ის “გურია ნიუსს” იმ დეტალებზე ესაუბრება, რატომ მოუხსნეს მას სოციალური დახმარება და რა ზეწოლისა და მუქარის ქვეშ იმყოფებოდა ოჯახი წინასაარჩევნოდ.
_ მყავს მეუღლე და ორი მცირეწლოვანი შვილი, ჩვენც ახალგაზრდები ვართ, ძალიან მიჭირს ამაზე საუბარი, იტყვიან რა გაუჭირდათ ახალგაზრდა ოჯახს, რომ სოციალურ პრობლემებზე ასე ღიად და საჯაროდ რომ საუბრობენო, მაგრამ რა ვქნა? ეკონომიურად ძალიან გვიჭირს ამდენი წელია სამსახური ვერსად ვიშოვეთ, რა_ თქმა უნდა უბრალოდ დასაქმების კუთხით, ჩემი მეუღლე ფიზიკურად შრომობს და ისიც სეზონურად, 50 კილოიან თხილის ტომრებს ზურგით ათრევს, რომ პატარებს სახლში საჭმელი ჰქონდეს. გვქონდა სოციალური დახმარება რამდენიმე თვის განმავლობაში, რომელიც ჩვენი ოჯახისთვის მართლაც რომ პურის ფული იყო, და ისიც მოგვიხსნეს ორი თვის წინ, _ როგორც გვემუქრებოდნენ, ისე აგვიხდა ყველაფერი.
_ ვინ გემუქრებოდათ და რატომ?
_ სოფლის ხელმძღვანელობა. ამ ეტაპზე კონკრეტული პიროვნების ვინაობის დასახელებისგან თავს შევიკავებ, რადგან შეიძლება ჩემი ოჯახის წევრისა და მას შორის ანგარიშსწორება ფიზიკურ დაპირისპირებაში გადაიზარდოს. დიახ, გვითვლიდნენ, რომ “ნაციონალებს” მიეცით არჩევნებზე ხმა იცოდეთ, თორემ სოციალურ დახმარებას მოგიხსნითო, ისეც აგიხდეთ ყველაფერი, მოგვიხსნეს, იმის გამო, რომ წინასაარჩევნოდ ღიად ვაფიქსირებდით ჩვენს პოზიციას და მხარდაჭერას “ოცნების” მიმართ. როცა ანტენები დავიდგით, ჩემს მეუღლეს მოაკითხეს და ბათუმში დაკითხვაზე წაიყვანეს, მთელი დღე კაცი მშიერი, მწყურვალი ზეწოლისა და მუქარის ქვეშ ჰყავდათ, ანტენა რატომ, რისთვის დაიდგითო. ამ ფაქტის გამო ჩემი მეუღლე ძალიან გაღიზიანებულია, სწორედ რომ ამიტომ გვაზღვევინეს და ჩემი შვილები დღეს უპუროდ და მშიერი დაგვიტოვეს, _ ამბობს ნატო ვადაჭკორია.
მისი განცხადებით, სოციალური მომსახურების სააგენტოში დახმარების მოხსნის მიზეზად დეკლარაციაში შევსებული “გლობალ-ტვ”-ს ანტენა დაუსახელეს.
_ მივედით სოციალურ სამსახურში ამბის გასარკვევად და სოციალური მომსახურების სააგენტოს გურიის სამსახურის უფროსმა ვასილ ხომერიკმა განგვიცხადა, რომ თქვენს დეკლარაციაში ანტენა ჩანსო. ძალიან შევწუხდი, ანტენა ხომ არ გვიყიდია? რა ვქნაო, მითხრა, ასე ჩანს დეკლარაციაშიო, თან ჩვენს თვალწინ კითხულობდა. მაჩვენეთ ქაღალდი, რომ ნაჩუქარიაო.
რამდენიმე თვის წინ, როცა დაგვენიშნა სოციალური დახმარება ძალიან დაბალი ქულები მივიღეთ, ფაქტიურად 10 თვის ანუ წინასაარჩევნოდ, არჩევნების შემდეგ ალბათ იფიქრეს, ამით მოვიგებთ ოჯახის გულსო, რამდენიმე თვეში მომიხსნეს და მაღალი ქულები მოგვივიდა. რამ გაგვამდიდრა, არაფერი ჩვენს ცხოვრებაში არ შეცვლილა. რამ განაპირობა ჩემი გამდიდრება, უფასო ანტენებმა? გვინდოდა საჩივრის დაწერაც, მაგრამ არც ამის ნება მოგვცეს სოციალური მომსახურების სააგენტოში და წამოვედით სახლში იმედგაცრუებულები. როდემდე უნდა ვიცხოვროთ ასე? რაღაცის იმედი ხომ უნდა მქონდეს? რა ვქნა, დავტოვო ჩემი პატარა შვილები და თურქეთში წავიდე სამუშაოდ? ახალი ხელისუფლების იმედი მქონდა, ამდენი ხანი გავუძელით გაჭირვებას, მუქარას, ზეწოლას, დამცირებას და ეგაა სამართალი და უკეთესობა, რომ პურის ფულიც წაგვართვეს? მოვითხოვ, გამოიძიონ ჩემი საქმე რამდენად კანონიერად მომიხსნეს დახმარება. ვთხოვ ახალ ხელისუფლებას, რომ დაგვასაქმონ სადმე ან მე ან ჩემი მეუღლე, რომ შვილები გამოვკვებოთ, ნუ ჩაგვიქრობენ იმედის ნაპერწკალს, რომელსაც ამდენი ხანია ველოდით.
ჩვენ დავუკავშირდით სოციალური მომსახურების სააგენტოს გურიის სამსახურის უფროსს ვასილ ხომერიკს, რომელმაც განგვიცხადა: “ნებისმიერ ოჯახს, დაინტერესების შემთხვევაში, სიტყვიერად გავაცნობთ იმ ინფორმაციას, რაც თავად მიაწოდეს სოციალურ აგენტს. დეკლარაცია ივსება უფლებამოსილი პირის მიერ”.
_ ბატონო ვასილ, ქალბატონი ნატო აცხადებს, რომ თქვენ საჩივრის დაწერის ნება არ მიეცით…
_ მასეთი ფაქტი ნამდვილად არ მახსოვს და ვერც მოხდებოდა, რადგან ნებისმიერი ოჯახი იქცევა ისე, როგორც თავად თვლის საჭიროდ, – გვითხრა ვასილ ხომერიკმა.
“გურია ნიუსი” დაუკავშირდა სოფელ ოზურგეთის რწმუნებულს გია ჩხაიძეს, რომელმაც ჩვენს სატელეფონო ზარებს არ უპასუხა.
