აქციის მონაწილეები მთავრობის მიერ აბორტის ლეგალიზაციის აკრძალვის მოთხოვნით გამოვიდნენ.
“ორსულობის თვითნებური შეწყვეტა ქვეყნის დემოგრაფიულ მდგომარეობაზე უარყოფითად აისახება,” _ აცხადებდნენ აქციის ორგანიზატორები. აქციის ერთ-ერთი ორგანიზატორის ევგენი მიქელაძის განცხადებით, კანონი ქვეყნის რელიგიისა და სარწმუნოების შესაბამისი უნდა იყოს. აბორტის წინააღმდეგ გამართული აქციის პარალელურად, ფემინისტთა საზოგადოების წარმომადგენლები შეიკრიბნენ. მათ აბორტის კრიმინალიზაციის მოთხოვნა გააპროტესტეს და განაცხადეს, რომ ამით ქალის უფლება ილახება. აქციაზე სიტყვიერი დაპირისპირება მოხდა.
ჩვენ აქციის ერთ-ერთ ორგანიზატორს ვახტანგ თანდილაშვილს ვესაუბრეთ.
ვახტანგ თანდილაშვილი: “დღევანდელმა აქციამ წარმატებით ჩაიარა. ჩვენი მხრიდან გოგოებიც ბევრნი იყვნენ და ბიჭებიც. 150-მდე ვიქნებოდით დაახლოებით. აქციამ ჩაიარა ისე, როგორც ჩვენ ვვარაუდობდით _ წარმატებით. რაც შეეხება ფემინისტებს, ისინი იყვნენ სპეციალურად მოყვანილნი. არავინ გამოსულა ჩვენი აქციის წინააღმდეგ, გარდა რამდენიმე სპეციალურად მიყვანილი ფემინისტისა, რომლებიც ზოგადად ოჯახის იდეალს ებრძვიან. ჩვენი მიმართვა და მოთხოვნა არის ის, რომ მოხდეს აბორტის კრიმინალიზაცია, რაც გულისხმობს იმას, რომ დაიწყოს სისხლის სამართლის დევნა ყველა იმ პირის მიმართ, ვინც იკეთებს აბორტს, აკეთებს, ან გაკეთებისკენ უბიძგებს. სიცოცხლის მოკვდინების უფლება არავის არ აქვს და ვითხოვთ, გატარდეს მათ მიმართ სისხლის სამართლის დევნა.
ახლო მომავალში ვაპირებთ შევხვდეთ ფსიქოლოგებს, იურისტებს, მოძღვრებს და საერთო მოქმედებებით საკანონმდებლო ბაზა ჩამოვაყალიბოთ აღნიშნულ საკითხთან დაკავშირებით.
ჩვენ აქციაზე მყოფ ზაზა სვანაძესაც გავესაუბრეთ, რომელმაც სურათებიც მოგვაწოდა აქციიდან.
ზაზა სვანაძე: _ შემიძლია გითხრათ, რომ 2007 წლიდან მოყოლებული, ბოლო 6 წელია არა ერთი აქციის აქტიური მონაწილე ვყოფილვარ; ასევე, დამიგეგმავს მინიაქციები ჩემს თანამოაზრეებთან ერთად და დაზუსტებით შემიძლია გითხრათ, ვერასდროს ვერ გათვლი ამა თუ იმ აქციის წინ, როგორ შეიძლება დასრულდეს ეს აქცია. თუმცაღა ვთვლი, რომ ორი აქციის პარალელურ დროს ჩატარება ერთსა და იმავე სივრცეში იდეოლოგიურად დაპირისპირებული მხარეების მიერ, პრაქტიკულად, 100%-მდე ზრდის შეტაკების ან მცირე კონფრონტაციის შანსებს.
_ რომელიმე მხარის მხარდასაჭერად იყავით აქციაზე?
-არა, მე არც ერთ მხარეს არ წარმოვადგენდი _ მივედი ფოტოების გადასაღებად. შეხლა-შემოხლა არ ყოფილა, სიტყვიერი დაპირისპირება იყო, რომელიც ერთ წუთში განიმუხტა. აღნიშვნის ღირსია სამართალდამცავების დროული რეაგირება. თავიდან იყო რეპლიკები, მოწოდებები, არც ერთი მხარე არ ყოფილა აგრესიული, თუმცა, აქციის შუა მსვლელობისას მამაკაცების მხრიდან გაისმა შეძახილები ფემინისტების მისამართით, რომ ბავშვის მკვლელობას უჭერთ მხარს და ამაში გრანტებს იღებთო. ამას მოჰყვა სიტუაციის ოდნავ დაძაბვა. შეკამათებისას არც ფემინისტებმა დაუთმეს მამაკაცებს, ბოლოს ფემინისტები და მათი მხარდამჭერი მამაკაცები ტრადიციული ფასეულობებისთვის მებრძოლმა მამაკაცმა წარმომადგენლებმა სტვენით გააცილეს.
_ პირადად თქვენი აზრი როგორია აბორტის ლეგალიზაციის აკრძალვაზე?
_ ამაზე მოკლე კომენტარით შემოვიფარგლები _ ორივე აზრს აქვს არსებობის უფლება, მე პირადად ამ საკითხზე კატეგორიული, მკვეთრი პოზიცია არ მაქვს.
აქციის ორგანიზატორებმა ყველას ურჩიეს წმ. მამების და მართლმადიდებელი მოძღვრების დარიგებების წაკითხვა.
