„შვილი უნდა დავიბრუნო, რომელსაც ჩემი ყოფილი ქმარი არ მაძლევს“, _ სამი შვილის დედა სამართლის აღდგენის ლოდინშია.
“ჩამოვედი ოზურგეთში, რადგან სხვა გზა არ მაქვს _ შვილი უნდა დავიბრუნო, რომელსაც ჩემი ყოფილი ქმარი არ მაძლევს“, – ასე იწყებს საუბარს სამი შვილის დედა თამთა ჟვანია „გურია ნიუსთან“.
თამთა ჟვანიამ, დღეს, ოზურგეთის რაიონული სასამართლოს შენობის გვერდზე, კარავი გაშალა. მისი თქმით, სასამართლოში თითქმის ორი წელია მისი და მისი მეორე შვილის საქმე იხილება და ამ დრომდე სისხლის სამართლის საქმეზე განაჩენი არ დამდგარა.
_ სამი შვილის დედა ვარ. კორონავირუსის დროს მომიხდა ემიგრაციაში წასვლა. ორი შვილი მყავს პირველი ქორწინებიდან და ერთი შვილი კი _ მეორე ქორწინებიდან. ორი შვილის დატოვებაც მეორე ქმრის ოჯახთან მომიხდა. მიუხედავად იმისა, რომ არ მინდოდა ემიგრაციაში წასვლა, ჩემი ქმარი დაჟინებით მოითხოვდა წავსულიყავი და მეც იძულებული გავხდი წავსულიყავი. მოგვიანებით გავიგე, რომ ჩემი ქმარი მის გერს ანუ ჩემს მეორე შვილზე ძალადობდა. ბავშვი იმდენად იყო შეშინებული, ძლივს მიიღო გადაწყვეტილება, ფოტო გამოეგზავნა და ჩემთვის ენახვებინა, თუ როგორ გამოიყურებოდა. ჩემს მიერ გამოგზავნილი ფულის უმეტეს ნაწილს ჩემი ქმარი ტოტალიზატორში ხარჯავდა. ერთხელ, შვილმა მომწერა, რომ პურის ფული არ ჰქონდათ; არადა, ამ მიმოწერიდან რამდენიმე დღით ადრე, 1000 ლარი მქონდა გამოგზავნილი.
როდესაც ჩემს უფროს შვილზე ძალადობის ამბავი გავიგე, მაშინვე მოვახერხე მისი გამოყვანა სახლიდან. ასევე, დავიწყე ემიგრაციიდან ჩამოსვლაზე ფიქრი. როდესაც ჩამოვედი, მას შემდეგ იწყება ჩემი ორიგი და დაუსრულებელი ტანჯვა-წამება.
მესამე _ საერთო შვილს არ მაძლევს ჩემი ქმარი; მოძალადესთან არის ამჟამად ჩემი შვილი და ფსიქოლოგიურ ზეწოლას განიცდის, _ გვიყვება თამთა ჟვანია, _ როგორც იქნა, 4 ივნისს შედგა სასამართლოს პირველი სხდომა. თუმცა, მხოლოდ ჩემი დაკითხვა მოხდა პირველ სხდომაზე. მეორე პროცესი დღეს უნდა შემდგარიყო, მაგრამ გააუქმეს. მზად იყო ჩემი მეორე შვილი და სხდომას ასევე უნდა დასწრებოდა ფსიქოლოგი. მე მაინც წამოვედი და ახლა ვაპირებ ამ კარავში ვიცხოვრო მანამ, სანამ ეს საქმე არ დასრულდება. დაახლოებით 5-6 მოწმის დაკითხვა არის დაგეგმილი და თუ ამ ტემპით გაგრძელდა საქმის განხილვა, როდის მივაღწევ სამართლიანობას?!!! მე, პირველ რიგში, ვითხოვ სამართლიანობას და მესამე შვილის დაბრუნებას!
თამთა ჟვანიას თქმით, მისი ქმარი მხოლოდ ერთი დღით იყო დაკავებული და გირაოთი გამოუშვეს:
„ვითხოვ ყურადღებას და ჩემი შვილის დაბრუნებას. ეს ამბავი უნდა გაიგოს ყველამ. მატერიალური კეთილდღეობის ხარჯზე დედა არ უნდა ტოვებდეს შვილს, თორემ, შეიძლება ასეთი შედეგით დასრულდეს ყველაფერი. ძალიან მძიმე მდგომარეობაში ვარ, არავინ არ მყავს გვერდში მდგომი და ასე შიშველი ხელებით მიწევს ბრძოლა“, _ გვითხრა თამთა ჟვანიამ.
თამთა ჟვანიას უფლებებს, გარკვეული ხნით, ორგანიზაცია “პარტნიორობა ადამიანის უფლებებისთვის“(PHR) იურისტი ანა თავხელიძე იცავდა. ჩვენ მასაც დავუკავშირდით და კომენტარი ვთხოვეთ.
ანა თავხელიძე: “გარკვეული დროის განმავლობაში ვმუშაობდი როგორც სისხლის სამართლის საქმეზე, ასევე ადმინისტრაციული დავის მიმართულებით. ჩვენი მოთხოვნა დააკმაყოფილა სასამართლომ, რის შემდეგაც მოსამართლემ ბავშვის დაზარალებულად ცნობა პროკურატურას დაავალა. ასევე, ჩვენი მოთხოვნა სასამართლომ დააკმაყოფილა და გამოსცა ბავშვის დამცავი ორდერი.
ამ ჩართულობის პერიოდში, მუდმივად ვითხოვდით, რომ გამოძიება წარმათულიყო ეფექტურად და საქმე შემჭირვებულ ვადებში განხილულიყო, რადგან ვხედავდით სახელმწიფო უწყებების მიკერძოების ნიშნებს ამ საქმესთან დაკავშირებით. შესაბამისად, ამ კუთხით, პროკურატურასთან არაერთი კომუნიკაცია გვქონდა.
სამწუხაროდ, ჩვენ შეზღუდული რესურსიდან გამომდინარე და იმის გამოც, რომ საქმე რეგიონში მიმდინარეობს, ვეღარ შევძელით ბოლომდე გაგვეგრძელებინა; მოგეხსენებათ, არასამთავრობო ორგანიზაციებს ბოლო დროს ძალიან მძიმე მდგომარეობა გვაქვს და შესაბამისად, ვეღარ შევძელით ამ საქმეზე წარმოება ბოლომდე გაგვეგრძელებინა. სამწუხაროდ, ქვეყანაში ბოლო დროს შექმნილი სიტუაციდან გამომდინარე, არ გვქონდა იმის რესურსი, ვყოფილიყავი ამ საქმეში ბოლომდე“.
ავტორი
