის ასე მნიშვნელოვანი იქნებოდა. მან გუნდს საოცარი დახმარება გაუწია. მთელი ჩემპიონატის და ხორვატიის წინააღმდეგ შესანიშნავი თამაში აჩვენა, იბრძოდა ყველა სიტუაციაში და მომენტებს ქმნიდა. ჩვენთვის საოცარი აღმოჩენაა, ის ამას იმსახურებს, რადგან კარგი ბიჭია“.
ხორვატიის ნაკრების მცველმა იოშკო გვარდიოლმა კი ლეო მესიზე ილაპარაკა.
„გარკვეულწილად, ეს სასიამოვნო გამოცდილება იყო. გასულ სეზონში მესის წინააღმდეგ უკვე ვითამაშე საკლუბო დონეზე, თუმცა კლუბში თამაში განსხვავდება ეროვნული ნაკრებისგან. მაინც შევძლებ შვილებს მოვუყვე, რომ მესისგან თავს 90 წუთი ვიცავდი. იმედი მაქვს, შემდეგ ჯერზე შურს ვიძიებთ“, – განაცხადა იოშკო გვარდიოლმა.
გუშინ ცნობილი გახდა, რომ პორტუგალიის ნაკრების მთავარი მწვრთნელის თანამდებობიდან ფერნანდუ სანტუში გაათავისუფლეს.
სანტუშსა და პორტუგალიის ფეხბურთის ფედერაციას შორის ხელშეკრულება 2024 წლის ზაფხულამდე იყო გაფორმებული, მაგრამ მსოფლიოს ჩემპიონატის მეოთხედფინალში მაროკოსთან მარცხის შემდეგ, მას თანამდებობა დაატოვებინეს.
ჯერჯერობით, უცნობია ვინ იქნება პორტუგალიის ნაკრების ახალი მთავარი მწვრთნელი.
ავტორი
