_ კოალიციის წევრების ნაწილი, ადგილობრივი გამგეობაში “ნაციონალური მოძრაობის” წევრების დარჩენას აპროტესტებენ. როგორც ჩვენთვის გახდა ცნობილი, ამის შესახებ ისინი ჩოხატაურის მაჟორიტარ დეპუტატს, თემურ ჭკუასელსაც ესაუბრნენ.
შეხვედრის შესახებ მედიასთან კომენტარები არც ერთ მხარეს არ გაუკეთებია, თუმცა, სოციალურ ქსელ ფეისბუქში, “ქართული ოცნების” ერთ-ერთი წარმომადგენელი, ირაკლი ბერძენიშვილი აღნიშნავს, რომ ჭკუასელის მხრიდან მუქარას ჰქონდა ადგილი:
“27 მარტს, მე ჩემი მეგობრები, “ქართული ოცნების” აქტივისტები, იმ მიზნით, რომ მათთან ერთად გვესაუბრა ზოგადად საქართველოში და კერძოდ ჩოხატაურში მიმდინარე არაჯანსაღ პროცესებზე და ერთობლივად გვემსჯელა ამ მძიმე სიტუაციიდან გამოსვლის ძიებაზე, შევხვდით მაჟორიტარ დეპუტატს ჩოხატაურიდან, ბატონ თეიმურაზ ჭკუასელს და რაიონის ხელმძღვანელ პირებს. შეხვედრის დროს, თეიმურაზ ჭკუასელის მხრიდან ადგილი ჰქონდა არა მარტო ყვირილს, თითის ქნევასა და მაგიდაზე მუშტის ბრახუნს, არამედ ჩემის აზრით, ჩვენს მიმართ ღია მუქარასაც, ე. წ. ანეკდოტის სახით, რომელიც შეიცავდა შემდეგი სახის ტექსტს: “ენას კბილს თუ დააჭერ, დიდხანს იქნები“.
არადა, წინასაარჩევნო შეხვედრების დროს მახსოვს თეიმურაზ ჭკუასელმაც და ბატონმა ბიძინა ივანიშვილმაც, არა ერთხელ გაუსვეს ხაზი გურულების პოლიტიკურ გამჭრიახობას და საინტერესოა, მის შემდეგ რატომ შეიცვალა გურულებზე აზრი ბატონმა თეიმურაზმა? მართალია, ამის შემდეგ მოვლენები ისე განვითარდა, როგორც მიზნად ვისახავდით და მათ მოუხდათ მარცხის აღიარება, მაგრამ, სამწუხაროდ, აუცილებლად უნდა აღვნიშნოთ, რომ საზოგადოებას კიდევ ერთხელ უწევს ბოლშევიზმის ელემენტებთან შეჯახება. მე ვთვლი, რომ ეს მუშტების ბრახუნიც, თითის ქნევაც და მუქარაც მიმართულია არა მარტო ჩემ და ჩემი მეგობრების მიმართ, არამედ იმ ჩოხატაურელების მიმართ, რომლებმაც 1 ოქტომბერს საარჩევნო ყუთთან მისვლით კიდევ ერთხელ დაამტკიცეს, რომ არიან თავისუფალი ადამიანები, რომ მიუხედავად ტერორისა, მათ არაფრის და, მით უმეტეს, არავისი არ ეშინიათ. ალბათ ნიშანდობლივია, რომ რაიონის თვითმმართველობაც და დეპუტატის ბიუროც, განთავსებულია შენობაში, რომელიც არცთუ ისე შორეულ წარსულში წარმოადგენდა კომუნისტური პარტიის ფორპოსტს, რომლის დერეფნებშიც, როგორც ჩანს დღესაც დაძრწის რაიკომის მდივნის აჩრდილი,” _ ეს ტექსტი ბერძენიშვილმა რამდენიმე საათის წინ გაავრცელა.
თემურ ჭკუასელი შეხვედრის შესახებ ინფორმაციას ადასტურებს, თუმცა, ამბობს, რომ მუშტები არავისთვის უბრახუნებია:
_ როცა ჩემთან შემოვიდნენ, ხმამაღლა საუბრობდნენ. ვუთხარი, რომ ჩემთან ხმამაღლა ნუ საუბრობდნენ _ ეგ იყო და ეგ. მუშტები არასდროს არავისთვის მიბრახუნებია. ზოგადად, არ მგონია, მაგ თემაზე კომენტარების კეთება საჭირო იყოს. მე ბევრი საქმე მაქვს, ის უნდა ვაკეთო და არა ირაკლი ბერძენიშვილის სიტყვებზე ვაკეთო ახსნა-განმარტება. გეტყვით ერთს _ ბევრჯერ უცდიათ ჩემთვის ტალახის სროლა, მაგრამ არ გამოუვიდათ, რადგან ცუდი ცხოვრებით არ მიცხოვრია. ახლაც იგივე ხდება და ეს ტალახი მე არ მომხვდება. ისე კი, ბერძენიშვილმა ისიც თქვას, რაზე გვქონდა საუბარი _ მას ბიძინა ივანიშვილისთვის წერილის გაგზავნა სურდა, რაზეც ვუპასუხე, რომ გაეგზავნა თავად, _ გვითხრა ჭკუასელმა.
ჩოხატაურის მუნიციპალიტეტის გამგებლის მოვალეობის შემსრულებელი, თამაზ ჯინჭარაძე ამბობს, რომ აღნიშნულ შეხვედრას მოგვიანებით შეუერთდა და მუშტების ბრახუნი არ დაუნახავს:
_ საუბარი და შეკამათება იყო, როგორ ვიცი, მაგრამ მე როცა ოთახში შევედი, ცოტა დაგვიანებით, მსგავს ფაქტს ადგილი არ ჰქონია. სიმართლე გითხრათ, არ მგონია, რომ მსგავსი ინციდენტი მომხდარიყო, _ გვითხრა ჯინჭარაძემ.
