_ ისინი სამსახურში აღდგენასა და ცენტრის დირექტორის კახა ჩიხრაძის გადადგომას მოითხოვენ. როგორც მოშიმშილეები ამბობენ, “ცენტრის დირექტორმა, კახა ჩიხრაძემ მოსვლის დღიდან გადაწყვიტა, რომ თბილისის სასწრაფოები ემუშავებინა საკუთარ რეჟიმში, რაც ნიშნავს იმას, რომ პაციენტები გადაჰყავს არაპროფილურ საავადმყოფოებში.
“ის არასწორ მენეჯმენტს ატარებდა და მითითება მივეცით. სწორედ ამიტომ, საინიციატივო ჯგუფის წარმომადგენლები, პროფკავშირების თავმჯდომარე და ერთ-ერთი ფილიალის მენეჯერის მოადგილე, გაგვათავისუფლა სიტყვის თავისუფლების გულისთვის. პირველად ერთი კვირის წინ გააკეთა განცხადება, მაგრამ შემდეგ თქვა, რომ ეს აფექტის მდგომარეობაში გააკეთა და გუშინ კი ბრძანებით გაგვათავისუფლა ისე, რომ არც კი აუხსნია მიზეზი. არაფრით შევწყვეტთ შიმშილობას მანამ, სანამ არ დაკმაყოფილდება ჩვენი მოთხოვნები,” _ აცხადებენ მოშიმშილეები.
გათავისუფლებულ ექიმებთან დაკავშირებით კომენტარი გააკეთა სასწრაფო სამედიცინო დახმარების ცენტრის დირექტორმა კახა ჩიხრაძემ. მისი თქმით, სამ მათგანს ხელშეკრულება დაუმთავრდა, ერთი კი განთავისუფლებულია შიგაგანაწესის დარღვევის გამო. ჩიხრაძე ყოფილ კოლეგებს დავის სასამართლოში გადატანას სთავაზობს და თუ სასამართლო დაადგენს, რომ ისინი უნდა აღდგნენ სამსახურებში, მაშინვე დააბრუნებს.
დღეს მოშიმშილეები თბილისის საკრებულოს ფრაქცია “ქართული ოცნება – დემოკრატიული საქართველოს” თავმჯდომარემ, ზაზა გაბუნიამ მოინახულა.
ზაზა გაბუნია: “პირველ რიგში მორალური მხარდაჭერა გამოვუცხადე. ეს ადამიანები განსხვავებული აზრის გამო სასწრაფო სამედიცინო სამსახურის ხელმძღვანელობის უკანონო გადაწყვეტილებას შეეწირნენ. მათ მიმართეს პროტესტის უკიდურეს ფორმას, რადგან დაირღვა და უგულებელყოფილი იქნა მათი უფლებები და ინტერესები. 2 დღეა შიმშილობენ და ამასთან უყურადღებოდაც იყვნენ. რაც შეეხება შეხვედრის მიზანს, ვისაუბრეთ, გამაცნეს საკითხი. მომავალ კვირაში ფრაქციის გაფართოებულ სხდომაზე დავიბარებთ მერიის პასუხისმგებელ პირებს და სასწრაფოს ხელმძღვანელობას, ასევე დაესწრება გათავისუფლებული ექიმებიც. იქ შევეცდებით მოშიმშილეების უფლებების აღდგენას და დაცვას. ვადასტურებ, რომ, ექიმები უკანონოდ არიან სამსახურიდან გათავისუფლებულები და ჩვენი ფრაქცია ყველაფერს გააკეთებს, რათა აღარ მოუწიოთ შიმშილობა და აღდგეს მათი უფლებები”.
