ჩვენი წყაროს ინფორმაციით, მან უკვე პრემიაც აიღო 3 000 ლარის ოდენობით.
ჩვენი ინფორმაციით, თანამდებობიდან გათავისუფლდებიან ჩოხატაურის რაიონული სამმართველოს უფროსი გია დოლიძე და მისი მოადგილე მალხაზ მამალაძე. მათ, როგორც ჩვენმა წყარომ გვითხრა, სავარაუდო მიზეზად დანაშაულების დაფარვას წაუყენებენ.
ჩვენი წყაროს ინფორმაციითვე, გია დოლიძის თანამდებობიდან გათავისუფლებას, ჩოხატაურის მაჟორიტარი დეპუტატის მხრიდან განაწყენება მოჰყოლია _ მას დაურეკავს გოჩა ფერსაშვილისთვის და განუცხადებია, გია დოლიძე ჩემი კადრი იყო და რატომ არაფერი არ მკითხეო.
აღსანიშნავია ისიც, რომ გავრცელებული ინფორმაციით, გოჩა ფერსაშვილი პარტია “ქართული ოცნება _ დემოკრატიული საქართველოს”, ოზურგეთის რაიონული ორგანიზაციის თავმჯდომარეს, დავით დარჩიას და სხვა წევრებს არ მოსწონთ. წყაროსვე თქმით, გურიის სამხარეო მთავარი სამმართველოს უფროსს გოჩა ფერსაშვილს და ლანჩხუთის რაიონული სამმართველოს უფროსს, გოჩა ჟღენტს პრემიერ-მინისტრის, ბიძინა ივანიშვილის ძმა ადიკო ივანიშვილი ლობირებს.
ჩოხატაურის რაიონული სამმართველოს უფროსად, “გურია ნიუსის” ინფორმაციით, ოზურგეთის რაიონული სამმართველოს უფროსის, ალექსანდრე ჭანუყვაძის მოადგილე აკაკი მაისურაძე ინიშნება, რომელიც ამ პოსტზე 2013 წლის იანვრის ბოლოს დაინიშნა.
1982 წელს დაბადებული აკაკი მაისურაძე წარმოშობით რაჭის ქალაქ ონიდანაა. ის შინაგან საქმეთა სამინისტროში სხვადასხვა თანამდებობაზე მუშაობდა, იყო იმერეთის, რაჭა-ლეჩხუმისა და ქვემო სვანეთის სამხარეო მთავარი სამმართველოს ამბროლაურის რაიონული სამმართველოს უფროსი, ბოლოს კი ხარაგაულის სამმართველოში მუშაობდა.
აკაკი მაისურაძის შესახებ ინტერნეტში რამდენიმე მედიასაშუალება ავრცელებს ინფორმაციას, რომლის მიხედვით, ის ადამიანების ფიზიკურ შეურაცხყოფასა და ცემაშია მხილებული. ერთი ფაქტი სახალხო დამცველის ანგარიშშიც მოხვდა: “სახალხო დამცველი სოზარ სუბარი შინაგან საქმეთა სამინისტროსა და გენერალურ პროკურატურას მოუწოდებს, აქტუალურ საკითხად აქციონ სამართლებრივი სტრუქტურების თანამშრომელთა მიერ, ადამიანებისთვის ფიზიკური ზეწოლისა და წამების ფაქტებზე რეაგირება.
სუბარის თქმით, წამების მსხვერპლზე ზეწოლა მანამდე გრძელდებოდა ხოლმე, სანამ დაზარალებული პირი არ შეწყვეტს ჩივილს.
ერთ-ერთი ასეთი ფაქტი 2007 წლის ოქტომბერში მოხდა ონის რაიონის სოფელ ქვედში, სადაც სიტყვიერი შეურაცხყოფისა და ურთიერთშელაპარაკების ნიადაგზე, ონის რაიონული განყოფილების უფროსის მოადგილემ აკაკი მაისურაძემ და მასთან მყოფმა განყოფილების ორმა თანამშრომელმა სასტიკად სცემეს სოფელ ქვედის მკვიდრი ლევან მაისურაძე.
ცემის ფაქტის თვითმხილველები არიან მამა-შვილი გოჩა და ზვიად ქისტაურები, რომლებმაც უგონო მდგომარეობაში მყოფი ლევან მაისურაძე, მისი ძმის სახლში გადაიყვანეს.
სოზარ სუბარის ინფორმაციით, ლევან მაისურაძე ჯანმრთელობის გაუარესების გამო თვეზე მეტხანს მკურნალობდა თბილისში.
აღსანიშნავია, რომ აკაკი მაისურაძე და მისი ორი თანამშრომელი, ინციდენტამდე ერთი საათით ადრე ავტომატური ცეცხლსასროლი იარაღითა და გინებით, ლევან მაისურაძის ძმის ჯემალ მაისურაძის სახლშიც შეცვივდნენ და ლევან მაისურაძის მოკვლით იმუქრებოდნენ.
სუბარის თქმით, ეს შემთხვევა ძალიან ჰგავს სანდრო გირგვლიანის საქმეს, მაგრამ საბედნიეროდ, ლევან მაისურაძე ცოცხალი გადარჩა.”
სახალხო დამცველი შსს-ს და გენპროკურატურას მოუწოდებდა, ონის პოლიციის თანამშრომელთა ქმედების შესწავლა დაეწყოთ.
თავად მაისურაძე “გურია ნიუსთან” ადასტურებს, რომ ნამდვილად ის პოლიციელია, რომელიც სოზარ სუბარის განცხადებაში იყო მოხსენიებული, თუმცა, აღნიშნავს, რომ მაშინ მისი საქმე საფუძვლიანად შეისწავლეს და მისი უდანაშაულობაც დაამტკიცა.
ჩვენ დავუკავშირდით, ჩოხატაურის რაიონული სამმართველოს უფროსს გია დოლიძეს, რომელმაც სამსახურიდან მისი გათავისუფლების შესახებ არაფერი იცოდა.
_ ვერაფერს გეტყვით, აზრზე არ ვარ, არაფერი არ ვიცი, _ გვითხრა დოლიძემ.
“გურია ნიუსი” დაუკავშირდა შსს გურიის სამხარეო მთავარი სამმართველოს უფროსს გოჩა ფერსაშვილს.
_ ბატონო გოჩა, როგორც გავიგეთ, თანამდებობიდან გათავისუფლდა ჩოხატაურის პოლიციის უფროსი.
_ ჯერ, არა.
_ ჩვენი ინფორმაციით, გია დოლიძის ადგილზე ოზურგეთის რაიონული სამმართველოს უფროსის მოადგილე აკაკი მაისურაძე ინიშნება.
_ ჯერ არ არის გადაწყვეტილი, თქვენ თუ ამ დონეზე იგებთ ინფორმაციებს, დარწმუნებული ვარ, მაგასაც გაიგებთ.
_ ბატონო გოჩა, ჩვენი ინფორმაციით, ჩოხატაურის პოლიციის უფროსის გათავისუფლებასთან დაკავშირებით ჩოხატაურის მაჟორიტარმა დეპუტატმა თემურ ჭკუასელმა საყვედური გითხრათ.
_ არაა ეგ სიმართლე.
_ 3 000 ლარი პრემია უკვე აიღეთ, ესეც არ არის სიმართლე?
_ რაც სამსახურთან არის დაკავშირებული, ძალიან გთხოვთ, აწი მე აღარ მკითხოთ, მიმართეთ პრესსამსახურს, _ გვითხრა ფერსაშვილმა.
ჩოხატაურის მაჟორიტარი დეპუტატი თემურ ჭკუასელი “გურია ნიუსთან” აღნიშნავს, რომ სატელეფონო საუბარი მასსა და სამხარეო პოლიციის უფროსს შორის მართლაც შედგა.
_ ბატონო თემურ, როგორც გავიგეთ, ჩოხატაურის პოლიციის უფროსის გია დოლიძის გათავისუფლების გამო უკმაყოფილო ხართ და ამის შესახებ საუბარიც გქონდათთ გურიის სამხარეო მთავარი სამმართველოს უფროსთან, გოჩა ფერსაშვილთან…
_ ვინ გითხრათ ამის შესახებ, თვითონ გიამბოთ?
_ ვინ გვითხრა, ნამდვილად ვერ გეტყვით, ბატონო თემურ!
_ აბა, ისე როგორ გითხრათ?
_ იქნებ, მაინც გვითხრათ?
_ კარგით, გეტყვით. მე, უბრალოდ, ვკითხე, მაინტერესებს მიზეზი, რატომ თავისუფლდება,-მეთქი, ეს ჩვეულებრივი მომენტია. რა თქმა უნდა, შინაგან საქმეთა სამინისტროს გადაწყვეტილებებში არ ვერევი, მაგრამ თავის დროზე რეკომენდაცია გავუწიე ამ პიროვნებას, ესე იგი პასუხისმგებლობის გრძნობაცაა, არა? ამიტომ თუ რამე დააშავა, ხომ უნდა ვიცოდე,-მეთქი? ეგ იყო და ეგ. მე რამდენადაც ვიცი, ეს საკითხი გადაიდო.
