საქართველოს ახალგაზრდული ნაკრები ფეხბურთში ევროპის ჩემპიონატის პლეი–ოფში იასპარეზებს _ ამ წარმატებას ნაკრებმა ოზურგეთელი ნოდარ ლომინაძის ისტორიული გოლით მიაღწია.
მნიშვნელოვან მატჩში მაკედონიელების კარში გოლები ვასილი გორდეზიანმა და ნოდარ ლომინაძემ გაიტანეს, საბოლოო ანგარიში კი 2:1 დაფიქსირდა.
ნოდარ ლომინაძის პირველი საფეხბურთო კლუბი „მერცხალი“ იყო. შემდეგ მცირე შესვენება მოუწია. საფეხბურთო პაუზის შემდეგ თამაში „რუსთავში“ გააგრძელა. შემდეგ იყო დინამო „თბილისი“, რის შემდეგ განათხოვრების წესით თამაშობდა „გაგრაში“, „წყალტუბოში“. ამჯერად ის გორის „დილას“ ფეხბურთელია.
„გურია ნიუსი“ ნოდარ ლომინაძეს დაუკავშირდა და გუშინდელი გამარჯვების შემდგომ მოლოდინებზე და ემოციებზე ესაუბრა.
ნოდარ ლომინაძე: „მთელ გუნდს და გულშემატკივრებს მოგების მოლოდინი გვქონდა. მართალია თავიდან ისე არ წავიდა თამაში, როგორც ჩვენ გვინდოდა, მაგრამ მეორე ტაიმში სრული მობილიზაცია მოვახდინეთ და მივიღეთ ის შედეგი, რომელიც გვინდოდა. რაც შეეხება ჩემს გოლს, გულშემატკივრების ხმამ უფრო დამარწმუნა, რომ ნამდვილად მე გავიტანე გამარჯვების გოლი _ გულშემატკივრების ასეთი რეაქცია ცხოვრების ბოლომდე მემახსოვრება“.
საუბრის ბოლოს ნოდარს ქართველი გულშემატკივრების შესახებ ვკითხეთ.
ნოდარ ლომინაძე: „დიდი სურვილი მაქვს, იმ რწმენით გააგრძელონ ჩვენი გულშემატკივრობა, როგორი რწმენაც ახლა აქვთ. მჯერა, რომ ერთიანობით ბევრს შევძლებთ და ბევრ წარმატებებს მივაღწევთ.
„გურია ნიუსის“ საშუალებით მინდა მწვრთნელებს, გულშემატკივარს მადლობა გადავუხადო თანადგომისთვის და გამხნევებისთვის. წინ საუკეთესო და გამარჯვებების მომტანი დღეები გველოდება“.
როგორც ნოდარ ლომინაძემ გვითხრა. ხვალ გაირკვევა საქართველოს ნაკრების შემდეგი მეტოქის ვინაობა.
„გურია ნიუსი“ წარმატებებს და ბევრ მოგებას უსურვებს საქართველოს ახალგაზრდულ ნაკრებს.
ფოტო: “დილა”, გორი
ავტორი
