„ჩვენი ჩინოვნიკები უკანა ფეხებზე დგანან, ღვინის საწარმოების წარმომადგენლები ხელის კანკალით უსხამენ მათ ღვინოს, უყურებენ მათს რეაქციას – მოსწონთ თუ არა. ჩვენთან მოდის რევიზორი. რა სურს რუს ჩინოვნიკს, ყველამ იცის. ჩაუდე ჯიბეში ორი კაპიკი და წავლენ ბედნიერები. თქვენ მართლა ფიქრობთ, რომ ისინი შესამოწმებლად ჩამოვიდნენ?! _ თქვა სააკაშვილმა და დასძინა, რომ თავად ონიშენკომ საქართველოს არ დასდო ჩამოსვლის პატივი, მაგრამ მოავლინა დელეგაცია.
რუსეთის მთავარმა სანიტარმა, გენადი ონიშენკოს სააკაშვილის ამ განცხადებას სააგენტო „ინტერფაქსთან” საუბრისას უპასუხა:
„თუ სიტუაცია არ იქნება ნორმალიზებული, ჩვენ დავაყენებთ საქართველოში რუსი ექსპერტების საქმიანობის შეჩერების საკითხს. თუ რუსი ექსპერტების შეურაცხყოფა და სხვა ქმედებები, არ შეწყდება, საკითხი ჩვენი ექსპერტების ნაადრევად დაბრუნების შესახებ დარჩება ღია “, _ ამბობს ონიშენკო „ინტერფაქსთან“ საუბრისას.
ამ განცხადებების საპასუხოდ, რუსეთ–საქართველოს ეკონომიკური თანამშრომლობის ცენტრმა დღეს გაავრცელა წერილი, რომელშიც რუსეთის სანიტარული სამსახურის უფროსის, გენადი ონიშენკოს მიმართავს.
წერილში აღნიშნულია, რომ სააკაშვილი და მისი გუნდი, 9 წლის განმავლობაში ყველაფერს აკეთებდნენ ქვეყნის ეკონომიკის დასანგრევად.
_ ყველა სფეროში, მათ შორის სოფლის მეურნეობაში. წნეხის ქვეშ იყო ბიზნესი, კრიმინალური გზით დაისაკუთრეს წარმატებული კომპანიები და სხვისი საკუთრება. ყველაფერი გააკეთეს იმისთვის, რომ საქართველოს გასარების ბაზარი დაეკარგა. არამიშისტური კომპანიების მცირე რაოდენობა შიშის ქვეშ მუშაობდნენ ამ წლების მანძილზე.
ბოლო თვეების განმავლობაში ბევრი რამ გაკეთდა, რომ რუსეთ-საქართველოს შორის ქართულ-რუსული ურთიერთობა გამოსწორებულიყო. მიუხედავად იმისა, რომ ქვეყნებს შორის დიპლომატიური ურთიერთობები არ არსებობს, გადალახული იქნა ყველა დაბრკოლება. ურთიერთობის დალაგების პროცესს მხარი დაუჭირა თქვენი დელეგაციის ჩამოსვლამ. გვინდა განსაკუთრებით გავუსვათ ხაზი თქვენს როლს ამ საქმეში.
ვიცით, სირთულეები წარმოიშვა.
გუშინდელი გამოსვლა პრეზიდენტისა სხვა არაფერია, თუ არა წაგებული პოლიტიკოსის ნაბოდვარი.
მისი გამოსვლა, პირველ რიგში, შეურაცხმყოფელია თქვენი მწარმოებლების და მთლიანად საქართველოსთვის.
ეს მიმართულია მოლაპარაკებების ჩასაშლელად და ურთიერთობების გასაფუჭებლად და ემსახურება ერთ მიზანს _ სამუდამოდ დავკარგოთ რუსეთი, როგორც მეგობარი ქვეყანა, ეკონომიკური და სტარტეგიული პარტნიორი.
ეს პროვოკაციული გამოსვლა ყველაზე უკეთ ამტკიცებს, რომ პროცესები სწორი მიმართულებით ვითარდება.
იმედი გვაქვს, რომ დაწყებულ პროცესებს, რომელსაც ამდენი ხანი ველოდით, ვერავინ და ვერაფერი ჩაშლის, _ აღნიშნულია წერილში, რომელსაც ხელს ცენტრის, დირეტქორი, გიორგი სეთურიძე აწერს.
გიორგი სეთურიძე “გურია ნიუსთან” საუბრისას აღნიშნავს, რომ ამ წერილმა შედეგი უკვე გამოიღო და მისი ინფორმაციით, ონიშენკო საქართველოში ჩამოსულ დელეგაციას არ გამოიწვევს:
_ ვერ გეტყვი, გაკეთდა თუ არა ამის შესახებ ოფიციალური განცხადება, მაგრამ მე მითხრეს, რომ დელეგაციას არ გაიწვევენ, _ აღნიშნა სეთურიძემ.
