ფრაქცია “აბაშელი დემოკრატების” თავმჯდომარემ, დევი ჯაკობიამ არა მარტო ფრაქცია, არამედ პარტიაც დატოვა. როგორც მან ფრაქციის შექმნისას თქვა, რაც მთავრობა შეიცვალა, მეტი თავისუფლებაა და ახლა უფრო მეტად არის შესაძლებელი საკუთარი აზრის გამოთქმა; ფრაქციაც იმიტომ შექმნა, რომ მეტი ახალი ინიციატივა გაიტანოს საკრებულოს სხდომებზე რაიონის საკეთილდღეოდ.
არჩევნების შემდეგ ფრაქცია “ნაციონალური მოძრაობა” დატოვა ზაზა გეგეჭკორმაც და ახლადშექმნილი ფრაქციის მიზნად მანაც ახალი იდეების და განსხვავებული საკითხების გამოტანა დაასახელა.
საკრებულოში კიდევ ერთ ფრაქციას _ “ქართულ ოცნებას”, “მრეწველი” მურთაზ ქვილითაია ხელმძღვანელობს. ეს ფრაქციაც ოთხი წევრისგან შედგება და შექმნის დღიდანვე დიდი სამუშაოების ჩატარებას პირდებოდა მოსახლეობას.
ყველაზე მრავალრიცხოვან, ექვსწევრიან ფრაქცია “რეფორმატორებს” “ახალი მემარჯვენეების” ლიდერი გელა თოფურია ხელმძღვანელობს.
უფრო მოგვიანებით ფრაქცია “ნაციონალური მოძრაობა” გაუქმდა და მის ნაცვლად ჩამოყალიბდა ფრაქცია “დემოკრატიული საქართველო”, რომლის თავმჯდომარედ ისევ გაუქმებული ფრაქციის თავმჯდომარე ირაკლი გაბუნია გახდა, წევრებიც წინა ფრაქციიდან გადმოვიდნენ.
შეძლეს თუ არა ფრაქციებმა ჩანაფიქრის განხორციელება და როგორია მათი სამომავლო გეგმები? ამ საკითხებთან დაკავშირებით “გურია ნიუსი” ფრაქციის თავმჯდომარეებს დაუკავშირდა.
ზაზა გეგეჭკორმა და დევი ჯაკონიამ აღნიშნეს, რომ ჯერ სამოქმედო გეგმის გახორციელება არ დაუწყიათ, ამ ეტაპზე თითოეულ ფრაქციას გამოეყო კაბინეტი, ახლა ტენდერის გამოცხადების შემდეგ კომპიუტერული აპარატურითაც აღჭურვავენ და შემდეგ შევუდგებით მუშაობასო.
– თუ გაიტანეთ რაიმე საკითხი საკრებულოს სხდომაზე? ფრაქციის შექმნის დღიდან აცხადებდით, რომ რაიონის საკეთილდღეოდ დიდი გეგმები გქონდათ.
დევი ჯაკონია: – არა, ჯერ ფრაქციას არ დაუყენებია რაიმე კონკრეტული საკითხი, მაგრამ მალე შევუდგებით მუშაობას.
თამაზ შოთაძე, ფრაქცია “ქართული ოცნება”: – როგორც ასეთი, რაიმე კონკრეტული საკითხები დაგვეყენებინა, ჯერ არ ყოფილა, ან როგორ შეიძლება ასეთი საკადრო ცვლილებების დროს რაიმეს საკითხზე მსჯელობა? აქ ჯერ კიდევ არ იგრძნობა თავისუფლება. ჩვენ პროტესტის ნიშნად ერთხელ უკვე დავტოვეთ საკრებულოს სხდომა, როცა ყოველგვარი დარღვევებით იქნა გამგებელი არჩეული. უახლოეს ხანებში ძალიან სერიოზულად ვაპირებთ მუშაობის გაშლას და იმედია, შევძლებთ დაყენებული საკითხების გატანას.
გელა თოფურია, “რეფორმატორები”: – ფრაქცია “რეფორმატორების” აქტივობა ჩანს ყველაფერში. ყველა საკითხში – ბიუჯეტთან მიმართებაში, ნებისმიერ პროექტთან მიმართებაში ჩვენ ჩვენი შეხედულებები და მოსაზრებები გვაქვს, რომელსაც ნამდვილად ითვალისწინებს საკრებულო. ფრაქციის ყველა წევრს აქვს აბსოლუტურად თავისუფალი არჩევანის უფლება, აი, მაგალითად, გამგებლის არჩევის დროს არავისთვის მომიხვევია თავზე როგორც ფრაქციის თავმჯდომარის აზრი. ყველას ჰქონდა საკუთარი არჩევანის გაკეთების საშუალება. ისიც უნდა აღინიშნოს, რომ ყველა ფრაქციას სამუშაო პირობები თანაბარი გვაქვს და ყველას შეუძლია სამუშაო პროცესი ნაყოფიერად წარმართოს.
ფრაქცია “დემოკრატიული საქართველოს” ლიდერთან, ირაკლი გაბუნიასთან კი საუბარი სხვა კითხვით დავიწყეთ.
– ბოლო რამდენიმე დღეა, “ნაციონალური მოძრაობის” ყოფილი ოფისი (სასტუმროს შენობაში) ღიაა და საკმაო აქტიურობა შეინიშნება. მოსახლეობა ამბობს, რომ იქ ოფისი აღდგა და “ნაციონალური მოძრაობის” მხარდამჭერები მთელი დღის განმავლობაში იმყოფებიან. რა ხდება ოფისში? რამდენადაც ცნობილია, საკრებულოში “ნაციონალური მოძრაობის” ფრაქცია გაუქმდა და ახალი ფრაქცია “დემოკრეტიული საქართველო” შეიქმნა. პარტიაც გაუქმდა და თუ არა? ან ვინ არის ახლა პარტიის თავმჯდომარე?
– ფრაქციას საკრებულოს შენობაში აქვს ოთახი, ისევე როგორც სხვა ფრაქციებს. იმ ძველ ოფისთან მე შეხება არ მაქვს, იქ, ალბათ, პარტია “ნაციონალური მოძრაობა” შევიდა. ახლა პარტიის თავმჯდომარე დავით დარცმელიძეა. სხვა ინფორმაციას ამ საკითხთან დაკავშირებით არ ვფლობ.
– ბატონო ირაკლი, ახალი ფრაქცია უკვე შეუდგა მუშაობას?
– ჯერჯერობით არა, მაგრამ მალე ჩავდგებით სამუშაო პროცესში.
მასალის მზადების პროცესში აბაშაში ხმა გავრცელდა, მალე ვანო მერაბიშვილი ჩამოდისო და სწორედ ამ ამბავს დაუკავშირა მოსახლეობამ “ნაციონალური მოძრაობის” ძველი ოფისის გააქტიურება.
“გურია ნიუსი” შეეცადა ახლადგახსნილი ოფისის შესახებ მოეპოვებინა რაიმე ინფორმაცია, მაგრამ მეორეჯერ იქ მისულებს კარები დაკეტილი დაგვხვდა.
