თუმცა, პირად საუბარში, გათავისუფლების მიზეზად საზღვარგარეთ წასვლის სურვილი დაუსახელა.
ნინო კვაჭანტირაძე ბუნებრივი რესურსების სააგენტოს ტყისა და ველური ბუნების მართვის დეპარტამენტის გურიის სამმართველოში ორი წელია, მუშაობს. მისი თქმით, ამ ხნის განმავლობაში გენერალური ინსპექციიდან, რომლებიც მათ მუშაობას ინტენსიურად ამოწმებდნენ, არცერთი შენიშვნა და გაფრთხილება არ აქვს მიღებული.
_ თითქმის, ყოველთვე ვწერდით განცხადებას დანიშვნის შესახებ, რადგან ბრძანებები მხოლოდ ერთი ან ორი თვით იწერებოდა. 31 მარტს გავიდა ბრძანებით გათვალისწინებული ვადა. სხვა თანამშრომლებთან ერთად, მეც დავწერე განცხადება დანიშვნაზე და გაიგზავნა სააგენტოს უფროსთან. უფრო სწორად, ნოზაძემ თავად წაიღო. 2 აპრილს, როცა ჩამოვიდა, დამიბარა კაბინეტში და მითხრა, ხელშეკრულება აღარ გაგიგრძელეთო. მიზეზი რა არის-მეთქი და საზღვარგარეთ რომ აპირებდი წასვლას, ესო. სასაცილო მიზეზია-მეთქი. რა აზრი აქვს ამაზე ლაპარაკს, უკვე გადაწყვეტილიაო, დაზუსტებით მითხრა ნოზაძემ, _ ამბობს ჩვენთან საუბრისას კვაჭანტირაძე.
_ ქალბატონო ნინო, როგორც ვიცით, უფროსთან ურთიერთობა გაცილებით ადრე დაგეძაბათ… მას შემდეგ, რაც თქვენი კუთვნილი პრემია სხვას გამოუწერა…
_ მსგავსი შემთხვევები იყო, თუმცა, მას არ გამოუწერია. უბრალოდ, საქმის კურსში არ ჩააყენა სააგენტო.
_ უფრო კონკრეტულად?
_ ადრე სამმართველოს უფროსები არ წყვეტდნენ პრემიების მიმღებთა სიას. 2 ადამიანის ნაცვლად ვიმუშავე ერთი თვე და პრემია სხვას გამოუწერა. თუმცა, მანამდე იყო ერთი დეტალი. მე და ნოზაძის ძმა, სამმართველოში ერთ დღეს დავინიშნეთ. შემდეგ საყვედური მითხრა იმის გამო, თუ რატომ არ ვუთხარი, რომ მისი ძმის დანიშვნა არ შეიძლებოდა. მე კიდევ ახალი მისული ვიყავი და ვერ გავბედე, _ იხსენებს კვაჭანტირაძე.
როგორც გათავისუფლებული იურისტი გვიყვება, ამის შემდეგ ნოზაძე მისი პირადი მიმოწერით დაინტერესდა და სკაიპის ჩანაწერები ამოიღო:
_ ეს ჩემი უფლებების პირდაპირი დარღვევა იყო. ჩემი და ჩემი მეგობრის სკაიპის ჩანაწერები ამოიღო. მისი თქმით, ეს მისმა კეთილის მსურველებმა გააკეთეს. იქ სწორედ ის საუბარი იყო, რომ პრემია სხვამ მიიღო, მაშინ როცა 2 ადამიანის ნაცვლად ვიმუშავე თითქმის 1 თვე, _ დასძენს კვაჭანტირაძე.
ნიკოლოზ ნოზაძემ, რომელიც 15 წუთის წინ, ჩვენთან სატელეფონო საუბარში ამბობდა, რომ სოფელ მთისპირში ხანძრის ჩასაქრობად იყო და კომენტარს მოუცლელობის გამო ვერ აკეთებდა, 15 წუთის შემდეგ ჩვენს ზარებს აღარ უპასუხა. თუმცა, მას შემდეგ რაც მას უცხო ნომრით დავუკავშირდით, “ჩვენება” შეცვალა და კომენტარისგან თავი იმ მიზეზით შეიკავა, რომ სტუმრები ჰყავდა:
_ ბატონო ნიკოლოზ, სულ ცოტა ხნის წინ მთისპირში იყავით და ხანძარს აქრობდით… ახლა კაბინეტში სტუმრები გყავთ… თუ ამას ასწრებთ, იქნებ ჩვენც მოგვცეთ კომენტარი ნინო კვაჭანტირაძის გათავისუფლებასთან დაკავშირებით…
_ თქვენ არ იცით, რომ მე ქარიშხალას მეძახიან ზედმეტსახელად?! ყველაფერს ვასწრებ. რაც შეეხება კვაჭანტირაძეს, რატომ გაინტერესებთ. თქვენი ახლობელია?
_ არა. მე ჟურნალისტი ვარ და გვაინტერესებს, რამდენად ლოგიკურია სამსახურიდან ადამიანის გათავისუფლება იმის გამო, რომ მას საზღვარგარეთ წასვლის სურვილი გააჩნია… თანაც, როგორც გავიგეთ, თქვენ მისი სკაიპი გაატეხინეთ და პირადი მიმოწერა წაიკითხეთ…
_ მასეთი რამ არ მომხდარა. სკაიპი ტყდება?!
_ თუ მოინდომებთ ყველაფერი ტყდება.
_ არ მცალია, ბოდიში, რა…
_ ძალიან გთხოვთ, რამდენიმე შეკითხვაზე გვიპასუხოთ. ის მაინც გვითხარით, კვაჭანტირაძის კუთვნილი პრემია სხვას რატომ გამოუწერეთ?
_ მე არ გამომიწერია. ცენტრიდან გაანაწილეს ასე.
_ თქვენ ხომ იცოდით, რომ პრემია იმ ადამიანმა მიიღო, რომელსაც სამსახურში არ უვლია და მის ნაცვლად მთელი თვე კვაჭანტირაძე მუშაობდა? რატომ არ ჩააყენეთ ზემდგომი საქმის კურსში?
_ მაგაზე მთელი ამბავი ავტეხე. ჩვენ რატომ არ გვეკითხებით, როცა პრემიებს წერთ-მეთქი. ეს ბევრ თანამშრომელს ეწყინა და სავსებით სამართლიანად.
_ თქვენი ძმა რომ თქვენს დაქვემდებარებულ უწყებაში დანიშნეთ… ამაზე რას გვეტყვით?
_ ის სტაჟიორად იყო და აუცილებლად უნდა დაგვენიშნა(?!). იცით, რა არ მცალია, ბოდიშს გიხდით, სტუმრები მყავს და ვეღარ დაგელაპარაკებით, _ გვითხრა ნოზაძემ და ტელეფონი გაგვეთიშა.
“გურია ნიუსმა” მომხდართან დაკავაშირებით, ბუნებრივი რესურსების სააგენტოს ტყისა და ველური ბუნების მართვის დეპარტამენტს დაუკავშირდა. როგორც გვითხრეს, სააგენტო, კომენტარს მოგვიანებით, მას შემდეგ გააკეთებს, რაც საქმის დეტალებში გაერკვევა.
