“სკრინინგის ეროვნული პროგრამა, რომელიც მკერდის კიბოთი დაავადებული ქალების რეაბილიტაციას ემსახურება და ამ ვერაგი დაავადების პრევენციის მიზნით პირველი ლედის უდიდესი დახმარებით გურიის რეგიონში, მხოლოდ ლანჩხუთში ფუნქციონირებს, შესაძლოა, აღარ გაგრძელდეს. რადგან ადგილობრივი ხელისუფლებიდან ამ პროგრამას არ ექნება ფინანსური და მორალური მხარდაჭერა, პროგრამა ვერ იარსებებს. დღეს, როგორც ჩემთვის გახდა ცნობილი, პროგრამის მხარდაჭერაზე უარი განაცხადა ადგილობრივმა ხელისუფლებამ. ბატონებო, ,,გამარჯვებულ ქალთა” კლუბში, რომელიც ამ პროგრამის ეგიდით ჩამოყალიბდა, 40 ქალბატონია გაწევრიანებული. ამ ქალბატონებს სხვადასხვა ტიპის საკმაოდ ძვირადღირებული გამოკვლევა ჩაუტარდათ, გადაეცათ პროტეზები, სხვა მორალურ-სპორტულ ღონისძიებებზე აღარ ვსაუბრობ. ამავდროულად დაავადების ადრეული გამოვლინების მიზნით, გავაგზავნეთ თბილისში ქალბატონები; ასევე, ადგილზე ჩამოვიყვანეთ ექიმთა ჯგუფი. გამიჭირდება ზუსტი რაოდენობის დასახელება, იმდენი ქალბატონი გაესინჯა სრულიად უსასყიდლოდ და ასე შემდეგ… რისთვის აკეთებთ ამას? თქვენც გააგრძელეთ ეს კეთილი საქმე და ნუ ფიქრობთ იმას, რომ ჩვენ ყველაფერს ცუდს ვაკეთებდით,” _ წერს კახაბერ ასკურავა.
იმის შესახებ, მართლაც აპირებს თუ არა ლანჩხუთის ადგილობრივი ხელისუფლება ამ პროგრამის მხარდაჭერაზე უარის თქმას, ლანჩხუთის მუნიციპალიტეტის გამგებლის მოვალეობის შემსრულებელს, ზაზა ურუშაძეს ვესაუბრეთ: “ინფორმაცია, თითქოს ამ პროგრამის გახორციელებას ხელს ვუშლით, აბსურდია. საიდან მოიფიქრა ეს ასკურავამ, ჩემთვის გაუგებარია. პირიქით _ ჩემი ხარჯებით მყავს თბილისში 15 ადამიანი სამკურნალოდ გაგზავნილი. რატომ უნდა იყოს ჩვენი მხრიდან ხელშეშლა, როცა ამდენი გაჭირვებულია? ასკურავა ცდილობს, პოლიტიკური განცხადებებით გამოიჩინოს თავი. ერთი ბაბუაჩემი გახდება პოლიტიკოსი, რომელიც მამათშია დაკრძალული და მეორე _ ასკურავა. მაგათ გაანადგურეს და შეჭამეს რაიონი, მე რა შუაში ვარ, ვერ გავიგე!” _ გვიპასუხა ურუშაძემ.
