“ოზურგეთში ყველაზე დიდი პოლიტიკა დასუფთავების საკითხია”

1 აპრილს შეიქმნა ახალი ა.ა.ი.პ. “სერვისცენტრი”, რომლის ხელმძღვანელად “ოზურგეთის დასუფთავების სამსახურის” ყოფილი უფროსი ვლადიმერ სალუქვაძე დაინიშნა.

ამ ორი ა(ა)იპ ორგანიზაციის გაერთიანება ადგილობრივი თვითმმართველობის კანონის შესაბამისად მოხდა. როგორც 11 მარტის საკრებულოზე აღნიშნეს, ზედმეტად გაბერილი შტატების საჭიროება არ იყო და ასე უფრო მობილური და შედეგიანი იქნება აღნიშნული სამსახურების მუშაობა. ამასთან დაკავშირებით “გურია ნიუსი” ა.ა.ი.პ კომუნალური ცენტრის ყოფილ ხელმძღვანელს აკაკი ჭანუყვაძეს და ა.ა.ი.პ. დასუფთავების სამსახურის ყოფილს ხელმძღვანელს  ვოვა სალუქვაძეს ესაუბრა.

ა.ა.ი.პ. კომუნალური სამსახურის ყოფილი უფროსი აკაკი ჭანუყვაძე: _ _რეორგანიზაცია დამთავრდა 11 მარტს. გაუქმდა ოფიციალურად აღნიშნული სამსახური და შეუერთდა ახლად შექმნილ ა.ა.ი.პ. სერვისცენტრს, სადაც მოხდება ამ თანამშრომლების თავიდან აყვანა, გავთავისუფლდი სამსახურიდან 25 მარტს, ყველას, 72 თანამშრომელს ჰქონდა სამთვიანი ხელშეკრულება, რომელიც ახლა უკვე დაუმთავრდათ, თავისთავად ისინი გათავისუფლებულნი არიან სამსახურიდან, რა მოხდება, ვინ დარჩება ახლა სამსახურში, ვინ დატოვებს და ვის არ გაუგრძელებენ ხელშეკრულებებს, ეს დაახლოებით აპრილის შუა რიცხვებში გვეცოდინება, – ამ ეტაპზე 1 აპრილიდან ყველა გათავისუფლებულია სამსახურიდან. _ გვითხრა კაკო ჭანუყვაძემ.

ა.ა.ი,პ. სერვისცენტრის ხელმძღვანელი ვლადიმერ სალუქვაძე “გურია ნიუსთან” აღნიშნავს, რომ ორგანიზაცია ოფიციალურად გაუქმებულია.

_ რაც შეეხება ახალშექმნილ ა.ა.ი.პ სერვისცენტრს, ჩვენ ამ სტრუქტურიდან გამომდინარე დავიწყებთ თანამშრომლების დანიშვნას, ძირითადი ბაზა კი იქნება დასუფთავებისა და კომუნალური სამსახურებში მომუშავე პერსონალით.
– დასუფთავების სამსახურში  მუშაობდა 125 თანამშრომელი, კომუნალურში _ 72, მოხდება ცვლილებები?

_ ლოგიკურია.

_ იქნება შემცირებებიც?

_ მოხდება ახალი თანამშრომლების აყვანა, შემცირებას რას ვეძახით? იქნება შერჩეული მცოდნე კადრები ორთავე ორგანიზაციიდან. ყველამ წაიკითხოს შრომითი ხელშეკრულება, თუკი ვადა გაუვიდა შრომითი კონტრაქტის,  ესე იგი დამთავრდა შრომითი ურთიერთვალდებულება, ნუ დავარქმევთ ამას შემცირებას,  გაუქმდა ორგანიზაცია, აღარ არსებობს.

ვინც პროფესიონალია, ყველა იქნება გათვალისწინებული, პრიორიტეტი იქნება  მცოდნე მომუშავე თანამშრომლებზე.

_ გამოდის, რომ ორივე სამსახურში უმეტესობა არაპროფესიონალები იყვნენ?

_ამაზე პასუხს ვერ გაგცემთ. მე დღეს უკვე დაწერილი მაქვს ბრძანება, განყოფილებების ჩამოყალიბებაზე,  შექმნაზე, იფუნქციონირებს  ყველა საჭირო განყოფილება.

_რამდენი თანამშრომელი გაათავისუფლეს  არჩევნების შემდეგ  თქვენს სამსახურში?

_ ზუსტ ციფრს ვერ გეტყვით, ამის სტატისტიკა არსებობს და შეგიძლიათ საკადრო ცვლილებებთან დაკავშირებით ამოიღოთ ოფიციალური ინფორმაციები.

_ ბატონო ვლადიმერ, როგორც გავიგეთ თქვენს სამსახურში ასაქმებენ ზედამხედველობის სამსახურის ყოფილ უფროსს, “ნაციონალური მოძრაობის” აქტიური მხარდამჭერი შუქრი გაბრიჩიძეს, რომელმაც ერთ-ერთი განყოფილება უნდა ჩაიბაროს. კარგად გვახსოვს, საარჩევნო დღეს როგორ ამოწმებდა სიებს და აკონტროლებდა ერთ-ერთ უბანს…

_  შუქრი გაბრიჩიძეს მოვიაზრებთ კეთილმოწყობის სამსახურის უფროსად. ამ განყოფილებას უნდა მიეცეს პრიორიტეტული სახელი და გვინდა. რომ ქალაქში ეს სამსახური ფუნქციონირებდეს.

_ ეთანხმებით ამ გადაწყვეტილებას?
_ მინდა გიპასუხოთ, რომ ჯერჯერობით მე ვასრულებ დავალებებს. დავალებების  შესრულება მაკისრია მე.

_ თქვენ 2 წელი იყავით  ყველაზე მრავალრიცხოვანი თანამშრომელთა სამსახურის უფროსი, ფაქტიურად წინასაარჩევნოდ დაასაქმეთ ძალიან ბევრი თანამშრომელი, ეს სამსახური შეიქმნა არჩევნებისთვის… გაბერილი შტატებით.

_ ეს კითხვაა თუ თქვენს მიერ უკვე დადასტურებული?

_ იყავით წინა ხელისუფლების მხარდამჭერი, ახლა კვლავ დაინიშნეთ ძალიან დიდი სამსახურის  ხელმძღვანელად, როგორ შეინარჩუნეთ ეს პოსტი?

_ ამ კითხვაზე რომ პასუხი გაგცეთ, ერთი კვირა გაჩერდით ამ სამსახურში და გაიგებთ, როგორ რეჟიმში გვიწევს მუშაობა, ჩვენთვის შაბათი და კვირა არ არსებობს, მერე მიხვდებით რა არის პრიორიტეტი ამ სამსახურში, პოლიტიკა თუ სამეურნეო საკითხები. ოზურგეთში დასუფთავების საკითხი არის ყველაზე დიდი პოლიტიკა – გვითხრა სალუქვაძემ.