განსაკუთრებით მას შემდეგ, რაც სოფელ შუხუთში გამართულ პრაიმერს წინ კანდიდატთა დაპირისპირება უძღოდა. ეს დაპირისპირება დღესაც კი უკვე დაუფარავად გრძელდება, რაზეც “გურია ნიუსთან” ღიად საუბრობენ კოალიციაში შემავალი სამი პარტიის წარმომადგენლები და მიზეზად სწორედ ადგილობრივ თვითმმართველობებში ვაკანსიის დაკავებისას ბალანსის დარღვევა და “ქართული ოცნების” მიერ არასასურველი კადრის დასახელება მოჰყავთ. გიორგი გეგიაძემ ისიც განაცხადა, რომ თავდაპირველი უკმაყოფილება მისი გუნდით პარტიის ხელმძღვანელად მოსვალამაც გამოიწვია. კოალიციის განხეთქილებას ადასტურებს, ერთ-ერთი პრაიმერის ჩატარებისას, ლანჩხუთის გამგებლის მოვალეობის შემსრულებლის ზაზა ურუშაძის კომენტარიც: “მე მაქვს უფლება დავნიშნო რწმუნებული, მაგრამ ვითვალისწინებ რა ხალხის აზრს, რათა არ მოხდეს დაპირისპირება კოალიციაში, მიზანშეწონილად ჩავთვალე, პრაიმერი დამენიშნა.”
_ მე ბევრჯერ მითქვამს და კიდევ ერთხელ გავიმეორებ, რომ ნებისმიერ კოალიციაში მუშაობა არის ძალიან რთული, მაგრამ რამდენადაც რთულია, იმდენად საპატიო, ანუ კოალიციაში შემავალი პოლიტიკური სუბიექტების უპირველესი მოვალეობაა ნაკლები დანაკარგებით გავუძღვეთ საქმეებს, _ თქვა “რესპუბლიკური პარტიის” ეროვნული კომიტეტის წევრმა რომან ბიწაძემ, _ კოალიციის წევრი პარტიები ვცდილობთ, რაც შეიძლება ნაკლები პრობლემა შეხვდეს “ოცნებას” სამომავლოდ _ თუ “ქართულ ოცნებას” პრობლემები ექნება, მაშინ კოალიციასაც შეექმნება პრობლემები. სამწუხაროდ, ამ სიჭრელის ფონზე თავს იჩენს ამბიციები და ეს უკვე სხვა სუბიექტების პოლიტიკურ ინტერესებს უკავშირდება, ანუ ამბიციის გამო ცდილობენ, ბევრ ვაკანსიაზე მათთვის სასურველი კანდიდატურები წააყენონ. მე ადრეც ვამბობდი და დღესაც ვამბობ _ საქართველოს “რესპუბლიკური პარტიის” რაიონული ორგანიზაცია მზად არის ნებისმიერი რგოლი დააკმაყოფილოს. ჩვენ გვყავს კვალიფიცირებული კადრები, უბრალოდ, სხვებისაგან განსხვავებით, შეიძლება განცხადებებით არ დავრბოდეთ, არ ვიგინებოდეთ და ასე არ ვიქცევდეთ საზოგადოების ყურადღებას. მაგრამ იმედი გვაქვს, რომ ჩატარდება კონკურსები და იქ გამოჩნდება “შავი” და “თეთრი”. თუ ობიექტურად ჩატარდება ის კონკურსები, ჩვენი პარტიის წევრები ღირსეულად დაიკავებენ ღირსეულ თანამდებობებს. მალე მესამე თვე გახდება, რაც ბატონი ზაზა გამგებლის მოვალეობის შემსრულებლად არის არჩეული. ფაქტობრივად, ამ სამი თვის მანძილზე მხოლოდ ორი ცვლილებაა _ მოადგილედ დაინიშნა ვახტანგ ზენაიშვილი, ხოლო თენგიზ ხელაძე _ ინფრასტრუქტურის სამსახურის უფროსად. აქედან გამომდინარე, სახეზე გვაქვს ადგილობრივი ხელისუფლების კრიზისი. ადგილებზეც, საშუალო რგოლებში გვრჩება ადამიანების ის კატეგორია, ვინც ნებით თუ უნებლიეთ, ნაციონალური მოძრაობის წისქვილზე ასხამდნენ წყალს. დღეს, ის ხალხი, ბუნებრივია, ვერ მოახდენენ შიდა გარდაქმნას. დღეს ლანჩხუთში ასეთი მდგომარეობაა _ გამგეობა, რომელიც აღმასრულებელი ხელისუფლება უნდა იყოს, დაკავებულია პოლიტიკური საქმიანობით, როგორიცაა, ამა თუ იმ სოფელში ვინ იქნება რწმუნებული, რაც, რა თქმა უნდა, ძალიან ცუდია.
“თავისუფალი დემოკრატების” წარმომადგენლის ელგუჯა ჩხაიძის თქმით, მას შემდეგ, რაც კოალიცია ხელისუფლებაში მოვიდა, ზოგიერთი ჩინოვნიკი განცხადების საფუძველზე ტოვებს თვითმმართველობას: _ ჩვენ, ფაქტობრივად, ბრძოლა გვიხდება ვაკანსიების დასაკავებლად. ჩვენც გვსურს, რომ თვითმმართველობაში რაღაც გარკვეული ადგილი გვქონდეს. კოალიციურ რეჟიმში ბალანსია დარღვეული _ “ქართულ ოცნებას” ჰყავს დანიშნული 5 კანდიდატი, მე მყავს ერთი და რესპუბლიკელებს საერთოდ არ ყავთ. ეს იწვევს ყველანაირ უთანხმოებას. ჩვენ ვაღიარებთ, რომ “ქართული ოცნება” დომინანტია, მაგრამ წინასაარჩევნო პრობლემები ერთად მოვაგვარეთ. ჩვენ ამ უთანხმოებას არც ვმალავთ, პირიქით, ბევრი რამ მოგვარდა იმით, რომ სათქმელი ღიად ითქვა. თუ კოალიციაზეა საუბარი, კანდიდატებად უნდა დასახელდნენ მხოლოდ კოალიციაში შემავალი კადრები და არა შემდეგ გამოჩენილი ხალხი. მაგალითად სოფელ შუხუთში “ქართული ოცნების” მიერ დასახელდა ისეთი კადრი, რომელიც არჩევნებისას საერთოდ არ გამოჩენილა, ვგულისხმობ გიორგი იმნაიშვილს. იური იმნაიშვილი კი, ადამიანი, რომელმაც წინასაარჩევნოდ თავი საფრთხეში ჩაიგდო და “ქართულ ოცნებას” გვერდში დაუდგა, გვერდზე დარჩა. იცით, რამდენი ადამიანი ტრიალებს ჩვენს გარშემო, რომლებსაც ბიძინა ივანიშვილის მოქალაქეობის მიღებას ხელიც არ მოაწერეს? ასეთს ჩემი პარტიის ირგვლივ ერთ კაცსაც ვერ ნახავთ, “ქართულ ოცნებაში” კი მრავლად არიან. გამგებელმა კეთილი ნება გამოიჩინა და ყველა პარტიას მოგვცა თავის გამოჩენის შესაძლებლობა, მაგრამ “ქართული ოცნება” არღვევს ყველანაირ ბალანსს, _ გვითხრა ჩხაიძემ.
ბიწაძისა და ჩხაიძის ამ მოსაზებებს “ქართული ოცნების” ბიუროს ხელმძღვანელი, გიორგი გეგიაძე პასუხობს:
_ როგორც კოალიციაში შემავალი პარტიები აცხადებენ, დაპირისპირების მიზეზი სწორედ ის პრაიმერია, რომელიც ინიშნება სოფლებში, ადასტურებთ თუ არა ამას და თქვენი შეხედულებით, რა არის კოალიციაში უკმაყოფილების მიზეზი?
_ ამას არ ვადასტურებ. ეს ფაქტი მათ გამოიყენეს შუხუთის მაგალითზე _ იური იმნაიშვილი იყო ბატონი ბიძინას პარტიის წევრი, ჩვენი კანდიდატი კი გახლდათ არაჩვეულებრივი პიროვნება, გიორგი იმნაიშვილი. ამ ახალგაზრდის მიმართ წავიდა დიდი ცილისმწამებლური კასკადი, დააბრალეს ჯარში დეზერტირობა. ჩვენ გვაქვს ოფიციალური დოკუმენტი სამხედრო განყოფილებიდან, რომელიც ადასტურებს, რომ იმნაიშვილის თავი არ აურიდებია სამხედრო სამსახურისთვის და ამ შემთხვევაში არის მართალი. მაგრამ გარდა ამისა, სოფელმაც დაადასტურა დიდი სიყვარული მის მიმართ _ 500 ხმა მიიღო გიორგიმ და 300 _ იური იმნაიშვილმა. კოალიციურ რეჟიმში მუშაობა იმას კი არ ნიშნავს, რომ ჩვენ დავჭამოთ ერთმანეთი _ თავისი კადრი ყველამ უნდა წამოაყენოს. შუხუთის ფაქტმა გამოიწვია სწორედ დაპირისპირება. ვინ არის გიორგი იმნაიშვილი? ის არის “ქართული ოცნების” წევრი, რისი დამადასტურებელი დოკუმენტიც არსებობს. არჩევნებამდეც მთელი ოჯახით გვერდში გვედგა. მე მომხრე არ ვიყავი ამ პრაიმერის, ეს ზაზას იდეა იყო და ვეთანხმები კიდეც ამას. მამათიდან დავიწყეთ პრაიმერი და იქ სწორედ ელგუჯა ჩხაიძის კაცი გავიდა. ასევე, გვიმბალაურის ყოფილი რწმუნებული “რესპუბლიკური” პარტიიდანაა. არ მოვკიდეთ ხელი იმ ადამიანს და არ ვატარებთ იმ სოფელში პრაიმერს, როგორც ჯურუყვეთში და აცანაში. შაბათს ჩიბათში ტარდება პრაიმერი, მონაწილეობს ელგუჯას შვილი. ჩვენ პირადი ამბიციები უნდა დავიწყოთ და არ უნდა ვუყურებდეთ ერთმანეთს ზიზღით. ახლა ამ ზიზღის მიზეზს გეტყვით _ ჩვენ 1 ივლისიდან თემურ ჩხაიძის გუნდით მოვედით საარჩევნო კამპანიაში, მოხდა იქ გადაადგილება, ახალი სისხლის გადასხმა, მე გავხდი საარჩევნო შტაბის ხელმძღვანელი, რამაც გამოიწვია, რომ ესენი მოვიდნენ. მანამდე ჩვენ ვიყავით. თავიდან უნდობლობა გამოგვიცხადეს. ჩვენ ვდგავართ თემურის გვერდზე და ამით, მე მგონი, არაფერი შავდება.
