ადგილობრივების განმარტებით, 55 ჰექტარი ფართობის მიწა კერძო კომპანია ,,აგრო ჯორჯიამ“ შეისყიდა და სოფელი საძოვრების გარეშე დარჩა.
გიგლა ხვიჩია: “ეს ტერიტორია აერთიანებს სამ სოფელს – ხიბულას, საჯიჯაოს და ზუბის ტერიტორიას. „აგრო ჯორჯიამ“ შეიძინა მიწის ეს ნაკვეთი და მოსახლეობა ვრჩებით საძოვრების და სამოსახლო მიწების გარეშე. შემოღობვას რომ დაიწყებს, ჩვენი საქონელი მშიერი დარჩება. ეს მიწა არის ჩვენი საარსებო წყარო, გლეხი საქონელზე და მოსავალზეა დამოკიდებული, ამიტომ ვითხოვთ ამ ტერიტორიის უკან სოფლებისთვის დაბრუნებას.”
არის თუ არა შესაძლებელი მოსახლეობის მოთხოვნის დაკმაყოფილება? ამ საკითხის გასარკვევად „გურია ნიუსი“ ხობის მუნიციპალიტეტის რწმუნებულს საჯიჯაოს თემში ავთანდილ კვარაცხელიას დაუკავშირდა.
ავთანდილ კვარაცხელია: – აღნიშნულ ტერიტორიაზე ადრე იყო ჩაის პლანტაციები, შემდეგ სოფელი ხმარობდა საძოვრად, მაგრამ მიწა ეკონომიკის სამინისტროს მიერ გაიყიდა .
– ბატონო ავთანდილ, ეს მიწა საძოვრად იყო დარეგისტრირებული თუ სასოფლო-სამეურნეო დანიშნულების იყო?
– არა, საძოვრად არ იყო დარეგისტრირებული, თორემ არ გაიყიდებოდა. კანონი კრძალავს საძოვრის გასხვისებას. ვადასტურებ, რომ ეს მოსახლეობისთვის დიდი პრობლემაა, მაგრამ, სამწუხაროდ, ვერაფერში ვეხმარებით, რადგან ჩვენს კომპეტენციას სცილდება. როგორც მოსახლეობისგან ვიცი, ისინი შეხვდნენ „ფერეროს“ წარმომადგენლებს და მიწის ამჟამინდელ მფლობელს უთქვამს, რომ თუ სხვაგან გამოიძებნება ალტერნატიული ფართი, თანახმა იქნება მოსახლეობას შესყიდული მიწა დაუბრუნოს, თუმცა, ოფიციალურად არ ყოფილა ამაზე საუბარი. ეს საკითხი შესასწავლია და ჩვენ მზად ვართ მოსახლეობის გვერდით დავდგეთ. სამწუხაროდ, ადგილობრივი ხელისუფლება საკითხის გადაჭრას ვერ შეძლებს, ჩვენ მიწებს ვერ ვეხებით.
