ამირან გიგინეიშვილის ამ ინიციატივას სოციალურ ქსელში ბევრი გამოხმაურება არ მოჰყოლია. თუმცა ვინც გამოეხმაურა მსგავს ინიციატივას მიესალმა. პირველი კითხვა ლანჩხუთის მუნიციპალიტეტის საკრებულოს თავმჯდომარეს სოციალური ქსელის მომხმარებელმა, რევაზ ეგაძემ დაუსვა: “რაფერ ხარ ძამა?”
“კარგად რეზო, არა მიშავს ძამა. თქვენსკენ ხომ მშვიდობაა?” _ გასცა უმალვე პასუხი საკრებულოს თავმჯდომარემ.
“გურია ნიუსი” უცვლელად გთავაზობთ რამდენიმე კითხვას, რომელსაც პასუხი ამირან გიგინეიშვილმა სოციალური ქსელის მეშვეობით გასცა.
ნიკოლოზ ცინცაძე: – ყველაფერი ყველაფერია, მაგრამ ბატონო ამირან გურიის ცენტრალურ სტადიონს ეშველება რამე? დასრულდება სრულად მისი მშენებლობა?
ამირან გიგინეიშვილი: _ რაც შეეხება გურიის სტადიონს, პროექტი დაწყებულია და გაგრძელდება. აქ სხვა პრობლემაა მთავარი, რაც სერიოზული დილემაა. ერთის მხრივ “გურია” ლანჩხუთის ისტორია, დღევანდელობა და საოცნებო მომავალია, მეორეს მხრივ ეს გუნდი მუნიციპალიტეტის ბიუჯეტს სერიოზულად ანგრევს. წარმოიდგინეთ, რომ ის 400 000 ლარი, რაც ახლა ბანკის სესხის მომსახურებას ჭირდება, “გურიისთვის” შარშან რომ იქნა გამოტანილი რამდენ სოციალურ პრობლემას მოხსნიდა, რამდენ ოჯახს დავეხმარებოდით! ძნელი და რთული გადაწყვეტილებებია მისაღები.
სოსო გიგინეიშვილი: გამარჯობათ ამირან! პირველ რიგში გილოცავთ საკრებულოს თავმჯდომარედ არჩევას! მოგესალმებით თბილისიდან. ამირან, მაინტერესებს სოფ. ჯურუყვეთში თუ იგეგმება გზის საფარის დაგება ? მართალია მე აქ ვცხოვრობ, მაგრამ სატკივარი მტკივა, როგორც ყოველ თქვენთაგანს!
ამირან გიგინეიშვილი: გამარჯობა სოსო. მადლობა მოლოცვისთვის. რაც შეეხება ჯურუყვეთს, მე ამ თემის მაჟორიტარი ვარ პირველ რიგში და რა თქმა უნდა, ამ თემზე მტკივა გული. ახლა მიმდინარეობს ინფრასტრუქტურული პროექტების ინიცირება, რომლებიც ინფრასტრუქტურის სამინისტროს უნდა წარუდგეს. ჯურუყვეთიდან 5 პროექტია და ამათგან 2 გზაა.
ამირან გიგინეიშვილის ინტერნეტ-პრესკოფერენცია ამ პასუხით დასრულდა და არ არის გამორიცხული, რომ მისი კოლეგები და სხვა ადგილობრივი საჯარო მოხელეები მის ინიციატივას გამოეხმაურონ და სოფელიც აშენდება…
