ჯანდაცვის მინისტრი ლანჩხუთს ეწვია

მას თან ახლდნენ პარლამენტში ჯანდაცვის კომიტეტის თავმჯდომარე დიმიტრი ხუნდაძე და ჩოხატაურის მუნიციპალიტეტის მაჟორიტარი დეპუტატი თემურ ჭკუასელი.

მინისტრი გურიის რეგიონის სამედიცინო პერსონალს შეხვდა და ადგილზე არსებულ პრობლემებს გაეცნო. შეხვედრა კითხვა-პასუხის რეჟიმში წარიმართა და ორი საათი გაგრძელდა.

ვინაიდან საქართველოში 28 თებერვლიდან დაფინანსდა ახალი სადაზღვევო სისტემა, ამუშავდა ფონდი, რომელმაც აიღო პასუხისმგებლობა 2 200 000 მოქალაქის დაზღვევაზე, ახალი სისტემის მიმართ გაჩენილ კითხვებზე სასაუბროდ მინისტრი რეგიონებს თავად სტუმრობს.

დავით სერგეენკო: “ჩემი ჩამოსვლის მიზანი იყო შევხვედროდი ყველას, მივხედო ყველა რაიონს და თითოეულ იმ დაწესებულებას, რომელიც ადგილზეა; დავადგინო ყველა ის პრობლემა, რომელიც არსებობს. ეს არის იმ პროგრამის ნაწილი, რომელიც დავიწყეთ და ეძღვნება ყველა სახელმწიფო დაწესებულების შემოვლას. რაც შეეხება ამ კონკრეტულ შეხვედრას გურიის სამედიცინო საზოგადოებასთან, გაკვირვებული დავრჩი _ უამრავი პრობლემა დაგროვდა სოფლის ექიმთან მიმართებაში, ძალიან პრობლემური თემაა და უნდა შევეცადოთ ფორსირებულად მოვაგვაროთ.”