გლდანის მე-8 საპყრობილის უსაფრთხოების განყოფილების უფროსი ლევან ფურცხვანიძე, ამავე საპყრობილის რეჟიმის განყოფილების უფროსი ოლეგ ფაცაცია, ოპერატიული მორიგე გელა ცომაია, კონტროლიორი ლევან ფხალაძე, უსაფრთხოების განყოფილების ინსპექტორი ბორის ფარულავა, საპყრობილის არასრულწლოვანთა განყოფილების მორიგე ინსპექტორი კობა ჩიკვატია, სასჯელაღსრულების დეპარტამენტის თავმჯდომარის მოადგილე გაგა მკურნალიძე, მე-8 საპყრობილის დირექტორი დავით ხუჭუა, დირექტორის მოადგილე ვიქტორ ყაჭეიშვილი, რეჟიმის უფროსი ინსპექტორი გიორგი კვარაცხელია, კონტროლის ინსპექტორი მანუჩარ ლომთაძე, № 8 საპყრობილის დირექტორის მოადგილე ალექსანდრე ჯანჯღავა, №8 ციხის ყოფილი თანამშრომელი, ციხის სკანდალური კადრების ავტორი ვლადიმერ ბედუკაძე და კიდევ რამდენიმე განსასჯელის საქმეს დღეს თბილისის საქალაქო სასამართლო იხილავდა.
მათ ბრალი წამებასა და არაადამიანურ მოპყრობაში ედებათ. მოსამართლე ვაჟა ფუხაშვილმა სხდომის დდახურვის გადაწყვეტილება მიიღო, რადგან კონკრეტულ საქმეში არიან ბრალდებულები, რომლებსაც გარკვეულ წილად სხვადასხვა სახის სექსუალურ ძალადობაში ედებათ ბრალი, რომელიც 4-დან 6 წლამდე თავისუფლების აღკვეთას ითვალისწინებს.
მოსამართლე ვაჟა ფუხაშვილის განცხადებით: “ვლადიმერ ბედუკაძემ სასამართლოს წინაშე, მოსამართლის აცილების შუამდგომლობა დააყენა. იგი აცხადებს, რომ ფუხაშვილს ასიათასობით უკანონო განაჩენი აქვს გამოტანილი და მას არ ენდობა. რასაც დაეთანხმნენ ადვოკატები: აფციაური. ჯმუხაძე და გაგუა. შუამდგომლობას მხარი არ დაუჭირეს პროკურორებმა. თუმცა, ბედუკაძემ ვერ დაასახელა გადაწყვეტილება, რომელიც უკანონოდ არის გამოტანილი. არანაირი ფაქტი იმისა, რომ მოსამართლეს გააჩნია კერძო ინტერესი მოცემული საქმისა არ არსებობს.
ვლადიმერ ბედუკაძის და მისი ადვოკატების შუამდგომლობა არ დაკმაყოფილდეს დაუსაბუთებლობის გამო.”– ასეთ ვერდიქტი გამოიტანა ფუხაშვილმა ბედუკაძის შუამდგომლობაზე.
მოსამართლეს განმარტებით, “ვლადიმერ ბედუკაძის და ბორის ფარულავას ადვოკატებმა პროკურორ რევაზ ნადოის აცილების შუამდგომლობაც დააყენეს. მოსამართლემ განაცხადა, რომ ადვოკატ ელზა ჯმუხაძის თქმით, ნადოის სახელი სახალხო დამცველის ანგარიშში 2007 წლის მოვლენების დროს იყო გაჟღერებული. ბრალმდებლები არ დაეთანხმნენ ადვოკატების შუამდგომლობას.” ფუხაშვილის გადაწყვეტილებით შუამდგომლობა “პროკურორის აცილების შესახებ გაცხადებულია არაკანონიერად.”
“ახალგაზრდა იურისტთა ასოციაცია” №8 საპყრობილის დირექტორის მოადგილეს ალექსანდრე ჯანჯღავას იცავს. მისი უფლებების დამცველი გაგი მოსიაშვილის განცხადებით:
“ამ საქმეში ერთი მნიშვნელოვანი დეტალია. ეს გახლავთ პიროვნება, რომელმაც რეალურად დააწყნარა ციხე. საკანში თითოეულ პატიმართან ინდივიდუალურად შევიდა, მედია საშუალებებთან ერთად და გაანეიტრალა სიტუაცია, რაც იქ იმ პერიოდში ხდებოდა. თუ არ ვცდები 18 სექტემბერს გავრცელდა ციხის კადრები. ის ერთადერთი პიროვნება იყო, რომელიც სამსახურში დარჩა. ის იყო ადამიანი, რომელიც მედია საშუალებებს და მონიტორინგის ჯგუფს №8 ციხეში უწევდა მეგზურობას. შევიდა ყველა პატიმართან. 2012 წლის 15 დეკემბრამდე, ბატონი ალეკო თავის სამსახურეობრივ მოვალეობას აგრძელებდა. ამ ადამიანის მიმართ რომ ყოფილიყო აგრესია, წარმოიდგინეთ რა მოხდებოდა. ვფიქრობ, მის მიმართ ეს ბრალდება უნდა გაბათილდეს.”
კითხვაზე, _ცნობს თუ არა თავს დამნაშავედ ალეკო ჯანჯღავა წაყენებულ ბრალში “გურია ნიუსს” მოსიაშვილმა განუცხადა” “იცით რა მომენტი არის? იქ არსებობის და ყოფნის ფაქტს ადასტურებს. ის რომ მას არ მიუღია მონაწილეობა არაადამიანურ მოპყრობაში, არც ამდაგვარ საკითხებში, ჩვენ შევეცდებით სასამართლოში დავამტკიცოთ მისი უდანაშაულობა.”
ბრალდებულ ვლადიმერ ბედუკაძის ადვოკატის, ლალი აფციაური განმარტებით. “მიუხედავად საზოგადოების დიდი ინტერესისა, მოსამართლემ მიიღო გადაწყვეტილება და სასამართლო სხდომა დახურულად გამოაცხადა, რისი უფლებაც მას ჰქონდა.
“რაც შეეხება ჩვენს შუამდგომლობას მოსამართლის და პროკურორ ნადოის აცილებასთან დაკავშირებით, ამის სურვილი ჩვენი დაცვის ქვეშ მყოფმა ვლადიმერ ბედუკაძემ გამოთქვა. ვალდებულება გვქონდა დავთანხმებოდით მის მოთხოვნას.
ფუხაშვილის მიმართ მოთხოვნა იყო რომ, წლების მანძილზე მან არაერთი უკანონო განაჩენი დაადგინა და ის ვერ იქნებოდა ობიექტური. ანალოგიური დასაბუთება ითქვა აცილების თაობაზე პროკურორ ნადოის მიმართ. რა თქმა უნდა სასამართლომ არცერთი შუამდგომლობა არ დააკმაყოფილა”.
წამების და არაადამიანური მოპყრობის ბრალდებით, განსასჯელის სკამზე უსაფრთხოების განყოფილების ინსპექტორი ბორის ფარულავა ზის. “გურია ნიუსთან” მისი მშობლები აცხადებენ, არასამუშაო შაბათ დღეს იგი დასავლეთში, მამისეულ სახლში, მარტვილის მუნიციპალიტეტის ერთ-ერთ სოფელში მიდიოდა. ფარულავას გზაში დაურეკეს და იგი გზიდან მიბრუნდა და თბილისში დაბრუნდა. 5 დღის შემდეგ, ფარულავას მშობლებმა ტელევიზიით გაიგეს მისი დაკავების შესახებ.
ბორის ფარულავას ადვოკატი ლალი აფციაური “გურია ნიუსთან” აცხადებს: “დიახ, მე ვადასტურებ, რომ ფარულავა იმ დღეს არ მუშაობდა. უფრო მეტიც, ფარულავას იმ ტერიტორიაზე შესვლის უფლება არ ჰქონდა, სადაც ერთ-ერთი ცემის სპექტაკლი დადგეს. მას მხოლოდ გარე პერიმეტრზე მუშაობა ევალებოდა. შიგნით, საკნებთან მისვლის უფლება არ ჰქონდა. სწორედ ეს ბრალდებაა ერთ-ერთ ეპიზოდად წარდგენილი. რომელიც უშუალოდ ადეიშვილის დადგმული სცენარია.”
სასამართლო საქმის განხილვის დროს განსასჯელებს სამედიცინო დახმარება დასჭირდათ. აფციაურის განმარტებით:
“ექიმმა განსასჯელები ბორის ფარულავა და ლევან ფხალაძე გასინჯა. ეს ორი ადამიანი დაკავების წუთიდან შიმშილობს. მხოლოდ ჩაიზე და პურზე არიან. მათი ჯანმრთელობის მდგომარეობა საკმაოდ შერყეულია. ძალიან განიცდიან ყველაფერს”.
დააყენა თუ არა შუამდგომლობა სასამართლოში სხდომაზე განსასჯელმა გაგა მკურნალიძემ, ამასთან დაკავშირებით აფციაურმა განაცხადა: “ამ კონკრეტულ შემთხვევაში გაგამ აღიარა დანაშაული. განაცხადა, რომ წარდგენილ ბრალდებაში თავს დამნაშავედ ვცნობო. ჯერ-ჯერობით შუამდგომლობა არ დაუყენებია. “
