იუსტიციის უმაღლესი საბჭო და უზენაესი სასამართლოს თავმჯდომარე კოტე კუბლაშვილი ირწმუნებიან, რომ ივანე ჯავახიშვილის სახელობის თბილისის სახელმწიფო უნივერსიტეტის მიერ გაცემული დიპლომებით ზემოხსენებული მოსამართლების იურიდიული განათლება დასტურდება.
“გურია ნიუსმა” უნივერსიტეტს ერთადერთი კითხვით მიმართა: რუსთავის საქალაქო სასამართლოს მოსამართლე გიგაურს და უზენაესი სასამართლოს მოსამართლე ბესარიონ ალავიძეს მიენიჭათ თუ არა იურისტის კვალიფიკაცია მათ მიერ გაცემული დიპლომებით.
თბილისის სახელმწიფო უნივერსიტეტიდან “გურია ნიუსმა” შემდეგი შინაარსის პასუხი მიიღო:
“ივანე ჯავახიშვილის სახელობის თბილისის სახელმწიფო უნივერსიტეტი ეხმაურება საზოგადოების დაინტერესებას თსუ “ხელოვნებისა და ჰუმანიტარულ პროფესიათა ფაკულტეტის” კურსდამთავრებულთა დიპლომებთან/ კვალიფიკაციასთან დაკავშირებით და განმარტავს: „ხელოვნებისა და ჰუმანიტარულ პროფესიათა ფაკულტეტი“ თსუ-ში 1965-2007 წლებში ფუნქციონირებდა. ეს ფაკულტეტი სტუდენტებსა და სხვა დაინტერესებულ პირებს საშუალებას აძლევდა უნივერსიტეტის შესაბამის ფაკულტეტზე მიღებულ სპეციალობასთან ერთად დაუფლებოდა ჰუმანიტარულ საერთო განათლებას. დიპლომი, რომელიც ფაკულტეტის კურსდამთავრებულზე გაიცემოდა კვალიფიკაციის ან ხარისხის მინიჭებას არ ითვალისწინებდა.”
იუსტიციის უმაღლესი საბჭოს მიერ გავრცელებულ განცხადებაში კი ნათქვამია:
“მოცემულ შემთხვევაში, მოსამართლეების ბესარიონ ალავიძისა და მაია გიგაურის უმაღლესი იურიდიული განათლება დასტურდება შემდეგი გარემოებებით:
მათ ძირითად ფაკულტეტთან ერთად დამთავრებული აქვთ თბილისის ივ. ჯავახიშვილის სახელმწიფო უნივერსიტეტის ხელოვნებისა და ჰუმანიტარულ პროფესიათა ფაკულტეტი სამართლისმცოდნეობის სპეციალობით, რაც ადასტურებს იმას, რომ მათ იურიდიული სწავლების კურსი გაიარეს უმაღლეს საგანმანათლებლო დაწესებულებაში.
თბილისის სახელმწიფო უნივერსიტეტის მიერ მათზე გაცემულია შესაბამისი დიპლომი, რომლითაც დასტურდება უმაღლესი საგანმანათლებლო პროგრამის წარმატებით დაძლევა, რაც წარმოადგენს იურისტის კვალიფიკაციისათვის აუცილებელ წინაპირობას.
სადავო იურიდიული განათლების კანონმდებლობასთან შესაბამისობა დადასტურებულია უზენაესი სასამართლოს კანონიერ ძალაში შესული განჩინებით.”
იმ დროს, როდესაც დიპლომის გამცემი უნივერსისეტი აცხადებს ,რომ მას უმაღლესი განათლების დამადასტურებელი დოკუმენტი არ გაუცია, გაურკვეველია რის საფუძველზე ამტკიცებს საწინააღმდეგოს იუსტიციის საბჭო და საბჭოს თავმჯდომარე კუბლაშვილი.
