ის ჩვენთან ჰყვება იმ ამბებს, რაც არჩევნების შემდგომ, სამართლის ძიებაში გადახდა და “გურია ნიუსს” კიდევ ერთხელ მიმართავს დახმარებისთვის. როგორც თავად აცხადებს, ამ წერილით სურს, ხმა მიაწვდინოს შინაგან საქმეთა მინისტრს ირაკლი ღარიბაშვილს. მისი თქმით, წინასაარჩევნოდ პოლიტიკური ნიშნით გაათავისუფლეს და ახლა პოლიციაში აღდგენას ითხოვს, თუმცა, თვლის, რომ მისი პერსონა “დაბლოკილია”.
თარგამაძე ჯერ კიდევ არჩევნებამდე აცხადებდა, რომ პოლიციის სისტემის რეფორმირება, რომლითაც ასე ამაყობდა პრეზიდენტი სააკაშვილი, მხოლოდ მინის ფასადიანი შენობის აგებით შემოიფარგლა; სინამდვილეში, ამ სისტემაში არანაირი რეფორმა არ მომხდარა _ კვლავაც ძველ მეთოდებს იყენებენ, ოღონდ უფრო სასტიკი ფორმებით, და სამწუხაროდ, ეს პროცესი კვლავ გრძელდება, არჩევნების შემდეგაც:
_ ჰკითხონ გურიის სამხარეო მთავარი სამმართველოს უფროსს, გოჩა ფერსაშვილს, რატომ არ ნიშნავს თენგიზ თარგამაძეს მის ყოფილ თანამდებობაზე. როცა მინისტრის ბრძანებაა, რომ დანიშვნისას არ სჭირდებათ კურსების გავლა, რატომ არ წერს ბრძანებას?” გოჩა ფერსაშვილს ჩემთან საუბარში არ დაუმალავს და მითხრა, დაბლოკილი ხარო. ამოიღონ ეს სატელეფონო საუბრები, თუ ისე არ დაიჯერებენ… ზემოთ გაარკვიეო, _ მითხრა. ვისთან გავარკვიო-მეთქი, სამინისტრო დიდია, მინისტრთან მივიდე,-მეთქი? ადრე მეუბნებოდით, რომ კურსები გაქვთ გასავლელი, ახლა რა მიზეზი გაქვთ, შინაგან საქმეთა მინისტრის ბრძანებაა, რომ ძველი კადრები კურსების გარეშე უნდა დაბრუნდნენ და თქვენ ამ ბრძანებას არ ასრულებთ -მეთქი. მე რა ვქნა, წადი და “ზევით” გაარკვიეო. კითხვას ვსვამ: ფერსაშვილი, რამდენად კანონიერად მექცევა, რატომ არ ასრულებს, პირველ რიგში, მინისტრის ბრძანებას, რატომ ეწევა საბოტაჟს? ამისთვის ის უნდა დაისაჯოს. ასევე, მინდა, პასუხი მოთხოვონ კადრების სამსახურის უფროსს, ნათია ქუტიძეს, რომელმაც განმიცხადა, რომ რასაც მიბრძანებს გოჩა ფერსაშვილი, იმას გავაკეთებო.
_ თქვენი აზრით, რა ხდება, რატომ არ გაბრუნებენ პოლიციაში, მითუმეტეს, არჩევნებამდე კარგა ხნით ადრე თქვენი პოზიცია მკაფიოდ გქონდათ დაფიქსირებული?
_ ეს არის საბოტაჟი, ამათ არ “აწყობთ” ჩემნაირი კადრის მუშაობა პოლიციაში. გურიის რეგიონში, თავიდან ბოლომდე, ნაციონალების ბანდაა თავმოყრილი. თუ ტყუილს ვამბობ, გადახედეთ კადრებს. ჯერ სადაური მისი ძმაკაცი ვიყავი ან ნათესავი, რომ ტელეფონში ამას მეუბნება: ისე მოდი და სადაც გინდა, იქ ვილაპარაკოთო. დაბეჯითებით გეტყვით, რომ შინაგან საქმეთა მინისტრის საწინააღმდეგოდ მოქმედებს ფერსაშვილი. გამამწარეს რა, თავიდან ბოლომდე და რისთვის?! 10 თვეა, კანონი და სამართალი ვერ ვიპოვე. ბოლო საფეხურამდე მივედი წვალებით და ტანჯვით, მეტი გამოსავალი არ აქვს ფერსაშვილს და მეუბნება, “დაბლოკილი” ხარო. ახსნას ფერსაშვილმა ეს რას ნიშნავს და პასუხი აგოს თავის სიტყვებზე. დარწმუნებული ვარ, თითონ და ის კონტიგენტი მბლოკავს, რომელიც არჩევნების შემდეგ შეცდომითაა დანიშნული პოლიციაში. ქვეყანაა თვითონ არეული და მესმის, ბატონი ირაკლი დღესდღეობით ყველაფერს ვერ წვდება. მინდა, ამ წერილის შინაარსი მივიდეს მინისტრის ყურამდე და თავად გადაწყვიტოს. ვხედავ, რომ ვითარება საგანგაშოა – ესენი დათმობას არ აპირებენ, ემზადებიან რაღაცისთვის. ახალმა ხელისუფლებამაც თუ ასე გააგრძელა, ასეთი საკადრო პოლიტიკით შორს ვერ წავლენ.
არჩევნების შემდეგ, ორ თვენახევრის განმავლობაში ვიყავი თბილისში, შინაგან საქმეთა სამინისტროდან დაწყებული, გენინსპექციით დამთავრებული, თუმცა, ამას შედეგი არ მოჰყოლია. ერთადერთი, როგორც კი ჩემი განცხადება მივიდა გენინსპექციამდე, მომისმინა ხელმძღვანელმა და გადაწყვეტილებაც ორ დღეში მიიღო. შესაბამისად, გურიის სამხარეო პოლიციაში გამოაგზავნა ჩემზე დადებითი პასუხი, რომ განეხილათ ჩემი საქმე.
_ რას ითხოვდით გენერალურ ინსპექციაში?
_ სამსახურში აღდგენას. უკანონოდ ვარ გათავისუფლებული იმის გამო, რომ ჩემმა შვილმა, იმ პერიოდში, “მაესტროში” დაიწყო მუშაობა და გაწევრიანდა “ქართულ ოცნებაში”. მოვუყევი ჩემი ისტორია, თავიდან ბოლომდე, რაც გადამხდა. ის, რომ წინასაარჩევნოდ დაჭერითაც მემუქრებოდნენ, მოკვლითაც, ოჯახის წევრების დაშინებითაც. რომ წამოვედი იქედან, ორ დღეში გურიის სამხარეო პოლიციაში ჩემზე დადებითი პასუხი მოვიდა, რომ მე დამეწყო მუშაობა. ეს იყო დეკემბრის ბოლო რიცხვები, დამიბარეს სამხარეოში, თბილისში ვიყავი და ჩამომიყვანეს. დაწერე განცხადებაო, მაშინ უფროსი იყო ზაზა პეტრიაშვილი. დამაწერინეს განცხადება აღდგენაზე. ველოდები სამსახურს, უკვე ყველა მილოცავს. მეც გავიფიქრე, რომ აღსრულდა სამართალი -თქო, თან ადამიანურად არ მოვითხოვ არანაირ კომპენსაციას. წესით, აღდგენის დროს მეკუთვნოდა ფულადი კომპენსაცია.
რამდენიმე დღის შემდეგ მაგებინებენ, რომ უარყოფითი პასუხი მოვიდა ისევო. ამას მეუბნებიან ღამის საათებში. ამ დროს კი უკვე ვიცოდი, რომ დადებითი პასუხი იყო მოსული, კიდეც დამიბარეს განცხადების დასაწერად და უცებ შეცვალეს ყველაფერი. დავრეკე გენინსპექციაში და გადაირივნენ _ დადებითი პასუხია გამოგზავნილიო. აქაც გავიგე ჩემი წყაროს მეშვეობით, რომ დადებითი პასუხი იყო მოსული, მაგრამ მატყუებდნენ. დავურეკე კადრების უფროსს და მეუბნება, დადებითი პასუხია მოსული, მაგრამ ბრძანებას ხელს არ აწერს არავინო. ასეთი არაფერი გამიგია _ ბრძანება მოვიდეს გენინსპექციიდან და ხელი არ ჰქონდეს ვინმეს მოწერილი!
მინისტრის სახელზე განცხადება შევიტანე, მაგრამ რეაგირება არაა. პირადად მინდოდა ნახვა, ვერ მოვახერხე… ჯერ კიდევ მჯერა, ეს რომ ირაკლი ღარიბაშვილმა იცოდეს, დარწმუნებული ვარ, რეაგირება ნამდვილად ექნება! გვიან გავიგე, რომ ფოთში იყო ჩასული პოლიციის შენობის გახსნაზე, თორემ იქნებ, მაშინ მენახა. მინდა, აუცილებლად გაიგოს ირაკლი ღარიბაშვილმა, რა ხდება გურიის რეგიონში პოლიციაში.
არ მჯერა გოჩა ფერსაშვილის,” ნაციონალი” აქტივისტის; საგულისხმოა, ამდენ საკუთარ კადრს თითონ “ნაციონალები” ვერ დანიშნავდნენ, რომ გაემარჯვათ. ჩვენ, ვინც შანტაჟის და მუქარის წნეხის ქვეშ გავატარეთ თითქმის, ერთი წელი, იგნორირებული ვართ საერთოდ.
ვთქვათ, “ნაციონალების” დროს დავაშავე, მაგრამ ახლა რა დავაშავე, არ ვიბრძოლე?! იმ გადაწყვეტილებამდე მივედი, რომ კარავს გავშლი პოლიციის წინ და გამოვაცხადებ შიმშილობას. რა სინდისით მოვიდნენ თანამდებობაზე პოლიციაში, როცა მთელი არჩევნების განმავლობაში ხალხს დასდევდნენ? მაგრამ სინდის-ნამუსი არ გააჩნიათ და მფარველებიც ჰყავთ! _ ამბობს თენგიზ თარგამაძე.
შინაგან საქმეთა სამინისტროს გურიის სამხარეო მთავარი სამმართველოს უფროსი გოჩა ფერსაშვილი “გურია ნიუსთან,” ამ ფაქტთან დაკავშირებით, კომენტარს აკეთებს.
_ ბატონო გოჩა, იცნობთ თუ არა თენგიზ თარგამაძეს?
_ კი.
_ ბატონო გოჩა, ყოფილი პოლიციელი აცხადებს, რომ მის პოლიციაში დაბრუნებას ხელოვნურად უშლით ხელს. მისი თქმით, თქვენ მას განუცხადეთ, რომ მისი პერსონა “დაბლოკილია”.
_ სისულელეა… გამორიცხულია. ჯერ ერთი, ეგ ჩემი კომპეტენცია არ არის _ არის სამინისტრო და კადრები, მე რა შუაში ვარ?!
_ ბატონი თენგიზი აცხადებს, რომ გენერალური ინსპექციიდან მოსული დადებითი პასუხი თქვენ დაუმალეთ…
_ გამორიცხულია, გამორიცხულია.
_ ბატონო გოჩა, თქვენ მას არ უთხარით ტელეფონით საუბრისას, რომ “დაბლოკილი” ხარო?
_ გამორიცხულია.
_ ჩვენი რესპონდენტი პირდაპირ გადებთ ხელს, რომ იყავით პოლიტიკურად აქტიური და წინასაარჩევნოდ “ნაციონალური მოძრაობის” მხარდასაჭერად იბრძოდით.
_ მე ვარ პოლიციელი, ვარ სამხრეების ქვეშ და ვასრულებ ჩემს მოვალეობას. მაქვს ათასი საქმე გასაკეთებელი და ასეთი აბსურდული განცხადებებისთვის ნამდვილად არ მცალია. მე პარტიის საქმიანობაში არ ვერევი და არც არასდროს ვყოფილვარ რომელიმე პარტიის წევრი, _ გვითხრა ფერსაშვილმა.
