“ჩვენს საპატიმროს ერქვა _ ზუგდიდი”

მოძრაობის ლიდერები სამეგრელოს რეგიონში ჩავიდნენ და ზუგდიდის შალვა დადიანის სახელობის თეატრში პოლიტპატიმრებს, საზოგადოების წარმომადგენლებს და არასამთავრობო სექტორის წარმომადგენლებს შეხვდნენ. არასამთავრობო ორგანიზაცია “ყოფილი პოლიტპატიმრები ადამიანის უფლებებისთვის” ხელმძღვანელმა ნანა კაკაბაძემ შეკრებილებს ახალადშექმნილი სახალხო მოძრაობის მიზნები გააცნო და ყველა 14 აპრილის დაანონსებულ აქციაზე მიიწვია.

დარბაზში შეკრებილებს მიმართეს პოლიტპატიმარმა მელორ ვაჩნაძემ, “დაიცავი საქართველოს” წევრებმა _ გია გაჩეჩილაძემ და კახა მიქაიამ. ყველა გამომსვლელი 14 აპრილს ყრილობაზე მონაწილეობის მიღებისკენ მოუწოდებდა დარბაზში მყოფთ და აცხადებდნენ, რომ მხოლოდ და მხოლოდ ქართველი ხალხის ხელშია ბრძოლის ბოლომდე მიყვანა, ყველამ ერთად უნდა მოითხოვოს “ნაციონალური მოძრაობის” და წინა რეჟიმის გასამართლება.

შეხვედრას ესწრებოდა საზოგადოებრივი და პოლიტიკური მოძრაობა “სოლიდარობა უკანონო პატიმრებს” სამეგრელოს რეგიონის წარმომადგენელი სენაკიდან ინგა ქარდავა.

ინგა ქარდავა: “ამ შეხვედრაზე სამეგრელოს ყველა კუთხიდან იყვნენ ჩამოსული ყოფილი პატიმრები და “ნაციონალური მოძრაობის” რეჟიმის მსხვერპლნი. გავიცანი ე.წ. “ენვერის” ბიჭები ბათუმიდან. როგორ შეიძლება მათზე ვინმემ თქვას, სამშობლოს მოღალატეები არიანო?! სწორად თქვა გამოსვლაში მელორ ვაჩნაძემ _ ჩვენ საპატიმროს წლების მანძილზე ერქვა ზუგდიდის რაიონი, სადაც ახალაიების მხრიდან რეპრესიები ტარდებოდა. ამის მაგალითია სწორედ შეხვედრაზე მყოფი 77 წლის პოლიტპატიმარმა ნაპო გაბისონია და სენაკელი რევაზ ხულორდავა, რომელიც უკანონოდ ერთი წელი იჯდა ციხეში არარსებულ საქმეზე. დღეს ის სენაკის საკრებულოში “ქართული ოცნების” ფრაქციის თავმჯდომარეა, თუმცა, ეს სხვა თემაა. მე დღეს ამაყი ვიყავი, რადგან ამ ადამიანები გვერდით ვიდექი და ვიცი, ქართველი ხალხი აუცილებლად ბოლომდე მიიყვანს საქმეს და სამართლიანობა აღდგება.”