ოზურგეთელი, ბარათაშვილის ქუჩაზე მცხოვრები, 84 წლის ნიჟა კვაშალი რედაქციას ტირილით ეწვია.
_ ბაბუა, ახლავე დაწერე, მიშას დანიშნული პენსია რომ ბიძინამ წამართვა, თორემ შენს უფროსს დავურეკავ _ დამიწერე აგერ “სპიჩკის” კოლოფზე ტელეფონის ნომერი, ხომ ხედავ, რომ ვტირი? მთლად მარტო დავრჩი, ცოლი, შვილი და ორი შვილიშვილი კვირიკეთის ჭადრის ძირში მიწევს, მიყოლებით დავმარხე, _ ტიროდა ბატონი ნიჟა.
სოციალური დახმარება, როგორც თვითონ ამბობს, 12 თებერვალს გაუუქმეს. აგენტის მოსვლის შემდეგ ელოდა, რომ დახმარებას გაუგრძელებდნენ და მისი შეჩერება გულშიც კი არ გაუვლია. მოხდა კი ისე, რომ უმძიმეს მდგომარეობაში მყოფ მარტოხელა, 84 წლის მოხუცს, რომელსაც სიარულიც კი უჭირს, სოციალური დახმარება შეუჩერეს.
ნიჟა კვაშალს ერთადერთი ვაჟი აფხაზეთის ომში დაეღუპა. შინ დარჩენილმა რძალმა უდიდესი უბედურება გადაიტანა _ ავადმყოფობით ორი შვილი ზედიზედ გარდაეცვალა. მას შემდეგ, ნიჟა და მისი მეუღლე, მორალურად წელში გატეხილი ცხოვრობდნენ, რასაც ეკონომიკური სიდუხჭირეც თან ერთვოდა.
_ შარშან გარდაიცვალა ჩემი მეუღლე. რაც მან ქვას თავი ურტყა, როცა ჩემი ვაჟი მოკლეს აფხაზეთში, აქამდე როგორ მოაღწია?! ნოემბერში დავასაფლავე და ორ დღეში აგენტი მომადგა. დევიფსე და ესენი ყელში წასაჭერად მომადგნენ? არც მიეჭვია, რომ დახმარებას მომიხსნიდნენ. წავიდა და მალე მომივიდა უმაღლესი ქულა. ღრმა მოხუცი ვარ, თვეში, სულ ცოტა, 120 ლარის წამალი მჭირდება. შვილიშვილები რომ არ დამღუპვოდა, რა მჭირდა ამათი სამათხოვრო? ახლა 19-20 წლის ბადიშები მეყოლებოდა, _ ამბობს ნიჟა კვაშალი.
როცა შვილი აფხაზეთის ომში დაეღუპა, ნიჟა კვაშალს მიანიჭეს ომისა და სამხედრო ძალების ვეტერანის წოდება. როგორც მარჩენალდაკარგულს, 22 ლარი ეძლევა დახმარების სახით. მას მიაჩნია, რომ სწორედ ამიტომ მოუხსნეს დახმარება.
_ ჩემმა შვილმა აფხაზეთისთვის ომს შესწირა თავი. არ ვუშვებდით და გაგიჟდა, მტერი მოდის და ომში თუ არ წავედი, აბა, ნაცარში დავჯდეო? ახლა მე ვგდივარ ნაცარში, ალბათ, მის 22 ლარს უნდა მამადლიდნენ თუ ათჯერ მეტი უნდა მომცენ? აგენტი რომ მოვიდა სახლში, ავიყვანე ოდაში და საწოლებთან ჩამწკრივებული ტაშტები ვაჩვენე, წვიმა ღვარივით ჩამოდიოდა. დაწერე,-მეთქი, ვუთხარი და მიპასუხა, არ უნდა ამას დაწერაო. გეკითხებით, აბა, რა დაწერა? ესაა, ივანიშვილი მოვა და ყველაფერი კარგად იქნებაო? არანაირი ფრინველი და პირუტყვი მე არ მყავს. როცა მოვლა შემეძლო, კი ვუვლიდი. 22 ლარი წამლებსაც არ ჰყოფნის და პურის ფული ვის ვთხოვო? _ გასაჭირის გამო შეწუხებული ნიჟა კვაშალი პასუხს ითხოვს, სოციალური მომსახურების სააგენტოში მისვლაზე უარს აცხადებს და “გურია ნიუსს” ემუდარება, გააგებინონ ყველას, როგორ წაართვეს შარშან დანიშნული პენსია წელს, ახალი ხელისუფლების მოსვლის შემდეგ.
ჩვენ დავუკავშირდით ოზურგეთის სოციალური მომსახურების სააგენტოს, სადაც ჩვეული, თავაზიანი, ნაცნობი პასუხი გაგვცეს, მობრძანდეს და ყველაფერს გავარკვევთო. ჩვენ ნიჟა კვაშალთან ერთად ვეწვიეთ ოზურგეთის სოციალური მომსახურების სააგენტოს. 76 340 ქულამინიჭებული მოხუცი დაჟინებით ითხოვდა, ვინ და რატომ ჩაიდინა ეს ბოროტება და მარტოხელა, შვილმკვდარ, 84 წლის ავადმყოფს, რატომ შეუწყდა დახმარება. სააგენტოს მთავარმა სპეციალისტმა ნინო ჩხაიძემ მისგან მოითხოვა წარმოედგინა, “ფორმა 100”, რის შემდეგაც დააწერინა განცხადება: _ აღნიშნული განცხადების საფუძველზე, თანამშრომელი, რომელიც მოახდენს მის შესწავლას, მაქსიმუმ, ათ დღეში, ნიჟა კვაშალს ეცნობება პასუხი. შესაძლოა, ქულების თავიდან გადათვლა მოხდეს, _ თქვა ნინო ჩხაიძემ.
მარტოხელა მოხუცს გაუჭირდა ყოველივე ამის დაჯერება და დაჟინებით ითხოვდა სოციალური მომსახურების სააგენტოს უფროსთან, ვასილ ხომერიკთან შეხვედრას, თუმცა, ის იმ დროს სამსახურში არ იმყოფებოდა.
ჩვენ აქტიურად მივადევნებთ თვალს ნიჟა კვაშალის სოციალური დახმარების დანიშვნის საკითხს.
