“მიშას დრო საქართველოში დამთავრდა”

მოძრაობამ პრეზენტაცია ზუგდიდის დემოკრატიული ჩართულობის ცენტრში გამართა. როგორც გაირკვა, “პატრიოტების” ზუგდიდის ორგანიზაციის თავმჯდომარე მეათე საშუალო სკოლის მეთორმეტე კლასის მოსწავლემ გოგი ხოჭოლავა ყოფილა, რომელმაც თავისი სკოლის მოსწავლეები მიიყვანა პრეზენტაციაზე, რაც გააპროტესტეს არასამთავრობო ორგანიზაცია დევნილთა სამოქალაქო მოძრაობამ და “ქართული ოცნების” მხარდამჭერებმა. ისინი ამბობენ, რომ არასრულწლოვანების დასწრება და ჩათრევა ასეთ ღონისძიებებში არ შეიძლება. მოგვიანებით გაირკვა, რომ მოსწავლეები მოტყუებით მიიყვანეს შეხვედრაზე. ბავშვები ამბობდნენ, რომ ისინი ღონისძიებაზე დასასწრებად მივიდნენ, თუმცა, რა ღონისძიება იყო, არ იცოდნენ. საბოლოოდ მოსწავლეები დემოკრატიული ჩართულობის ცენტრში გამართულ შეხვედრას არ დასწრებიან.

შეხვედრა ხმაურით დამთავრდა. დევნილთა სამოქალაქო მოძრაობის ერთ-ერთმა ლიდერმა თეონა ქარდავამ “პატრიოტებს” ხმამაღლა განუცხადა, რომ “ნაციონალური მოძრაობის” დრო სამეგრელოში დამთავრდა, რამაც დარბაზში ხმაური უფრო გაამძაფრა. დემოკრატიული ჩართულობის ცენტრიდან გიორგი მაზნიაშვილმა და მოძრაობის დანარჩენმა წევრებმა ანაკლიაში გადაინაცვლეს. შეხვედრაზე “მე მიყვარს საქართველოს” მაისურიანი ქალბატონის გამოჩენამ არასამთავრობოების წარმომადგენლებში უარყოფითი ემოცია გამოიწვია. ქალბატონმა ჟურნალისტების მიმართ გამოხატა აგრესია იმის გამო, რომ კამერები იღებდნენ: “მე რას მიღებთ, გადაიღეთ მიქაია!” განაწყენდა წითელმაისურიანი ქალბატონი.

მოძრაობის ლიდერმა პროტესტი გამოხატა და აღნიშნა, რომ ირღვევა მათი უფლებები და ეს არ არის დემოკრატია, შემდეგ კი მხარდამჭერებს შეხვედრის გაგრძელებისკენ მოუწოდა, თუმცა, სიტუაცია მას შემდეგ შეიცვალა, რაც ანაკლიაში არასამთავრობო ორგანიზაცია “ქალები მშვიდობისათვის” ლიდერი ლალი ანთია გამოჩნდა. მისი დანახვისთანავე “პატრიოტების” ლიდერებმა შეხვედრა დაასრულეს და ანაკლია დატოვეს.

ლალი ანთია: “ხმა დაირხა, ასი ათასი კაცი ხვდება “პატრიოტებსო” და მინდოდა მენახა მიშას მხარდამჭერები. მოვედი და დამხვდა 12 კაცი, მაგრამ ამათაც არ იციან, რისთვის მოვიდნენ აქ. აპიარებენ მიშას და აგროვებენ ხალხს, რომ ზოგი მოქრთამვით, ზოგი დაშინებით წავიდეს 19 აპრილის აქციაზე. მიშა რომ ამბობს, სამეგრელო მიჭერს მხარსო, ეს 12 კაცია მთელი სამეგრელო? გაიგოს პრეზიდენტმა, რომ მიშას დრო საქართველოში და, მათ შორის, სამეგრელოშიც დამთავრდა.”