ეს ის სიაა, რომელიც ჩამოყალიბდა იმ გადაწყვეტილების შემდეგ, რომელიც გამგეობამ სხვადასხვა სამსახურების შეერთების, ცალკე გამოყოფისა და ზოგან თანამშრომელთა შემცირების მსჯელობის შემდეგ მიიღო. თუმცა, იქნება თუ არა ეს საშტატო ნუსხის საბოლოო სახე, ჯერ ცნობილი არაა.
ლანჩხუთის მუნიციპალიტეტის გამგეობის საშტატო ნუსხა და სახელფასო განაკვეთი ასე გამოიყურება.
სულ გამგეობის აპარატის თანამშრომლების რაოდენობაა 133, სახელფასო ფონდი კი თვიურად შეადგენს 57 500 ლარს, ხოლო წლიურად _ 690 000 ლარს. აქედან ხელმძღვანელობის სახელფასო თვიური ფონდია 4 460 ლარი, ხოლო წლიური _ 53 520 ლარი. აპარატში იმუშავებს 14 თანამშრომელი: ადამიანური რესურსის მართვის სამსახურში _ 3, ეკონომიკისა და საინვესტიციო გარემოს განვითარების სამსახურში _ 3, საფინანსო სამსახურში _ 8, სოციალური დაცვის სამსახურში _ 5, შიდა აუდიტის სამსახურში _ 8, იურიდიულ სამსახურში _ 4, ქონების მართვის სამსახურში _ 3, მუნიციპალიტეტის შესყიდვების სამსახურში _ 4, განათლების, კულტურის, ძეგლთა დაცვისა და ტურიზმის სამსახურში _ 3, ხოლო სპორტისა და ახალგაზრდულ საქმეთა სამსახურში _ 4, ინფრასტრუქტურისა და არქიტექტურის სამსახურში _ 8 თანამშრომელი.
აქედან 62 თანამშრომელი ტერიტორიულ ორგანოს წარმოადგენს გამგეობის რწმუნებულებისა და უფროსი სპეციალისტების სახით.
“გურია ნიუსი” დაინტერესდა, მოხდება თუ არა ბიუჯეტში თანხების დაზოგვა ამ ახალი საშტატო ნუსხის დამტკიცების შემდეგ და გამგებლის მოვალეობის შემსრულებელს, ვახტანგ ზენაიშვილს ვესაუბრეთ, რომელმაც გვითხრა, რომ ახალი საშტატო ნუსხის ავტორი ზაზა ურუშაძეა, თუმცა, თვითონაც ამ პროცესში მონაწილეობას.
ვახტანგ ზენაიშვილი: “ზოგიერთი სამსახური გაუქმდა და შევიდა ახალ სამსახურში, როგორც განყოფილება _ იგულისხმება ზედამხედველობის სამსახური, რომელიც შეუერთდა აუდიტის სამსახურს; ეკონომიკისა და საინვესტიციო გარემოს განვითარების სამსახური ადრე არსებობდა მაგრამ, ამაზე უფრო მეტ დატვირთვას ვაკეთებთ _ იქმნება ადამიანური მართვის და რესურსების ახალი სამსახური, რომელიც უფრო მოქნილია და შემცირებულია აპარატში შემავალი თანამშრომლების რაოდენობა.
გამგებელს სამი მოადგილე ჰყავდა და დარჩა ერთი _ ორი საშტატო ერთეული გაუქმდა, შესაბამისად, შემცირდა მოადგილეებზე გათვალისწინებულლი სახელფასო ფონდი. დაინიშნნენ გამგებლის თანაშემწეები. განსაკუთრებული დატვირთვა ეძლევა შიდა აუდიტის სამსახურს. გამგებლის აზრით, აუცილებელია იმ თანხების კონტროლი, რომელსაც საკრებულო და გამგეობა თანხებს გასცემს. ჩემი აზრით, ეს იქნება უფრო მოქნილი, შემჭიდროვებული აპარატი, ვიდრე იყო აქამდე. არ მინდა ვთქვა, რომ ძველი სტრუქტურა მიუღებელი იყო და ცუდად მუშაობდა. როგორც აპარატი, შეიძლება, ნორმალურად ფუნქციონირებდა კიდეც, მაგრამ იმ ახალ ტენდენციებს, იმ ახალ ვითარებას, რომელიც დადგა ოქტომბრის არჩევნების შემდეგ, იმ ხედვებს, რომელიც ახალ დანიშნულ გამგებლის მოვალეობის შემსრულებელს აქვს, ალბათ, ახალი სტრუქტურა უფრო შეესაბამება.
საკადრო ცვლილებები, პირდაპირ მინდა ვთქვა, რომ იქნება _ ეს შეეხება სამსახურის უფროსებს, თუმცა, ჩვენ ტოტალურ ცვლილებებს არ ვგეგმავთ. შეიძლება ბევრ ადამიანს სტატუსი შეეცვალოს და სხვა ფორმით იმუშაოს, ზოგი შეიძლება წავიდეს სამსახურიდან. ყველა საქმიანი, მცოდნე კადრი იქნება შენარჩუნებული.
სახელფასო ფონდს რაც შეეხება, ახალი ძველს, რეორგანიზაციის შემთხვევაში, არ გასცდება, შეიძლება ცოტათი მეტი ან ნაკლებიც იყოს, საბოლოო სახე ჯერ ამას არ აქვს. გასაგებია, რომ მოსახლეობის სურვილია, როგორც ადგილობრივ, ისე ცენტრალურ ხელისუფლებაში ახალი პოლიტიკური ძალა იხილოს, თუმცა, ისიც გასაგებია, რომ თვითმმართველობის არჩევნები არ ჩატარებულა და კანონი არ ითვალისწინებდა, რომ მასობრივად მომხდარიყო კადრების დათხოვნა. ამიტომ, ჩვენ, “ნაციონალურ მოძრაობასთან” ერთად, სწორი ნაბიჯები გადავდგით _ აღმასრულებელი ორგანოს დონეზე, როგორიცაა გამგებელი და მის დაქვემდებარებაში არსებული მთელი ვერტიკალი, მაინც ავსახეთ ხალხის განწყობა. ახლა საკითხი რწმუნებულების დონეზე თითქმის დამთავრებულია. მე მგონი, ასეთი შეთანხმება, რომელიც ჩვენსა და ნაციონალებს შორის არსებობს, სხვა რაიონებში ნაკლებად შეიმჩნევა. გარკვეული პოლიტიკური კულტურის მატარებელი იყო ის ორივე მხარე, რომელიც ამაში იყო ჩართული და მე ვფიქრობ, რომ ყველაფერი საკმაოდ წარმატებულად გახორციელდა. რაც შეეხება აპარატს, აქაც ასეთივე შეთანხმებით მოხდება ყველაფერი, ძალიან კულტურულად _ რა განწყობები იყო პირველ ოქტომბრამდე და არის დღესაც, იქნება ნაწილობრივ დაკმაყოფილებული.
ცვლილებები დაწყებულია, რომელიც, ჩემი აზრით, საღი პოლიტიკური პროცესია და ეს ცვლილებები აპრილის შუა რიცხვებამდე უნდა დასრულდეს,” _ გვითხრა ზენაიშვილმა.
