აღსანიშნავია, რომ მოწვეულ სტუმრებს შორის ბევრი იყო უახლოეს წარსულში “ნაცმოძრაობის” მხარდამჭერები.
ზვიად კვაჭანტირაძის თქმით, ეს შეხვედრა იმიტომ შედგა, რომ მას აინტერებს ხალხის აზრი, რა პრობლემები აწუხებთ მათ. აღსანიშნავია, რომ მსგავსი მასშტაბის შეხვედრა მან პირველად არჩევნების შემდეგ, 8 მარტს მოაწყო. დეპუტატმა შეხვედრაზე ბევრ საკითხზე გაამახვილა ყურადღება.
ზვიად კვაჭანტირაძე: _ მე გულწრფელად გეტყვით ჩემს აზრს საკრებულოსთან დაკავშირებით. მე მზად ვარ, ვითანამშრომლო იმ საკრებულოსთან, რომელიც დღეს გვყავს სახეზე. ჩემი უდიდესი სურვილია, რომ ოზურგეთის საკრებულო იმ შემადგენლობით, რომელიც დღეს არის, რაც შეიძლება მალე შეიცვალოს, მაგრამ არსებობს რეალობა, რომელსაც ვერ გავექცევით და რომელიც ოზურგეთის დონეზე გადასაწყვეტი არ არის. ეს არის ის, რომ ჩვენ უნდა დაველოდოთ აუცილებლად მომავალ ადგილობრივ არჩევნებს, რომელიც დაგეგმილია 2014 წლის გაზაფხულზე. დარწმუნებული ვარ, რომ დღევანდელ გამგეობაში ძალიან ბევრი პატიოსანი ადამიანი მუშაობს, ესეც იქნება ხალხის გადასაწყვეტი. მთავარი ადგილობრივი თვითმმართველობის რეფორმაში იქნება ის, რომ ყველა დონეზე იქნება არჩევითი. ხალხის აზრის გათვალისწინების გარეშე, საკრებულოს დეპუტაცია არ იქნება არჩეული. უფრო სწორად, საკრებულო ერქმევა სახელად, მაგრამ იქნება სამხარეო დონე, იქნება მუნიციპალური დონე და იქნება სოფლის დონე. სამივე დონე იქნება არჩევითი. სამხარეო დონე იქნება ცოტა განსხვავებული, ანუ არჩევითი. ხელმძღვანელობა არ იქნება პირდაპირი გზით დანიშნული.
რაც შეეხება ოზურგეთს, დღეს გვაქვს საკრებულო, გვყავს გამგებლის მოვალეობის შემსრულებელი და გვყავს ადამიანები, რომლებიც მუშაობენ გამგეობაში. ისინი ელოდებიან იმას, როდის გაუშვებენ სახლში. ზოგიერთი, შეიძლება სულაც არ იყოს სახლში გასაშვები, მაგრამ დღემდე ძალიან ბევრი ადამიანი ვიცი, რომ ამის მოლოდინში ათენებს და აღამებს. გეტყვით, რომ არცერთ ადამიანს არ უნდა ჰქონდეს ღელვის საფუძველი, მაგრამ სიტუაცია ამასთან დაკავშირებით, გამოსასწორებელია. ამიტომ, მე პირადად, ვარ იმის მომხრე, რადგანაც რადიკალური ცვლილებები მოხდა ცენტრალურ ხელისუფლებაში, ასეთივე ცვლილებები ადგილობრივ მუნიციპალიტეტებშიც გახორციელდეს. ამის ყველაზე სამართლიანი გზა კი იქნება ატესტაცია სახელმწიფო სამსახურში. მე იმედი მაქვს, რომ ამ საკითხების გადაწყვეტა ოზურგეთში დაიწყო. დიდი ხანი იყო ჭიდილი იმასთან დაკავშირებით, რომ გარდაუვალ აუცილებლობას ვერავინ გაექცევა.
მე მინდა, გითხრათ ერთი რამ, რომ მომავალი თვითმმართველობის რეფორმით, დაგეგმილია ქალაქ ოზურგეთის თვითმმართველ ქალაქად გამოცხადება, რომელსაც ეყოლება პირდაპირი გზით არჩეული მერი.” – განაცხადა კვაჭანტირაძემ.
