დედა სამუშაოდ თურქეთში არის წასული. როგორც თავად ამბობს, ცოტა ხნის წინ მასთან უბნის ინსპექტორი მივიდა და უთხრა რომ ბათუმში, პოლიციის #5 განყოფილებაში განყოფილების უფროსთან, იაკობაძესთან იყო დაბარებული. ფაღავა დათქმულ დროს ადგილზე გამოცხადდა. ყოფილი პატიმარი “გურია ნიუსს” პოლიციის განყოფილების უფროსისა და მისი დიალოგის შესახებ უყვება, რომელსაც სტილის დაცვით გთავაზობთ:
“უბნის ინსპექტორი მოვიდა და მითხრა პოლიციაში მიდი უფროსთან, დაბარებული ხარო. რომ მივედი, მითხრეს დაჯექიო. რომ დავჯექი, მერე მეუბნება ბიჯო რატომ დაჯექიო? მე გითხარი რომ დაჯექიო? მეთქი, როგორ არ მითხარი, მითხარი-თქო. შეხედე ამასო, ამან იგიც არ იცისო ჯენტლმენურად მოქცევაო. რაზე იყავიო ნასამართლევიო. მოვუყევი. შენო ხარო ჩამოყალიბებული კრიმინალი ბიძიაო. კვირაში ორჯერ მოხვალ აქანეო. ხუთშაბათს და კვირასო და ერთ მშვენიერ დღესაცო, შენო არ გინდა ჩვენთან მეგობრობაო გატყობ მე უკვე შენო და მეორე კარებში ვეღარ გახვალო რა. ხო იცი რა შემიძიაო. პასუხი ვეღარ მივეცი. მე ვუთხარი, თქვენ ბევრი რაცხა შეგიძლია, მარა-მეთქი, რატო? რისთვის-მე ვუთხარი. მეო რა ვიციო, თქვენო გამოგიშვათ მთავრობამო რვაი ათასი კაციო. სკაში, რომ ჩავყოფ ხელსო რომელი ფუტკარი მიკბენს მაგას ვერ გავიგებ მეო. თქვენი კარგი მოვ**ო, თქვენ სად გზდიოთო. შენს უბანშიო და მიმდებარე ტერიტორიაზე, ქვაც რომ ვიაცამ ეიღოსო უსამართლოთო, პირველი ხარ შენო ციხეზეო. ეს პირველია და იფიქრეო. კვირა დღეს მოხვალ ჩემთანო და მერე ჩვენ გადავწყვეტთო რომელ დღეებში ივლი აქო“.
ფაღავა არასრულწლოვანი იყო როდესაც ქურდობაზე დააპატიმრეს. ციხიდან გამოსვლის შემდეგ ხელმეორედ დააპატიმრეს. მესამე დაპატიმრება კი ცეცხლსასროლი იარაღის ტყვიების ქონის გამო მოხდა. ფაღავას თქმით, მას როგორც ყოფილ პატიმარს, ტყვიები ჩაუდეს.
“უნდათ, რომ ინფორმაციები მიუტანოს. საქმის გარჩევებზე ეს არ დადის და არც ისეთი ცხოვრებით ცხოვრობს, რომ ინფორმაციები მიუტანოს. იციან, რომ ამას პატრონი არ ჰყავს და უნდათ გაწირონ” – ამბობს ავთანდილ ფაღავას მეგობარი.
ავთანდილ ფაღავა პოლიციის განყოფილების უფროსის მხრიდან თანამშრომლობის შეთავაზების შესახებ აცხადებს, რომ ბათუმის #5 განყოფილების უფროსმა ფაღავას, პირადად მასთან მეგობრობა შესთავაზა. – “მითხრა ჩვენთან იმეგობრე, პირადად ჩემთანო. გამუშავებო პოლიციაშიო. თუ გინდაო მუშაობაო და არ გაქვს სამუშაოო, ჩემთან იმუშავეო. მე უარი ვუთხარი” – ამბობს იგი.
ავთანდილ ფაღავა ციხიდან გამოსვლის შემდეგ მეგობარს დისტრიბუციაში ეხმარება. ოფიციალურად იგი დაუსაქმებელია და როგორც თავად ამბობს, ოჯახს დედა არჩენს, რომელიც სამუშაოდ თურქეთშია წასული.
ავთანდილ ფაღავა არასამთავრობო სექტორს დახმარებისათვის მიმართვას აპირებს. ამბობს, რომ ეშინია, ისეც ციხეში არ მოხვდეს. ფიქრობს მისი უფლება ირღვევა და პოლიციის უფროსმა მასზე მუქარა განახორციელა. “მშვიდად მინდა ცხოვრება. დამანებონ თავი” – ამბობს იგი.
ბათუმის #5 განყოფილების უფროსი როლანდ იაკობაძე პატიმარზე ზეწოლის ფაქტს უარყოფს. ” არ არის მართალი. არ ყოფილა მსგავსი შემთხვევა. არ მცალია. საქმეები მაქვს” – განაცხადა იაკობაძემ “გურია ნიუსთან” საუბარში და ტელეფონი გათიშა.
