წალკაში გამომავალი გაზეთ “თრიალეთის ექსპრესის“ ჟურნალისტის მარი ხიზანიშვილის განმარტებით:
“ხალხი ჩამოვიდა იმიტომ, რომ “ქართული ოცნება – დემოკრატიული საქართველოს” აღმასრულებელი მდივანი გივი ჭიჭინაძე მათ დაჰპირდა, რომ განიხილებოდა იური მოდებაძის კანდიდატურა, რომელიც უნდოდა ხალხს. აღმოჩნდა, რომ დღეს ჩატარდა საკრებულოს სხდომა და გავიდა ის კანდიდატი, ვისზეც შეჰპირდნენ, რომ შეაჩერებდნენ და ხალხი დარჩა მოტყუებული.
ეს ადამიანები საკრებულოს დღევანდელ გადაწყვეტილებას აპროტესტებდნენ. მათ დაჰპირდნენ, რომ შეაჩერებდნენ ჯონი საბაძის, ანუ “ნაციონალისტი” კანდიდატის განხილვას და განიხილავდნენ იური მოდებაძის კანდიდატურას. გივი ჭიჭინაძეს ვერ ვუკავშირდებით. კანცელარიიდან არავის გაუცია პასუხი. 5 საათია ხალხი აქ დგას. აქ ძირითადად წალკაში ჩასახლებული აჭარელი მოსახლეობაა შეკრებილი. ისინი პირობას დებენ, თუ “ქართული ოცნება” არ განიხილავს იმ კანდიდატურას რომელსაც ითხოვდნენ, ისინი წალკიდან გადასახლებით იმუქრებიან და აჭარაში მასობრივად აპირებენ დაბრუნებას.“
რა მოხდა წალკაში, რატომ არ შეასრულა პირობა “ქართული ოცნება – დემოკრატიული საქართველოს” აღმასრულებელმა მდივანმა, გივი ჭიჭინაძემ და რატომ არ შეხვდა საპროტესო აქციის მონაწილეებს პრემიერ-მინისტრის ადმინისტრაციიდან არავინ, ამასთან დაკავშირებით “გურია ნიუსი” “ქართული ოცნება – დემოკრატიული საქართველოს” პოლიტსაბჭოს მდივანს, ელისო ჩაფიძეს დაუკავშირდა.
“პირველ რიგში, მე ვფიქრობ, რომ ზოგადად არ უნდა მოხდეს ასეთი პროცესების წახალისება. ანუ ადამიანების თანამდებობაზე არჩევა, ან დანიშვნა ამ კონკრეტულ შემთხვევაში, არის საკრებულოს და არა პარტიის გადაწყვეტილება. მე თავს ვთვლი აბსოლუტურად არა უფლებამოსილ პირად ამ თემასთან დაკავშირებით გავაკეთო განცხადება, რადგან მე გახლავართ ტყიბულის მაჟორიტარი. ვარ პარლამენტის განათლების მეცნიერების და კულტურის კომიტეტის თავმჯდომარის მოადგილე და პოლიტიკური საბჭოს მდივანი. ვთვლი, რომ პოლიტიკური პარტია მართალია წარადგენს თავის კანდიდატურებს ამა თუ იმ პოზიციაზე აღმასრულებელ ხელისუფლებაში, მაგრამ, წალკის გამგებლად ვინ იყოს დანიშნული, ან არჩეული… მე კონკრეტულ პიროვნებას არ ვიცნობ, შეიძლება ის ან “ნაციონალური მოძრაობის” წევრია, ან “ქართული ოცნების,” ან “ლეიბორისტული პარტიის”, მაგრამ ეს არის ადგილობრივი თვთმმართველი ორგანოს, ან საკრებულოს გადასაწყვეტი. თუ ეს პიროვნება დანიშნულია დროებითი მოვალეობის შემსრულებლად, სამი თვის შემდეგ შესაძლებელია დადგეს საკითხი მისი თანამდებობიდან გადარჩევის შესახებ, ან კონკურსში მიიღოს მონაწილეობა და უფრო კონკურენტუნარიანი კანდიდატურა წარადგინონ პოლიტიკურმა ძალებმა. აბსოლუტურად არაადეკვატურია ამ ადამიანების მხრიდან აქციის მოწყობა კანცელარიასთან. კანონის მიხედვით ბიძინა ივანიშვილს არ აქვს უფლება, ჩაერიოს ადგილობრივი თვითმმართველობის ორგანოების მიერ მიღებულ გადაწყვეტილებაში. შესაბამისად ვფიქრობ, რომ არასწორი ადრესატი ჰყავთ შერჩეული იმისთვის, რომ მიიღონ პასუხი. ამ სიტუაციაში საუკეთესო გამოსავალია ჩვენ, რაც შეიძლება სწრაფად შევიმუშაოთ კანონი და ყველა დონეზე მერის და გამგებლის არჩევნები მოხდეს მოსახლეობის მიერ. თუ კი ჩვენ მოვახერხებთ პატიოსანი არჩევნების ორგანიზებას, ეს იქნება საუკეთესო გამოსავალი.
ძალიან კარგი იქნებოდა, კანცელარიიდან აეხსნათ ამ ადამიანებისთვის ეს ყველაფერი. ალბათ ეს ასეც მოხდება. ამ ადამიანებს აუხსნიან. გივი ჭიჭინაძე არ გახლავთ კანცელარიის თანამშრომელი.
მე ამ წუთში არ ვარ თბილისში, თორემ ძალიან დიდი სიამოვნებით შევხვდებოდი ამ ადამიანებს და ავუხსნიდი, ეს საპროტესტო აქცია არ უნდა გამართონ სახელმწიფო კანცელარიის წინ. იმიტომ რომ პრემიერ-მინისტრს არც უფლება აქვს და არც შეუძლია ჩაერიოს მსგავს საკითხების გადაწყვეტაში.
ეს პროტესტი ხანდახან ნამდვილად არის წახალისებული. არსებობს გარკვეული ჯგუფები, რომლებიც არ არიან “ქართული ოცნების” მიმართ კეთილგანწყობილები და ისინი ცდილობენ, ასეთი ტიპის პროტესტი წაახალისონ. კანცელარიის წინ არ არის კითხვების პასუხები. პასუხები არის კანონმდებლობაში, პასუხი არის “ადგილობრივი თავითმმართველობის ორგანოს შესახებ კანონის” შეცვლაში. პასუხები არის ადამიანის უფლებამოსილების სწორ გამიჯვნაში. თქვენ იცით, რომ ჩვენ არაერთხელ გავხდით კრიტიკის საგანი იმის გამო, რომ თუ იყო “ქართული ოცნების” წარმომადგენლების მხრიდან რაღაც ტიპის ჩარევები კონკრეტულ სიტუაციასთან დაკავშირებით. ჩვენ ამის გაკეთებას არ ვაპირებთ. არავინ არ აპირებს თავისი უფლებამოსილების გადამეტებას. ახსნა-განმარტება კი ბატონო.” – განაცხადა ელისო ჩაფიძემ.
„გურია ნიუსი“ გივი ჭიჭინაძესთან ეცადა დაკავშირებას, მაგრამ მან ჩვენს სატელეფონო ზარებს არ უპასუხა.
