საზოგადოების ყურადღება სხვა საკითხებთან ერთად, “ნაციონალური მოძრაობის” მიერ დაანონსებული 19 აპრილის მიტინგისკენ არის მიმართული.
“გურია ნიუსის” სტუმარია “ქართული დასის” ლიდერი ჯონდი ბაღათურია.
ჯონდი ბაღათურია: _ ნურავის ნურაფრის ნუ ეშინია. სააკაშვილის და მისი ბანდის მომავალი სამართლიანი სასამართლოს წინაშე წარდგომაა… კარგი იქნებოდა, რომ ყველა ჩვენი კოლეგა საპარლამენტო უმრავლესობიდან ისე ხშირად ხვდებოდეს ხალხს და ამის განმარტებას აძლევდეს ისევე აქტიურად, როგორც ამას უმრავლესობის ერთი ნაწილი აკეთებს. სად ნახეთ შიში? შიში სირცხვილია, თანაც ამ კურდღლების შიში ხომ საერთოდ! მოსახლეობის დაბნეულობას იწვევს არაინფორმირებულობა, ამიტომაცაა საჭირო მეტი მუშაობა ხალხთან… ზოგი ამას აკეთებს, ზოგი არა. უკეთესი იქნებოდა რომ ყველა ასრულებდეს თავის მოვალეობას ისე, როგორც საჭიროა.
_ როგორც ბოლო დღეებმა აჩვენა, მერაბიშვილის სახით, “ნაციონალური მოძრაობა” გააქტიურდა. შუალედური არჩევნებისთვისაც ემზადებიან და ხალხს 19 აპრილის აქციაზეც იწვევენ.
_ მერაბიშვილი მართლაც იმიტომ დადის, რომ ხალხი მოაგროვოს და მერე იმ ხალხს პროვოკაცია მოუწყოს… მაქვს ინფორმაცია, რომ სააკაშვილი და მისი გარემოცვა გეგმავს იქ პროვოკაციას, ცემა-ტყეპის ინიცინირებას და მერე კივილ-წივილის ატეხვას, რომ გვდევნიანო და ამის გამოყენებას მთავრობის და პარლამენტის დასათხოვად. ამას გააკეთებენ, ხალხი ბევრი იქნება თუ ცოტა. რა უნდა ხალხში რამდენიმე პროვოკატორის შეგზავნას და ცემა-ტყეპის ატეხვას?! რაც შეეხება ხალხის რაოდენობას, ამას მეც ინტერესით ველოდები, რადგან მაინტერესებს რამდენი ადამიანია ამათ ჭკუაზე და რამდენი ადამიანი უჭერს მხარს საუკუნის იმ სირცხვილს, რასაც “ნაციონალური მოძრაობა” აკეთებდა და საერთოდ რა სირცხვილის სიმბოლოდაც იქცა მიშა და მისი ბანდა.
_ მაინც, როგორ ფიქრობთ, რამდენი ადამიანი მივა 19 აპრილის აქციაზე?
_ იმედია რამდენიმე ასეული და მეტი არა.
_ 14 აპრილს პოლიტპატიმრების აქციის შემდეგ, შეიძლება 19 აპრილის აქცია არ გაიმართოს?
_ არ მგონია, ამის გამო ნაცებმა აქცია აღარ გამართონ, პირიქით, მაგათ ახლა ასეთი ფონი აწყობთ იმისთვის, რომ თავისივე მოწყობილი პროვოკაცია მთავრობას დააბრალონ და თქვან, აი ასეთი ამბები უძღოდა წინ ჩვენს აქციას და ამიტომაც მოხდა ეს ამბავიო.
– ეს ყველაფერი რა გავლენას მოახდენს შუალედურ არჩევნებზე?
_ ეს ვერანაირ გავლენას ვერ მოახდენს, თუ შუალედური არჩევნები ჩატარდა, თუმცა, მე მაინც არ მშორდება აზრი, რომ მიშა სრულიად უაზროდ მოიქნევს ნაჯახს _ დაითხოვს მთავრობას და გამოაცხადებს საგანგებო მდგომარეობას. ამით საკმაოდ ცუდ განაჩენს გამოუტანს საკუთარ თავს.
_ რას გულისხმობთ?
_ ხალხის მოთმინების ფიალა სავსეა და თუ მიშა ამას გააკეთებს, მაშინ ხალხი ქუჩაში გამოვა და ძნელი იქნება აბობოქრებული ტალღის შეჩერება.
_ რადგან არჩევნებს შევეხეთ, თქვენი ერთი კონკურენტი უკვე ცნობილია _ სოსო მანჯავიძე. სხვების ვინაობა ხომ არ იცით და როგორია თქვენი პროგნოზი?
_ ჩემი კონკურენტი ცნობილი ვერ იქნება, რადგან სად ვიყრი კენჭს და ვიყრი თუ არა საერთოდ, გადაწყვეტილი არ მაქვს საბოლოოდ. ისე, ცოდნით,საზოგადოების მე ბევრი რამე ვიცი.
_ როგორც საზოგადოებისთვის ცნობილია, თქვენ ნაძალადევში იყრით კენჭს…
_ არ გამოვრიცხავ, რომ ნაძალადევში. არ მინდა მოვლენებს გავუსწრო, ამაზე შემდეგ ვისაუბროთ.
