ცენტრის წარმომადგენელმა გიგი მახარაძემ საზოგადოების წევრებს, საბავშვო ბაღების თანამშრომლებსა და მშობლებს გააცნო შეხვედრის მიზეზი, _ 2013 წლის მარტში ადგილობრივი მედიით გავრცელებულმა ინფორმაციამ, უვარგისი ხორცით საბავშვო ბაღების მომარაგების შესახებ, საზოგადოების აღშფოთება გამოიწვია. საბავშვო ბაღების მენეჯმენტს ახორციელებს მუნიციპალური ორგანიზაცია, “სკოლამდელი აღზრდის ცენტრი”, პროდუქტებით მომარაგება კი ტენდერის საფუძველზე ხდება. ინდ.მეწარმე ზურაბ მელიქიძემ ასპინძიდან შემოიტანა ხორცი, რასაც სკანდალი მოჰყვა.
ოზურგეთის ერთ-ერთი საბავშვო ბაღიდან, საკეპი მანქანის უქონლობის გამო, ხორცი გასატარებლად ქალაქში, ერთ-ერთ ყასაბთან გაიტანეს. იქ გაირკვა, რომ ის უვარგისი იყო, მუქი ფერითა და დამახასიათებელი სუნით.
დემოკრატიული განვითარების კავშირის აღმასრულებელმა დირექტორმა ლევან ხინთიბიძემ განაცხადა:
_ ჩვენ არ გავჩერდებით, საქმე ეხება ჩვენს მომავალს, ბავშვებს. ამ თემას მეტი ნათელი უნდა მოეფინოს, რა პასუხი აქვს ხელისუფლებას? _ თქვა ხინთიბიძემ.
საკრებულოს კომისიის თავმჯდომარემ ირინა საჯაიამ განაცხადა, რომ პირველ რიგში უნდა დაველოდოთ სურსათის უვნებლობის სამსახურის პასუხს ხორცის ექსპერტიზის თაობაზე.
სკოლამდელი აღზრდის ცენტრის ხელმძღვანელმა მაკა ჭყონიამ განაცხადა, რომ ვითარების მაქსიმალურად ახსნის სურვილი აქვს და მოყვა, თავიდან როგორ გაიმარჯვა ტენდერში აღნიშნულმა ინდმეწარმემ. შემდეგ მას უნდა მოეწოდებინა მხოლოდ პირველი ხარისხის ხორცი. აღნიშნა ისიც, რომ ბაღის მენეჯერი და მნე პასუხისმგებელია ხორცის გარეგნულ ნიშნებზე.
_ როცა შეტყობინება შემოვიდა, მივედით და ვნახეთ, რომ “ფორმა ორი”, რაც ხორცის ვარგისიანობის შემოწმების დასტურია, ჰქონდათ. ვიზუალურად კი არ მოგვეწონა და მივწერე ოფიციალური წერილი, რომ არ მივიღებდით. ამის შემდეგ დაგვიბრუნეს ქალაქის მესამე ბაღიდან ხორცი. წავიყვანე სურსათის უვნებლობის სამსახურის წარმომადგენელი ჯუმბერ ხომერიკი და ვნახეთ, რომ მეხორცესთან დასამუშავებლად მიტანილ ხორცთა ერთად, სამი პატარა ნაჭერი იდო, მუქი ფერის, რაც სისხლჩაქცევად შეფასდა.
კითხვაზე, ეს მხოლოდ ერთადერთი ფაქტი იყო თუ არა, ქალბატონმა მაკამ თქვა, რომ ასეთი რამ მანამდეც მოხდა. თუმცა, “ფორმა ორი” მაშინაც ახლდა
ოზურგეთის მესამე საბავშვო ბაღის მნემ განაცხადა, რომ ამ ხორცის შესახებ, სასწრაფოდ ჩააყენა საქმის კურსში ცენტრის ხელმძღვანელი.
_ მაშინვე მოვიდნენ, ამ საზარელი ფაქტის შესახებ როცა შევატყობინე. მენეჯერმა რამდენჯერმე ჰკითხა მაკა ჭყონიას, თუ გვაძლევ უფლებას, ეს ხორცი გავაკეთოთო. მან თანხმობა განუცხადა. მერე ვთქვი, რა უნდა ვქნათ, რომ შევძლოთ და ჯანდაცვამდე მივიდეთ-თქო. შესყიდვების სპეციალისტმა კაკო ზაქარიაძემ მიყვირა, იქ მისვლამდე უფროსი სხვა გყავსო.
იურისტმა მაია სურგულაძემ განმარტა, რომ აქ სისხლის სამართლის დანაშაულის ნიშნები იკვეთება.
ინდმეწარმე მელიქიძემ მუქი შინდისფერი ხორცის ვიზუალური მხარე ახსნა იმ მოტივით, რომ ასპინძაში და საიდანაც ეს ხორცი მოაქვთ, ძროხებს ჭარხლით კვებავენ.
პროკურორმა მალხაზ სირაძემ განაცხადა, რომ მისი ინფორმაციით, აღნიშნულ ინდმეწარმესთან ტენდერი უკვე გაუქმებულია.
მშობლებმა კატეგორიულად დასვეს საკითხი, რატომ ხდება ასპინძიდან მაცივრის გარეშე, ფურგუნიანი მანქანით ხორცის ჩამოტანა, რაზეც მაკა ჭყონიამ ერთობ გასაკვირი პასუხი გასცა, _ამბობდნენ, რომ ბენზინი მეტი ეხარჯებოდათ, როცა მაცივარს ჩართავდნენ და ასე ეკონომიას აკეთებდნენო.
მშობელმა ლადო გიორგაძემ კატეგორიული განცხადება გააკეთა:
_ შეშფოთებული ვარ, ფაქტია, მოხდა დანაშაული, მე ვარ ამ “სკოლამდელი აღზრდის ცენტრის” წინააღმდეგი. თქვენ, ქალბატონო მაკა, არჩევნების წინ, პრეზიდენტთან შესახვედრად და რამაზ ნიკოლაიშვილის ღრეობების დროს, სამი წლის ბავშვები, ჩვენი შვილები ჭყლეტაში მოაყოლეთ…
არასამთავრობო ორგანიზაციის წარმომადგენლებმა მას სიტყვა შეაწყვეტინეს და თხოვეს, პოლიტიკური ხასიათი არ მისცემოდა ამ ღონისძიებას.
მშობელმა მერი ლაგაზიშვილმა იკითხა, რატომ აძლევენ ბავშვებს სილოსს – გატარებულ 15 დღის მწვანილს, რისთვის არის შექმნილი ეს ცენტრი, 12 თანამშრომელი რომ ზის და მშვენიერ ხელფასს იღებს? მოაკელით ეს თანამშრომლები და გაზარდეთ ბავშვების კვების ხარჯი, _ თქვა მან.
საბოლოოდ შეთანხმდნენ იმაზე, რომ კონკრეტული დამნაშავის გამოაშკარავება არ აგვარებს ამ საკითხს, თუმცა ესეც უნდა მოხდეს. მონიტორინგის მექანიზმის დანერგვა უნდა გახორციელდეს, როგორ უნდა დაეხმარონ ბაღებს. თქვეს ისიც, რონ ეს აქტუალური საკითხი რჩება დღის წესრიგში და კვლავ გაიმართება დისკუსიები.
