“ზაზა, შენი მოთხოვნის შესაბამისად, გთხოვ, გამათავისუფლო სამსახურიდან”... თუმცა როგორც ურუშაძემ გვითხრა, მან დაასწრო ასკურავას და უფრო ადრე თვითონ გაათავისუფლა ის. ურუშაძის პრეკონფერენციას ასკურავას ბრალდებას მოყვა, რომლის მიხედვითაც ის მიიჩნევს, რომ მასზე პოლიტიკური ზეწოლა მიდიოდა.
ზაზა ურუშაძე: “ჩემი ყოფილი მოადგილე, კახაბერ ასკურავა ბრალს მდებს, თითქოს მე ის პოლიტიკური ნიშნით გავათავისუფლე თანამდებობიდან, მაგრამ მე მინდა გითხრათ, რომ გათავისუფლების მიზეზი სამსახურში გამოუცხადებლობაა. ორი თვის განმავლობაში ეს ადამიანი არ დადიოდა და სისტემატიურად აცდენდა სამსახურს. ბრძანება აქაა, სამსახურეობრივი მოვალეობის უხეში დარღვევისათვის, კერძოდ, სამსახურის თვითნებური მიტოვებისათვის ჩვენ ის გავათავისუფლეთ. მე არ ვიყავი საქმის კურსში დადიოდა თუ არა ეს ადამიანი, რადგანაც შესაბამისმა სამსახურებმა, ეს ეხება ადმინისტრაციულ სამსახურს და საფინანსო სამსახურს, არ ჩამაყენეს საქმის კურსში. მე თავიდან ვიცოდი, რომ ეგ ადამიანი იყო შვებულებაში, შემდეგ აღმოჩნდა, რომ არ ყოფილა, ეს კაცი თვითნებურად იგნორირებას უკეთებდა სამსახურში გამოცხადებას და ყველაფერს იმას, რაც არის კანონმდებლობით გათვალისწინებული, ამიტომ მე გუშინ გავათავისუფლე სამსახურიდან და მივმართე საკრებულოს თავმჯდომარეს როლანდ ლაშხიას და ლია იმნაძის განთავისუფლების შესახებაც.
ორი თვის განმავლობაში ის ხელფასს იღებდა. თუ საშვებულებო ჰქონდა სიტყვაზე აღებული, მაშინ ის მეორე თვე ფაქტიურად უკანონოდ მოხდა ხელფასის აღება. რაც შეეხება იმ სამსახურების უფროსებს, ვინც მე გავუშვი, ისინი ორი თვის მანძილზე საქმის კურსში იყვნენ იმაზე, რომ ეს პიროვნება სამსახურში არ დადიოდა და სწორედ ამიტომ მე მივმართე საკრებულოს, რომ სამსახურებრივი გადაცდომის გამო ამ ორმა ადამიანმა დატოვოს თანამდებობა. საკრებულოს არავითარი მიზეზი არ ექნება, რომ არ დაგვიკმაყოფილოს. როგორც ვიცი, ასკურავამ მიმართა პრესას და თქვა, რომ მის მიმართ ზეწოლა ხორციელდებოდა. არავითარი ზეწოლა არ ყოფილა, ამ პიროვნებას მე საერთოდ სახეზეც არ ვიცნობ. მე რომ მოვედი, მაშინ ის შვებულებაში იყო, გაზეთში ვნახე მისი ფოტო პირველად, ასკურავა ჩემთან გუშინწინ მოვიდა, მე მას ვუთხარი, რომ მასთან არანაირი პრეტენზია არ გამაჩნდა. პრეტენზია მაქვს ჩემი სამსახურის უფროსებთან, არ ჩამაყენეს საქმის კურსში, მათ ეს ევალებათ დებულებით და კანონმდებლობით”.
ზაზა ურუშაძემ ლაშხიას და იმნაძის ახსნა-განმარტებებიც წარმოადგინა:
“გამგებლის მოადგილის მოვალეობის შემსრულებლის კახაბერ ასკურავას სამსახურში გამოუცხადებლობის ფაქტთან დაკავშირებით განვმარტავ, როგორც ცნობილია გამგებლის მოადგილე დაქორწინდა, ამასთან დაკავშირებით ჩავთვალე, რომ სამსახურში არ ცხადდებოდა ურთიერთშეთანხმების საფუძველზე”.
იმნაძე წერს, რომ მიმდინარე წლის მარტის თვეში დაქორწინდა გამგებლის მოვალეობის შემსრულებელი და აღნიშნულთან დაკავშირებით იფიქრა, რომ სარგებლობდა მიმდინარე წლის გამოუყენებელი შვებულების დღეებით, საფინანსო სამსახურმა შეადგინა ამა წლის მარტის თვის უწყისი, სადაც შეყვანილი იქნა კახაბერ ასკურავა და დაერიცხა განკუთვნილი ხელფასი.
“ვერავინ იტყვის, რომ ვინმეს დავუძახე და დავაძალე განცხადება დაეწერა, ვერ დამისახელებთ ასეთ შემთხვევას. კანონს არ გადავუხვევთ, რაც ერგება კანონით, ყველა იმას მიიღებს. თუ არ დააკმაყოფილებს საკრებულო, მაშინ უნდა მიზეზი. ეს არის თაღლითობა, ადამიანი არ დადის სამსახურში და არ აგებინებს ამას გამგებელს, თან იღებს კუთვნილ ხელფასს. მე აქამდე ბრძანება არ მომიკითხავს, ახლა მოვიკითხე და აღმოჩნდა, რომ არანაირი განცხადება შვებულების თაობაზე არ არსებობს. ასკურავას უნდა, რომ ამ ფაქტს პოლიტიკური სახე მიეცეს, მაგრამ მე ავხსენი მიზეზი თუ რატომაც გავუშვი სამსახურიდან”-გვითხრა ზაზა ურუშაძემ.
რაც შეეხება ლია იმნაძესა და როლანდ ლაშხიას, მათგან კომენტარის გაკეთებაზე უარი მივიღეთ, ამ ეტაპზე ყოველგვარი კომენტარისგან თავს შევიკავებთო.
კახაბერ ასკურავამ კი ვრცელი კომენტარი გააკეთა “გურია ნიუსთან“, რომელსაც ასევე სრულად გთავაზობთ:
“ამ დროის მანძილზე მე ლანჩხუთში ვიმყოფებოდი. დაახლოებით ერთი კვირის შემდეგ ახალმა გამგებელმა მოიყვანა მისი ახალი მოადგილე, რომელმაც ჩემი კუთვნილი კაბინეტი დაიკავა. პირადი ნივთებიც კი არ მქონდა გამოტანილი. მე რომ სამსახურში არ დავდიოდი, ესაა თითიდან გამოწოვილი ინფორმაცია. ამას აქვს სხვა მიზეზი, მე ვიყავი “ნაციონალური მოძრაობის” თავმჯდომარე და მისთვის, როგორც მოადგილე, დისკომფორტს ვქმნიდი. მან დაიწყო რაღაც საბაბის ძებნა და აი ისიც, თითქოს მე არ დავდიოდი სამსახურში, პლიუს დაიწყო ზეწოლა ჩემს ყოფილ თანამშრომლებზე, მოსთხოვა მათ ახსნა- განმარტების ბარათების დაწერა, რომ არ დავდიოდი სამსახურში. ასე ვთქვათ, მარტივი პროვოკაცია შეთხზა, რომელიც არ გამოუვა. როგორც კი ჩამბარდება ბრძანება, თითქოს არ დავდიოდი სამსახურში, ამას აუცილებლად გავასაჩივრებ. საბაბი რაც საფინანსო სამსახურის უფროსს უთხრა, _ სამსახურიდან იმის გამო გიშვებ, რომ ასკურავას ხელფასი დაურიცხეო, გაუგონარი უკანონობაა. ამას ყველაფერს რა უნდა დავარქვა, თუ არა პოლიტიკური ზეწოლა? მე როცა ვესაუბრე ზაზა ურუშაძეს, პირდაპირ არა, მაგრამ მითხრა, რომ მე ლია იმნაძე და ლაშხია უნდა გავუშვა სამსახურიდან. რა თქმა უნდა მე გული შემტკივა ჩემს თანამშრომლებზე, უფრო მეტსაც გეტყვით, როლანდ ლაშხიას თავის დროზე მიხო სვიმონიშვილი უშვებდა სამსახურიდან და მე გადავეფარე და არ გავაშვებინე. სწორედ იმათი გაშვებით დაიწყო ჩემზე ზეწოლა. მე გამგებელი არასდროს შემხმიანებია, არცერთ თათბირზე არ დავუბარებივარ, თუმცა მზად ვიყავი, მისი დავალება განმეხორციელებია. ეს მეტს რას უნდა ნიშნავს, თუ არა იმას, რომ უნდა დამეწერა განცხადება და გავუგზავნე კიდეც. ამ თემით არ ვმანიპულირებ, ეს თვითონ გამგებელმა გახადა საჯარო” – გვითხრა ასკურავამ.
კახაბერ ასკურავამ დაგვიდასტურა, რომ რაიონის გუბერნატორი მართლაც საქმის კურსშია ამ საკითხთან დაკავშირებით. გავრცელდა ინფორმაცია, თითქოს ასკურავაც გეგმავდა საპასუხო პრესკონფერენციის გამართვას, თუმცა მან ეს ფაქტი უარყო.
რა გადაწყვეტილებას მიიღეს საკრებულოს თავმჯდომარე ამასთან დაკავშირებით, “გურია ნიუსი” თვალს მიადევნებს და სულ მალე შევეცდებით, ეს ინფორმაციაც მივაწოდოთ ჩვენს მკითხველს.
