(გურია ნიუსი, ლანჩხუთი) _ ლანჩხუთის საკრებულოს სხდომაზე 12 საკითხი განიხილეს. ამასთან, საკრებულოს საფინანსო-საბიუჯეტო და ეკონომიკურ საკითხთა კომისიის შემადგენლობაში ახალი წევრი მარინე გოგიჩაიშვილი მისივე განცხადების საფუძველზე მიიღეს. შეგახსენებთ, რომ გოგიჩაიშვილი ახალი წევრია და მან საკრებულოდან გასული კახა ხელაძე ჩაანაცვლა.
ადგილობრივი შესყიდვების გეგმის დამტკიცების წინააღმდეგი აღმოჩნდა ოპოზიციონერი დავით წულაძე. მისი თქმით, საკითხი ბუნდოვანია, რადგან კონკრეტული თავის უკან არ ჩანს, რა უნდა შევისყიდოთ და რაში გადავიხადოთ ფული. მანვე უკვე მერამდენედ გააპროტესტა მიკროფონის არქონა _ რამდენიმე სხდომაზე კი იყო და მერე რა უყავითო.
საკრებულოს თავმჯდომარემ შეახსენა, რომ ეს არ იყო განსახილველი საკითხი და ამის შესახებ ბოლოს შეიძლებოდა მსჯელობა, მაგრამ ოპოზიციონერი არ ცხრებოდა: ვერ ვყურობ, რას ამბობენ და რა განვიხილოო და პროტესტის ნიშნად, სხდომათა დარბაზი კიდევ ერთხელ დატოვა.
როგორც სხდომაზე ითქვა, ლანჩხუთის მუნიციპალიტეტის გამგეობის ინფრასტრუქტურის, ურბანიზაციის და არქიტექტურის სამსახურს დაემატება საპროექტო განყოფილება, რომელიც საკრებულოს მიერ დაკვეთილ პროექტებს მოამზადებს. საკრებულო თვლის, რომ აღარ იქნება საჭირო კერძო საპროექტოების ჩართვა ამ საქმეში და ხარჯებიც შემცირდება.
ცვლილებები შევიდა საგადასახადო კოდექსში, რომელიც 25 თებერვალს მიიღეს _ მიწა, რომელზეც საცხოვრებელი სახლი დგას, თავისუფლდება გადასახადისგან. არასასოფლო-სამეურნეო მიწაზე ქალაქში 24 თეთრი იქნება გადასახადი, ხოლო სოფელში _ 21 თეთრი. როგორც ითქვა, რკინიგზიდან 2,5-ჯერ გაიზრდება შემოსავალი, რადგანაც ქონების გადასახადი, ძირითადად, რკინიგზას შემოაქვს.
ფრაქცია “ქრისტიან-დემოკრატების” ხელმძღვანელმა მარიკა თურნავამ გააპროტესტა ის ფასები და მომსახურება, რომელსაც კომპანია “აიჰოპი” (სამედიცინო ცენტრის ახალი მფლობელი) გვთავაზობს. მისი თქმით, 2-ჯერ გაიზარდა საავადმყოფოში ფასები სხვადასხვა მომსახურებაზე, რაც ისედაც მცირე შემოსავლის მქონე ლანჩხუთელებისთვის, ფაქტობრივად, მიუწვდომელია. საკრებულოს თავმჯდომარე რევაზ ჩიტიძე მას დაეთანხმა, თქვა, რომ ეს ყურადსაღები საკითხია, თუმცა, ისიც აღნიშნა, რომ ამის შესახებ ინფორმირებული არ იყო.
ოპოზიციონერმა მაკა კვირკველიამ უკვე მერამდენედ შენიშვნა გამოთქვა გარე განათების თაობაზე: _ რით ვერ მოგვარდა შარშან ზაფხულის შემდეგ ეს პრობლემა? _ იკითხა მან, რაზეც გამგებელმა უპასუხა, ამის მიზეზი ის არის, რომ ტენდერი სამჯერ ჩავარდაო. კვირკველიამ ისიც იკითხა, მართალია თუ არა ნაგავსაყრელი ქალაქის ერთ-ერთ სასაფლაოსთან უნდა გაკეთდესო? ჩიტიძის თქმით, ეს ინფორმაცია სიმართლეს არ შეესაბამება: _ ნაგავსაყრელისთვის ტერიტორია ქალაქიდან 5 კილომეტრის დაშორებით არის გამოყოფილი, ადრე სადაც იყო და მის მოწესრიგებაზეა საუბარი.
