“შვილი როცა დამიძახებს, მშიაო, იქნებ, გავშტერდე და მოვიპარო”

ერთი თეთრის მომწოდებელი არავინ მყავს. ცოლი ფეხმძიმედაა, სამუშაოს როგორ ვითაკილებ, რომ იყოს სადმე. რაში მომანიჭეს 63 780 ქულა? ერთი წლის ბავშვი, მშიაო, მიძახის… იქნებ, გავშტერდე და მოვიპარო რაღაც, _ აკანკალებული ხმით გვიამბობს მანუჩარ ნოღაიდელი, ოზურგეთის მუნიციპალიტეტის სოფელ ლიხაურის მკვიდრი.

ახალგაზრდა ცოლ-ქმარი მანუჩარ ნოღაიდელი და და ნინელი კიტია სოფელ ლიხაურში, ნათესავის პატარა სახლში ცხოვრობენ. როგორც მანუჩარი ამბობს, წარმოშობით ქობულეთიდან, მრავალშვილიანი ოჯახიდანაა. ეს პატარა სახლი ნათესავმა აჩუქა და გაუფორმა. მართალია, ახალგაზრდები არიან, მაგრამ არც სამსახური აქვთ და ვერც მშობლები ეხმარებიან, რადგან ამის საშუალება არ აქვთ.

_ სოციალური დახმარების მისაღებად განცხადება დავწერე ოზურგეთის სააგენტოში და როცა მოვიდნენ, აგენტმა გაიკვირვა, ძალიან ღარიბად ხართო. დამიჯერეთ, ძალიან როცა დაბნელდება, ერთადერთ ნათურას მხოლოდ მაშინ ვანთებთ, ტელევიზორი კი მაქვს, “კორფუჯი”. ასეთი ტელევიზორი ვის აქვს დღეს ან ვინ უყურებს? ესაა ჩემი ოჯახის ერთადერთი ტექნიკა. გაჭირვება სირცხვილი ხომ არაა, არსად სამუშაო არაა, ვის არ ვეხვეწები, ხან სეზონურად რაღაცას თუ წავიმუშავებ, წინასწარ აღებულ ვალს არ ჰყოფნის. 63780 ქულა დამიწერეს. რაში? ალბათ, განზრახ ხდება ეს ყველაფერი, _ გვეუბნება მანუჩარ ნოღაიდელი.

ახალგაზრდა ოჯახს არანაირი შემოსავალი არ გააჩნია, არც შინაური პირუტყვი თუ ფრინველი ჰყავთ, ქალბატონი ნინელი ახლა ფეხმძიმედაა და როგორც თვითონ ამბობს, ექიმთანაც ვერ მიდის საკონსულტაციოდ იმიტომ, რომ გზის ფული არ აქვს.

ახლახან ბავშვი გაუხდათ ავად. სასწრაფოდ გადაიყვანეს საავადმყოფოში, გადასხმისთვის 20%-იანი გადასახადი დასჭირდათ. ერთი თეთრიც არ ჰქონდათ და სოფლის გამგებელმა იხსნა ამ გასაჭირისგან.

_ ლიხაურის გამგებელმა კახა გობრონიძემ მასესხა 150 ლარი და ბავშვი გადამირჩინა, მაგრამ ხომ უნდა გადავუხადო? ახლა იმის მრცხვენია, როდის და როგორ მივცე. თურქეთში სამუშაოდ წასვლაზეც არ ვიტყოდი უარს, მაგრამ ამ ფეხმძიმე ქალს და წლინახევრის ბავშვს რა ვუყო? გუშინ ქალაქში, სოციალურ სააგენტოში ამბის საკითხავად წავედი, ვნატრობდი, იმდენი ხურდა მომცა, ბავშვს ორი ცალი კანფეტი მაინც წავუღო,-მეთქი. შინ საჭმელიც არაფერი დამიტოვებია. რომ მივედი, თვალებში ვერ შევხედე ცოლ-შვილს. ეს სიცოცხლეა? _ ამბობს მანუჩარ ნოღაიდელი და გვემუდარება, იქნებ, ვინმემ გაზეთში გამოაცხადოს, რომ მუშას ეძებს ან ისე გაიგოთ რაიმე და შემატყობინეთ, ამ საქმეში დამეხმარეთო.

_ იმისიც მრცხვენია, ვინმემ არ თქვას, რა დახმარებას ითხოვს, ახალგაზრდაა და იმუშაოსო. მაგრამ სად ვიმუშაო? ახალგაზრდა რომ ვარ და წვრილშვილის პატრონი, ახლა მეორესაც ველოდები, ამიტომ მინდა შემოშველება, თორემ მარტო ჩემი თავი ეშმაკს წაუღია, სადმე გადავიკარგებოდი.

როგორც წესი, ოზურგეთის სოციალური მომსახურების სააგენტოში პასუხი მუდამ ერთნაირი აქვთ: _ მოვიდეს, ვნახავთ, ავუხსნით, რატომ მიიღეს ეს ქულები, შეუძლიათ, მომავალში დაწერონ განცხადება.

ამასობაში კი სოციალურად დაუცველებისთვის დახმარების შეჩერება თუ საეჭვოდ მაღალი ქულების მინიჭება ყოველდღიურ რეჟიმში გრძელდება.