სწორედ ამიტომ, დღეს გამართულ საკრებულოს სხდომაზე საკრებულოს თავმჯდომარემ სენაკის გამგებლის, თენგიზ ადამიას თანამდებობიდან გათავისუფლების შესახებ საკითხი გაიტანა, თუმცა, საკრებულოს 23 დეპუტატიდან აღნიშნულ საკითხს მხარი მხოლოდ სამმა დეპუტატმა დაუჭირა, ექვსი დეპუტატი გამგებლის გადაყენების წინააღმდეგ წავიდა, ხოლო დანარჩენმა დეპუტატებმა თავი შეიკავეს.
სხდომის დამთავრების შემდეგ მურთაზ შამათავამ განაცხადა: “მე გამგებლის მუშაობას არადამაკმაყოფილებლად ვაფასებ. მეტიც, მას არაფერი გაუკეთებია რაიონისთვის და მიმაჩნია, რომ აუცილებლად უნდა გადადგეს, მაგრამ მხოლოდ ჩემი შეხედულებით ვერაფერს შევცვლი. როგორც იცით, გადაწყვეტილების მისაღებად ხმათა უმრავლესობაა საჭირო, დღეს კი ხმა ამ გადაწყვეტილებას მხოლოდ სამმა დეპუტატმა მისცა”.
“გურია ნიუსთან” ამ საკითხზე კომენტარი გააკეთა “ქართული ოცნება _ დემოკრატიული საქართველოს” წევრმა ინგა ქარდავამ: “გამგებელი თენგიზ ადამია რაიონის მაჟორიტარი დეპუტატის, გურამ მისაბიშვილის დეიდაშვილია და სწორედ ეს უკანასკნელი მფარველობს მას. მისაბიშვილი საკრებულოს წევრებს ურეკავს და აფრთხილებს, მე “ქართულ ოცნებას” წარმოვადგენ, დეპუტატებისგან მწვანე შუქი მაქვს ანთებული და სენაკის გამგებლის წინააღმდეგ ნუ წახვალთო. დარწმუნებული ვარ, სწორედ ამ ზარებმა ითამაშა დიდი როლი საკრებულოს დეპუტატებზე. მე სენაკელების აზრს გეტყვით _ სენაკზე მისაბიშვილის და ადამიას კონტროლს ნამდვილად არ დავუშვებთო _ ამბობს მოსახლეობა.”
თავად გამგებელი თენგიზ ადამია აცხადებს, რომ არანაირ ზარებს მისაბიშვილის მხრიდან ადგილი არ ჰქონია და გადადგება მხოლოდ იმ შემთხვევაში, თუ თანამდებობას მურთაზ შამათავაც დატოვებს, რადგან გამგებელიც უარყოფითად აფასებს საკრებულოს თავმჯდომარის მუშაობას.
