“მართლა ნუ დავკარგავთ ყველაფერს, რაღაცეები გაკეთდა სააკაშვილის დროსაც, თუმცა ჩემი აზრით, ადამიანის უფლებები კიდევ უფრო უკან წავიდა. მაგრამ ეს ჩვენი საზოგადოებაა, ჩვენ ავირჩიეთ სააკაშვილი და ეიფორიაში ვიყავით, მათ რიცხვში მეც ყველაზე მეტადაც თუ გნებავთ. ჩვენ რომ გვქონოდა უფრო მაღალი პოლიტიკური კულტურა, მას ამდენის უფლებას არ მივცემდით.. ეხლა კი ნურც ჩვენგან ითხოვენ ზედმეტად და ნუ ცდილობენ, რომ აბა მიდით ეხლა, მიაწექით და რაც შეიძლება სწრაფად დასაჯეთ და რაც შეიძლება მეტი, ეს არ არის მარტო სააკაშვილის ან ჩემი ბრალულობა, თუმცა ერთ-ერთი ბრალეული ვარ მეც. კეთილი ვინებოთ და ისე მოვახერხოთ, რომ მესამე პრეზიდენტიც კი არ გავაგდოთ, არამედ სახე შევინარჩუნოთ ევროპის და ამერიკის წინაშე.“ _ განაცხადა ბიძინა ივანიშვილმა ტელეკომპანია “იმედთან” ინტერვიუში. პრემიერ-მინისტრის განცხადებით, დღეის მდგომარეობით, პროკურატურაში 7 ათასზე მეტი საჩივარია შესული, თუმცა ამდენი ადამიანის დასჯა წარმოუდგენელია.
“როდესაც ჩვენ ვამბობთ, რომ უნდა შევინარჩუნოთ ჩვენი საზოგადოების ყევლა წევრი, არ ვგულისხმობ რომ სამართლიანობა არ უნდა აღდგეს. რა თქმა უნდა, აუცილებლად უნდა დაისაჯონ, მაგრამ რაც შეიძლება ნაკლები. წარმოიდგინეთ, პროკურატურაში 7 ათასი საჩივარია, წარმოიდგინეთ 7 ათასი კაცი რომ დაისაჯოს რა მოხდება. საქართველო დიდი სოფელია და არ დარჩება ოჯახი, სადაც ვინმე არ დაისჯება. მე არ ვუკარნახებ პროკურატურას, რომ ეს განცხადებები არ განიხილოს, ამიტომ ვთხოვ უმცირესობას შეცვალონ რიტორიკა, რომ ჩაცხრეს საზოგადოება”.
ბიძინა ივანიშვილის თქმით, მან პრეზიდენტ სააკაშვილს რიტორიკის შეცვლა ურჩა, რათა საზოგადოების აგრესიული განწყობა თანდათანობით ჩაცხრეს.
“სააკაშვილის პოზიცია ასეთია: მან თქვა, ნუ ჩათვლით რომ მაგის გვეშინია, პირიქით, უგულავა და მერაბიშვილი სიამოვნებით ჩაჯდებიანო. ამ კაცს სურს, რომ მისი გუნდიდან რაც შეიძლება მეტი ჩაჯდეს და საერთაშორისო საზოგადოებას აჩვენოს თუ რა ბოროტები ვართ” _ განაცხადა ბიძინა ივანიშვილმა.
