ზვიად ცომაია: “წლების მანძილზე ვმუშაობდი შინაგან საქმეთა სამინისტროში სხვადასხვა თანამდებობებზე, 1998 წლიდან 2007 წლის 19 იანვრამდე ვიმუშავე აბაშის შინაგან საქმეთა რაიგანყოფილებაში გამომძიებლის თანამდებობაზე. ჩემს წარმოებაში არსებულ რამდენიმე სისხლის სამართლის საქმეზე ჩემი სამართლიანი პოზიცია და მაშინდელი პროკურორის პოზიცია აცდა ერთმანეთს, ამის გამო მე მათთვის გავხდი მიუღებელი და მოსაშორებელი პიროვნება. რის გამოც საქართველოს შს სამინისტროს მაშინდელმა გენერალურმა ინსპექციამ მომიწყო ქრთამის აღების პროვოცირება, თითქოს მე, ვინმე ბენორ თოფურიას ქრთამის სახით გამოვძალე 500 ლარი. საქმე იმაშია, რომ არანაირი მტკიცებულება არ არსებობს, გარდა ამ თოფურიას და მისი სიძის, სოსო სიგუას ურთიერთგამომრიცხავი ჩვენებებისა. გარდა ამისა, საქმეში ფიგურირებდა დისკი, რომელზეც ვითომდა ასახული იყო ჩემს მიერ ქრთამის აღების ფაქტი. ციხეში გავატარე 3 წელი და 6 თვე. როცა გამოვედი, სენაკის სასამართლოში მოვითხოვე აღნიშნული დისკი არქივიდან. აღმოჩნდა, რომ მოცემული დისკი, რომლის საფუძველზეც ამდენი წელი უსამართლოდ გავატარე ციხეში, ცარიელია!
ახლა, როცა მთავრობა შეიცვალა, ამდენი გაუხსნელი ფაქტები გაიხსნა და ბევრ შემთხვევაში სიმართლე დამტკიცდა, შევიტანე საჩივარი გენერალური ინსპექციის წინააღმდეგ და სამართლიანობის აღდგენას მოვითხოვ.”
“გურია ნიუსმა” ინფორმაცია ბენორ თოფურიასთან გადაამოწმა. მან დაადასტურა, რომ ფიზიკური და ფსიქოლოგიური ზემოქმედების შედეგად ცრუ ჩვენება მისცა.
ბენორ თოფურია: – ეს ის პერიოდი იყო, როცა დაშინებით და ძალდატანებით ყველაფერს აგვარებდნენ. 2006 წლის ბოლოს დამაკავეს. ადრეც ვიყავი ნასამართლევი მარიხუანას გამოყენებისთვის და “პერვიჩნის” რომ ეძახიან, ის მქონდა. გამომძიებელმა მაშინვე ზვიად ცომაიას შესახებ მკითხა.
– რატომ გკითხათ, იცნობდით ცომაიას?
– კი, პირველი დაკავების დროს ჩემი საქმე ებარა და თან მეზობელია. როგორც კი უარი ვუთხარი, მე არ ვარ ის ადამიანი, ვინც სხვაზე უსაფუძვლოდ ცუდს იტყვის,-მეთქი, მაშინვე წამოვიდა ზეწოლა მათი მხრიდან.
– სად ხდება ეს ამბავი?
– გენერალურ ინსპექციაში. მეუბნებოდნენ, საქმეს თუ არ გააკეთებ, მზის შუქს არ დაგანახებთო. იარაღითაც მემუქრებოდნენ. 4 დღის განმავლობაში ისეთი ფსიქოლოგიური ზეწოლა ხორციელდებოდა ჩემზე, რომ ვერ გავუძელი.
– ვინ იყვნენ ეს პიროვნებები?
– სახელები არ ვიცი. რაც მე იქ ვიყავი, ერთმანეთს მხოლოდ ზედმეტსახელებით მიმართავდნენ. ისეთი ფსიქოლოგიური წნეხის ქვეშ ვიმყოფებოდი, არაფერი მახსოვს, მხოლოდ ერთის ზედმეტსახელი დავიმახსოვე _ “ჩაფურა”. სწორედ ის იყო, იარაღით რომ მემუქრებოდა. მოკლედ, მე გამოვედი ცრუ ბრალდებით და ზვიად ცომაია დაიჭირეს. ძალიან მინდა სამართლიანობის აღდგენას დავეხმარო და ჩემი სათქმელი ვთქვა _ სწორედ ამიტომ ხმამაღლა ვაცხადებ, რომ ეს ყველაფერი იყო ბლეფი, ტყუილი.
