სადაც საუბარი იყო წალკის მუნიციპალიტეტის “ქართული ოცნების” კოორდინატორების, ქვეკოორდინატორების და ეკომიგრანტების, დაახლოებით 300-მდე ადამიანის მიერ, საქართველოს კანცელარიასთან გამართულ საპროტესტო აქციაზე. ისინი გამგებლად ჯონი შაბაძის დანიშვნას აპროტესტებდნენ.
დღეს, “ქართული ოცნება – დემოკრატიული საქართველოს” პოლიტსაბჭოს მდივანი ელისო ჩაფიძე, მთავრობის კანცელარიასთან წალკიდან ჩამოსულ საპროტესტო აქციის მონაწილეებს შეხვდა.
წალკაში გამომავალი გაზეთის “თრიალეთის ექსპრესის”ჟურნალისტი მარი ხიზანიშვილი “გურია ნიუსთან” ამბობს, რომ “დეპუტატი ელისო ჩაფიძე საპროტესტო აქციის მონაწილეებს დაჰპირდა, რომ ორშაბათს წალკაში ჩამოვა და ადგილზე გაერკვევა სიტუაციაში. ამის შემდეგ, აქციის მონაწილეები წალკაში დაბრუნდნენ. ისინი აცხადებენ, თუ ორშაბათს ჩაფიძე არ ჩავა წალკაში, მათი აქცია პერმანენტულ ხასიათს მიიღებს.”
როგორც “ქართული ოცნება-დემოკრატიული საქართველოს” პოლიტსაბჭოს მდივანმა, ელისო ჩაფიძემ “გურია ნიუსს” განუცხადა, იგი წალკაში ხვალ ჩავა. ადგილზე გაეცნობა იქ მცხოვრები ადამიანების პრობლემებს. მისი განმარტებით, აქციაში მონაწილე ადამიანების უმეტესობას სოციალური პრობლემა აქვს.
“დღეს მინდოდა ჩასვლა. სამწუხაროდ, ლოჯისტიკური პრობლემების გამო ვერ მოხერხდა. “ქართული ოცნებიდან” რამდენიმე ადამიანი, ხვალ დილით მივდივართ წალკაში. რეალურად მოსახლეობას სოციალური პრობლემები აწუხებს, რომელიც წლების განმავლობაში გაგრძელდა. ეკომიგრანტების მძიმე სოციალური პირობები, უსამართლობა, რასაც მათ მიმართ ადგილი ჰქონდა წლების განმავლობაში, ასევე გარკვეული პოლიტიკური უკმაყოფილება.”
საპროტესტო აქცია გამგებლის თანამდებობაზე ჯონი შაბაძის დანიშვნას უკავშირდება. რასაც 2 დღეა წალკელები კანცელარიასთან აპროტესტებენ. ჩაფიძის განცხადებით, “მთელი ქვეყნის მასშტაბით კონკრეტულ თანამდებობაზე დანიშვნის პროტესტი საინტერესო ხასიათს იღებს. “პირველი ეს გახლავთ, პარტია “ქართულ ოცნებაში” გაწევრიანების მსურველთა დიდი რიცხვი და მათ შორის დაპირისპირება. სიმართლე გითხრათ, პირველად ვხდები იმის მოწმე, რომ პარტიაში გაწევრიანებისთვის ადამიანები ასეთ დიდ ძალისხმევას იღებენ. რა თქმა უნდა ჩვენთვის რთულია, უმეტესობა გულწრფელი ადამიანია. მეორეს მხრივ, ძალიან სასიამოვნოა, როდესაც ადამიანისთვის “ქართული ოცნებაში” არის ორგანიზაცია, სადაც გაწევრიანება არის სასურველი და მნიშვნელოვანი.
მეორე, ეს არის მერებთან და გამგებლებთან დაკავშირებული საკითხები. ყველგან, სადაც საკრებულო ირჩევს ან ცვლის გამგებელს, ასეთი ტიპის პრობლემებია. გარკვეული ჯგუფი უკმაყოფილებას გამოთქვამს. ვფიქრობ, საუკეთესო გამოსავალი იქნება საკანონმდებლო ორგანოს წარმომადგენლებმა მოვამზადოთ-პარლამენტში შევიტანოთ კანონპროექტი “ადგილობრივი თვითმმართველობის სრული არჩევითობის შესახებ,” სადაც პირველ ეტაპზე, მთელი ქვეყნის მასშტაბით მერი და გამგებელი იყოს არჩეული. ბუნებრივია, ამას კარგი ორგანიზება და გააზრება სჭირდება. მეორე ეს არის ბევრი ქვეყნის მოდელი, სადაც ადგილობრივი პოლიციის უფროსის დანიშვნა არჩევნების გზით ხდება. შესაძლოა, როდესაც ადამიანი არჩევნების გზით იქნება არჩეული, მის მიმართაც იყოს გარკვეული უკმაყოფილება ადამიანების იმ ნაწილის მიერ, რომლებმაც სხვა კანდიდატს მისცეს ხმა, მაგრამ ეს არის ყველაზე დემოკრატიული წესი, ამაზე უკეთესი კაცობრიობას ჯერ არ მოუგონია. ჩემი აზრით, ამ სიტუაციიდან ერთადერთი სწორი გამოსავალი იქნება, ადამიანებს მივცეთ უფლება თვითონ აირჩიონ საკუთარი მერი თუ გამგებელი. შესაბამისად, თვითონვე იქნებიან პასუხისმგებელი საკუთარ გადაწყვეტილებაზე. ხალხისთვის ძალაუფლების გადაცემა ყველა შემთხვევაში საუკეთესო გამოსავალია.”
საპროტესტო აქციის მონაწილეებს პრეტენზიები ჰქონდათ “ქართული-ოცნება დემოკრატიული საქართველოს” აღმასრულებელ მდივანთან. ისინი აცხადებდნენ, რომ ჭიჭინაძემ პირობა არ შეასრულა. დეპუტატ ელისო ჩაფიძის განმარტებით, გივი ჭიჭინაძის მიმართ პრეტენზიები უსაფუძვლოა: “მე ვესაუბრე ბატონ გივი ჭიჭინაძეს. მას არანაირი მონაწილეობა არ მიუღია და არც აქვს უფლება მონაწილეობა მიიღოს ან ზეწოლა განახორციელოს ადგილობრივი თვითმმართველობის ორგანოზე. ამიტომ, მე ვფიქრობ, რომ ბატონ გივი ჭიჭინაძის მიმართ პრეტენზიები არის სრულიად უსაფუძვლო.”
