პატიმრის წერილი პირველად საქართველოს პარლამენტის ადამიანის უფლებათა დაცვისა და სამოქალაქო ინტეგრაციის კომიტეტის თავმჯდომარეს, ეკა ბესელიას გაეგზავნა. ეკა ბესელიას თქმით, მის კომიტეტში 4000-ზე მეტი წერილია შესული.
_ კონკრეტულად ეს წერილი, რომელიც ეხება ერთ-ერთ ქართველ პატიმარს, უკვე გადაეგზავნა საქართველოს მთავარ პროკურორს. ძალიან მძიმე ფაქტებთან გვაქვს საქმე, _ გვითხრა ეკა ბესელიამ.
პატიმრის წერილს “გურია ნიუსი” უცვლელად გთავაზობთ:
” თავდაპირველ განგიმარტავთ, რომ გასამართლებული ვარ 108-ე მუხლით, გორის რაიონული სასამართლოს მიერ, 2008 წლის 2 ივლისს. ჩემ მიმართ გამოტანილი განაჩენი არის აშკარად დაუსაბუთებელი და უკანონო, რის გამოც მე განაჩენი გავასაჩივრე თავის დროზე და ამჟამადაც გასაჩივრებული მაქვს მთავარ პროკურორთან. ჩემ ამ განცხადებას კავშირი არ აქვს განაჩენის კანონიერება – უკანონობის საკითხთან. ის ეხება ჩემ მიმართ ს.ა.დ.-ის თანამშრომლების მხრიდან გახორციელებულ არაადამიანურ მოპყრობას, რის გამოც უკიდურესად შემერყა ჯანმრთელობა. ჩემი განცხადების არსი მდგომარეობს შემდეგში:
მე დამაპატიმრეს 2007 წლის 27 ოქტომბერს და მომათავსეს ორთაჭალის ყოფილ საგამომძიებლო იზოლატორში, მაგრამ იმავე წლის 8 დეკემბერს მოხდა ორთაჭალის ციხიდან იქ მყოფ პატიმართა ეტაპირება ახალგახსნილ გლდანის მე- 8 საპყრობილეში. ამ პატიმართა კონტიგენტში ვიყავი მეც. გლდანის ციხის ტერიტორიაზე შესულ პატიმრებს ბადრაგი, ციხის თანამშრომლები და ს.ა.დ.-ის მაღალჩინოსნები გვექცეოდნენ უაღრესად დამამცირებლად, სასტიკად გვცემეს, პირადად მე თავის არეში მირტყეს რეზინის ხელკეტი, ე.წ. „დუბინკა“. რის შედეგადაც დამიქვეითდა, ცემისგან სერიოზულად დამიზიანდა, ფაქტიურად დავკარგე მხედველობის უნარი. არ შემეძლო დამოუკიდებლად მემოძრავა, ქვედა კიდურების მძიმე ტრავმის გამო და არაერთ მომენტში ვსაჭიროებდი სხვა პატიმართა დახმარებას. ჩემი, ასევე სხვა პატიმრების სასტიკი ცემა ხდებოდა მაშინდელი მინისტრის ბაჩო ახალაიას თანდასწრებით და მითითებით, იქვე იმყოფებოდნენ მეგის ქარდავა და ს.ა.დ.-ის და ციხის მაღალ თანამდებობის პირები. სასტიკი ცემის შემდეგ, მე დიდი ხანი, ციხის ექიმების განკარგულებით, მამყოფებდნენ “წოლით რეჟიმში”, რადგან ცემის შედეგად მხედველობის უნარი და ქვედა კიდურები სრულიად პარალიზებული მქონდა. ციხის ექიმთა მცდელობის შედეგად, მეტნაკლებად გამიუმჯობესდა ჯანმრთელობის მდგომარეობა, მაგრამ დღემდე განვიცდი მწვავე ტკივილებს, როგორც ქვედა კიდურებში, ასევე თავის არეში. ვერ აღვიდგინე მხედველობა, რადგან დღემდე ვერ მოხერხდა ს.ა.დ.-ის სამედიცინო სამსახურის მიერ ჩემი სათანადო გამოკვლევა და ეფექტური მკურნალობა.
მე მოვითხოვ, რომ მთავარი პროკურატურა დაინტერესდეს ჩემს მიმართ გახორციელებული სასტიკი მოპყრობის ფაქტით და დამნაშავე პირების მიმართ, აღიძრას სისხლის სამართლის საქმე.
ქალბატონო ეკა, უმორჩილესად გთხოვთ, დამეხმაროთ და მიშუამდგომლოთ მთავარ პროკურატურასთან, რათა მომაქციონ ყურადღება და საბოლოოდ აღდგეს სამართლიანობა ჩემ მიმართ,” – ნათქვამია წერილში.
